Tanielu 8:1-27

  • Se faaaliga i se mamoe poʻa ma se ʻoti poʻa (1-14)

    • Faasilisilia e se seu itiiti o ia lava (9-12)

    • Seʻia atoa afiafi ma taeao e 2,300 (14)

  • Faamatala e Kaperielu le uiga o le faaaliga (15-27)

    • Faamatala le uiga o le mamoe poʻa ma le ʻoti poʻa (20, 21)

    • Tulaʻi mai se tupu e mata paū (23-25)

8  O le tausaga lona tolu o le nofoaiga a le tupu o Pelesara,+ o aʻu o Tanielu, na faaali mai ai iā te aʻu se faaaliga, ina ua uma ona ou vaaia le faaaliga muamua.+  Na ou vaai i le faaaliga, ma a o oʻu vaavaai atu, ua ou iai i le nofoaga malupuipuia* i Susana,*+ i le itumalo o Elama;+ na ou vaai i le faaaliga, ua ou tū lata ane i le alāvai o Ulai.  Ina ua tepa aʻe oʻu mata, faauta! ua iai se mamoe poʻa+ ua tū i luma o le alāvai, ma e iai ona seu e lua.+ E uumi seu e lua, ae e umī le tasi i le isi, ma na mulimuli tupu aʻe le seu umī.+  Na ou vaai i le mamoe poʻa o sua i le itu i sisifo, i le itu i mātū ma le itu i saute, ma e leai se manufeʻai e mafai ona tū i luma o le mamoe poʻa, e leai foʻi sē e mafai ona laveaʻiina se tasi mai i lona malosi.*+ Ua ia faia e tusa ma lona loto, ma ua faamaualuga o ia.  A o oʻu vaavaai pea, faauta! o loo sau i luga o le fogāeleele uma se ʻoti poʻa+ mai i le itu i sisifo,* ae e lē paʻi i le eleele. O lenei ʻoti poʻa, ua iai se seu mataʻina i le vā o ona mata.+  Ua agaʻi atu i le mamoe poʻa ua iai ona seu e lua, lea na ou vaaia o tū i luma o le alāvai; ua tamoʻe atu i le mamoe poʻa ma lona ita tele.  Na ou vaaia le ʻoti poʻa ua latalata atu i le mamoe poʻa, ma ua matuā ʻinoʻino i le mamoe poʻa. Ua ia tuia le mamoe poʻa ma gaui ai ona seu e lua, ma ua leai se malosi o le mamoe poʻa e tetee atu ai iā te ia. Ua lafo e le ʻoti poʻa le mamoe poʻa i le eleele ma soli i lalo, ma ua leai se tasi e laveaʻiina le mamoe poʻa mai i lona malosi.*  Ona matuā faamaualuga lea o le ʻoti poʻa, ae ina ua oo ina malosi tele, ona gau lea o le seu telē; ua tutupu mai ai ni seu mataʻina se fā e sui aʻi, ua faasaga i matagi e fā o le lagi.+  Ua tupu mai i se tasi o ia seu, o le tasi seu itiiti, ma ua tupu tele lona malosi agaʻi i le itu i saute ma agaʻi i le itu i sasaʻe* ma agaʻi i le Laueleele Matagofie.+ 10  Ua tupu tele lona malosi ma ua oo atu lava i ʻautau o le lagi, ma ua faapogaia ai le paʻuʻū i le lalolagi o nisi o ʻautau ma nisi o fetu, ma ua ia solia i lalo i latou. 11  Ua oo lava i le Perenise o le ʻautau lona faamaualuga, ma ua aveese mai i le Perenise le taulaga e faia i aso uma, ua lafotūina foʻi le mea paia na Ia faia.+ 12  Ua tuuina atu iā te ia le ʻautau, faatasi ai ma le taulaga e faia i aso uma, ona o le solitulafono; ua faaauau ona ia lafoina le upu moni i le laueleele, ua gaoioi e tusa ma lona loto ma ua manuia ai. 13  Na ou faalogo i se tasi o le ʻaupaia o tautala, ma ua faapea atu se isi o le ʻaupaia i lē o loo tautala: “O le ā le umi e faaauau ai le faaaliga o le taulaga e faia i aso uma ma le solitulafono e faatafuna ai,+ faapea foʻi le tuua o le mea paia ma le ʻautau ia solia?” 