Skip to content

Skip to table of contents

 MATAUPU 17

Le Auala e Maua ai le Fiafia

Le Auala e Maua ai le Fiafia

Aiseā ua avea ai Ieova ma ʻAtua fiafia’?

E TATOU te mananaʻo uma lava ia maua le fiafia, a ea?— Peitaʻi, e lē toʻatele tagata e fiafia. E te iloa le māfuaaga?— Auā latou te lē iloa le auala e maua ai le fiafia. Ua latou manatu faapea o le auala e maua ai le fiafia, o le mauaina lea o le tele o mea. Peitaʻi, e puupuu lava se taimi e fiafia ai pe afai latou te mauaina mea na.

O le auala tāua lenei e maua ai le fiafia. Na fetalai le Faiaʻoga Sili: ʻE sili le fiafia o lē na te foaʻi atu, i lo lē na te talia mai.’ (Galuega 20:35) O le ā la le auala e maua ai le fiafia?— Ioe, o le foaʻi atu i tagata ma le faia o mea mo i latou. Pe sa e iloaina lenā mea?—

Seʻi o tatou mafaufau atili i le mea lenei. Pe na fetalai Iesu e lē fiafia le tagata lea o loo mauaina le meaalofa?— E leai. E te fiafia pe a maua sau meaalofa, a ea?— E faapena uma lava i tatou. E tatou te fiafia pe a maua ni a tatou mea mananaia.

 Ae na faapea mai Iesu e sili atu lo tatou fiafia pe a foaʻi atu. O le ā sou manatu, o ai e pito i tele mea ua ia foaʻiina mai i tagata?— Ioe, o Ieova le Atua.

Ua fai mai le Tusi Paia o le Atua na ia ʻfoaʻi maia le ola, ma le mānava, ma mea uma i tagata.’ Ua ia foaʻi mai iā i tatou le timu mai le lagi faapea ma le lā, ina ia ola ai laau ma maua ai a tatou meaʻai. (Galuega 14:17; 17:25) E lētioa lava faapea mai le Tusi Paia, o Ieova ʻo le Atua fiafia’! (1 Timoteo 1:11) O se tasi o gaoioiga e fiafia ai le Atua, o lona foaʻi atu lea i isi. Afai tatou te foaʻi atu i isi, o le a tatou maua ai foʻi le fiafia.

O le ā le auala e te maua ai le fiafia na i lo lou ʻaia toʻatasi o fasi keke?

O le ā se mea e mafai ona tatou foaʻi atu i isi? O le ā sau tali?— I nisi taimi, e moomia se tupe e faatau mai ai se meaalofa. E tatau ona faatau i tupe pe afai o se meaalofa e maua i le faleoloa. Afai e te manaʻo e foaʻi atu i se isi se meaalofa mai le faleoloa, atonu e moomia ona faaputu sau tupe ina ia lava le tau o le meaalofa.

Peitaʻi, o loo iai meaalofa e lē moomia ai se tupe. O se faataʻitaʻiga, e ese le manaia o se ipu vai mālūlū i se aso vevela. A faapea la e te tuuina atu se ipu vai faapena mo se tagata ua fia inu, e te mauaina ai la le fiafia ona o le foaʻi atu.

Atonu e falai ni lua panikeke pe fai foʻi se lua keke i se aso ma si ou tinā. E manaia tele lenā mea. Na i lo lou ʻaia toʻatasi o panikeke po o fasi keke, o le ā le mea e mafai ona e fai ina ia e maua ai le fiafia?— Ioe, e mafai ona ave ni panikeke po o fasi keke mo sau uō. Pe te manaʻo e fai le mea lenā i se isi taimi?—

Na silafia e le Faiaʻoga Sili ma ona aposetolo le fiafia e maua mai  le foaʻi atu. E te iloa, o ā mea na latou foaʻi atu i tagata?— O le mea pito i sili ona lelei i le lalolagi! Sa latou iloaina le upu moni e uiga i le Atua, ma na latou fiafia e talaʻi atu i isi le tala lelei lenei. Na latou faia lenei mea, e aunoa ma lo latou taliaina o se tupe mai so o se tasi.