14  Ua ia faapea mai iā te aʻu: “Seʻia atoa afiafi ma taeao e 2,300; ona toe faafoʻisia lea o le mea paia i le tulaga e tatau ona iai.” 15  O aʻu o Tanielu, a o oʻu vaai i le faaaliga ma saʻili ina ia malamalama i ai, na faafuaseʻi ona ou vaai i se tasi ua tū i oʻu luma e foliga mai o se tamāloa. 16  Ona ou faalogo lea i le leo o se tamāloa mai i totonu o Ulai,+ ua valaau mai e faapea: “Kaperielu e,+ ia e faamatalaina i lenā tagata le mea na ia vaaia.”+ 17  Ua sau o ia e lata i le mea o loo oʻu tū ai, ae ina ua sau o ia ona ou matuā fefe ai lea ma ou faapaʻū faō. Ua ia faapea mai iā te aʻu: “Le atalii e o le tagata, ia e malamalama, e taunuu le faaaliga i le taimi o le iʻuga.”+ 18  A o talanoa mai o ia iā te aʻu, ua ou moegase faō i le eleele. Ua ia tago mai iā te aʻu ma faatū aʻu i luga i le mea na ou tū ai muamua.+ 19  Ona ia faapea mai lea: “O lenei ou te faailoa atu iā te oe mea o le a tutupu i le faaiʻuga o le toʻasā, auā e tutupu i le taimi atofaina o le iʻuga.+ 20  “O le mamoe poʻa e lua ona seu na e vaai i ai, o le faatusa lea o tupu o Metai ma Peresia.+ 21  O le ʻoti poʻa taufulufulua e fai ma faatusa o le tupu o Eleni;+ ma o le seu telē o loo i le vā o mata e fai ma faatusa o le tupu muamua.+ 22  Talu ai ua gau lea seu, e tutū mai ai isi e fā e sui aʻi,+ e fā malo e tulaʻi mai ai mai i lona malo, ae e lē tusa lo latou malosi ma lona malosi. 23  “A oo i le faaiʻuga o lo latou malo, pe a uma* a latou solitulafono, ona tulaʻi mai lea o se tupu e mata paū ma e malamalama o ia i faamatalaga taufaasesē.* 24  O le a sili lona malosi, ae e lē o sona lava malosi. O le a ia aumaia le faafanoga tele, ma o le a manuia o ia i mea uma e na te faia. O le a ia faafanoina o ē e malolosi, atoa ma le nuu ua faia aʻe i le ʻaupaia.+ 25  O lona faaʻoleʻole e na te faaaogā ai faiga faapiʻopiʻo e taulau manuia ai; e faamaualuga e ia lona loto; e na te faafanoina le toʻatele i se taimi e saogalemu ai.* E tū atu foʻi o ia e faasagatau e oo lava i le Perenise o perenise, ae e faaumatia o ia ae e lē o lima o tagata e faia ai. 26  “O le mea sa taʻua i le faaaliga e faatatau i afiafi ma taeao, e moni lava, ae e ao ona e natia le faaaliga, auā e faatatau atu i se taimi o i luma.”*+ 27  A o aʻu o Tanielu, na ou matuā vaivai lava ma maʻi mo ni nai aso.+ Ona ou tū lea i luga ma fai le galuega mo le tupu;+ ae ua ou ofo tele ona o mea na ou vaai i ai, ma e leai se tasi ua malamalama i ai.+

Faamatalaga Pito i Lalo

Po o le “maota.”
Po o “Susa.”
Epe., “lima.”
Po o “i le itu e goto i ai le lā.”
Epe., “lima.”
Po o “le itu e oso a‘e ai le lā.”
Po o le “pe a gata.”
Po o “upu faigatā.”
Pe atonu “e aunoa ma se lapataʻiga.”
Po o “se taimi e mamao i le lumanaʻi.”