Sa iai se tasi aso na feiloaʻi ai le aposetolo o Paulo ma lana uō o Luka i se fafine, o lē na manaʻo foʻi e maua le fiafia ona o le foaʻi atu. Na latou feiloaʻi ma le fafine lenei i tala ane o se vaitafe. Na ō atu Paulo ma Luka i le vaitafe, talu ai na la faalogo e ō tagata i le vaitafe lenei e fai ai a latou tatalo. O le mea moni lava lenā na tupu, auā na la maua atu fafine i inā, o fai ai a latou tatalo.

Na talaʻi ai loa Paulo i fafine nei e uiga i le tala lelei iā Ieova le Atua ma lona Malo. O se tasi o na fafine e igoa iā Litia, ma na uaʻi lelei Litia i le lauga a Paulo. Mulimuli ane, na manaʻo Litia e fai se mea e faaalia ai lona fiafia tele i le tala lelei na ia faalogo i ai. O lea, na tauanau ai e Litia, Paulo ma Luka e faapea: “Afai ua outou manatu o aʻu o lē faatuatua i le Alii, ō mai ia i loʻu fale, ma nonofo ai.” Ona o lona tauanau atu, na la ō ai i lona fale.​—Galuega 16:13-15.

O le ā o fai atu ai Litia iā Paulo ma Luka?

Na fiafia Litia e talimālō i auauna nei a le Atua. Na alofa i ai Litia auā na la fesoasoani iā te ia ina ia iloa Ieova ma Iesu, ma iloa le auala e maua ai le ola e faavavau. Na faafiafiaina Litia auā na mafai ona ia ofo atu iā Paulo ma Luka ni meaʻai ma se mea e mālōlō ai. Na faafiafiaina o ia auā na naunau moni lava e foaʻi atu. O le manatu lenā e manaʻomia ona tatou manatuaina. E ono fai mai se tasi e tatau ona foaʻi atu se meaalofa. Ae a faapea tatou te lē o mananaʻo moni lava e fai, e lē maua ai la so tatou fiafia i le foaʻi atu faapena.

Aiseā na fiafia ai Litia e talimālō iā Paulo ma Luka?

O se faaaʻoaʻoga, seʻi faapea o loo iai ni au lole o loo e fia ʻai ai lava. A ou fai atu e ave isi lole mo se isi tamaitiiti, pe e te fiafia la e foaʻi atu?— Ae ā pe a faapea o loo iai ni au lole i le taimi lua te feiloaʻi ai ma sau uō lelei lava? A faapea e te loto malie lava oe e ave au lole mo se isi tamaitiiti, o le a e maua ai la le fiafia, a ea?—

 I isi taimi, tatou te mananaʻo e foaʻi uma a tatou mea mo se tagata e tatou te alolofa tele i ai. E ao foʻi ona tatou mananaʻo e foaʻi uma atu a tatou mea i le Atua, a o faateleina lo tatou alofa mo Ia.

Aiseā na fiafia ai le fafine mativa lenei, e foaʻi atu ana mea uma?

Na silafia e le Faiaʻoga Sili se fafine mativa na manaʻo e foaʻi uma atu ana mea i le Atua. Na vaai Iesu i lenei fafine i le malumalu i Ierusalema. E lua tupe iti a le fafine lenei; ma na pau lava na o tupe e ola ai. Peitaʻi, na tuu uma e le fafine ana tupe i le pusa, e fai ai lana meaalofa mo le malumalu. E leʻi faamalosia lenei fafine e se tasi e foaʻi atu. E leʻi iloa e le toʻatele o tagata sa i le malumalu le foaʻi a le fafine lenei na fai. O le māfuaaga na foaʻi ai, ona sa manaʻo i ai ma e alofa moni lava iā Ieova. Na maua e le fafine lenei le fiafia ona na mafai ona foaʻi atu.​—Luka 21:1-4.

E tele auala e mafai ona tatou foaʻi ai. Pe e mafai ona e mafaufau i ni auala?— A faapea tatou te foaʻi atu ona tatou te mananaʻo moni ai lava, e tatou te fiafia ai. O le māfuaaga lea na fetalai mai ai le Faiaʻoga Sili iā i tatou: “Ia outou foaʻi atu.” (Luka 6:38) A faapea tatou te foaʻi atu, o le a tatou faafiafiaina ai isi tagata. O le a avea ai i tatou ma tagata e sili ona fiafia!

Seʻi o tatou faitau atili i le auala e maua ai le fiafia ona o le foaʻi atu, i le Mataio 6:1-4; Luka 14:12-14; ma le 2 Korinito 9:7.