Salamo 73:1-28
O le pese a Asafo.+
73 E lelei lava le Atua iā Isaraelu, i ē e mamā o latou loto.+
2 A o aʻu, na toetoe ina a liliuese oʻu vae;Na toetoe foʻi ina a see oʻu vae.+
3 Auā na ou matauʻa i ē e faasausili,*Ina ua ou vaai i le filemu o tagata amioleaga.+
4 Auā e latou te lē lagona le tigā pe a feoti;E mālōlōina o latou tino.*+
5 E lē oo iā i latou faafitauli e pei o isi tagata,+Pe e mafatia e pei o isi tagata.+
6 O le mea lea ua fai ai ma o latou asoa le faasausili;+Ua fai foʻi ma o latou ofu le faasauā.
7 O lo latou tamaoaiga* ua lululu ai o latou mata;Ua sili atu mea ua latou maua nai lo o mea ua manatu i ai o latou loto.
8 Ua latou faatauemu ma tautatala i mea leaga.+
O lo latou faamaualuluga ua latou faamata‘u ai isi i faiga sauā.+
9 Ua oo atu i le lagi a latou upu faasausili,Ua feoaʻi foʻi o latou laulaufaiva ma le faatauemu i le lalolagi.
10 O le mea lea ua liliu atu ai ona tagata iā i latou,Ma ua latou feinu mai i o latou vai e tele.
11 Ua latou faapea ane: “E faapefea ona silafia mai e le Atua?+
Pe e silafia moni e le Silisili Ese mea uma?”
12 Ioe, o tagata amioleaga nei, ua toʻafilemu o latou olaga i taimi uma.+
Ua latou faateleina pea a latou ‘oa.+
13 E moni lava, e leai se aogā ua ou faamamā ai loʻu lotoMa fufulu oʻu lima e faailoa atu ai ou te mamā.+
14 Ua ou fetaia‘i ma faafitauli i le aso atoa,+Ua a‘oa‘ia foʻi aʻu i taeao uma.+
15 Ae pe ana ou tautala i nei mea,Semanū ua ou faaʻoleʻole i ou tagata.
16 Ina ua ou taumafai e malamalama i lenei mea,Sa ou atuatuvale ai
17 Seʻia oo ina ou ulufale i le afioaga paia o le Atua,Ma ou iloa ai lo latou lumanaʻi.
18 E moni lava, ua e tuuina atu i latou i le mea maseesee.+
Ua e faapaʻuʻū i latou i le fanoga.+
19 Auē! Ua faafuase‘i ona faafanoina i latou.+
Auē! Ua faafuase‘i ma tugā lo latou iʻuga.
20 E pei o se miti pe a alafaʻi mai, Ieova e,Pe a e maleifua mai, e te teena* lo latou faatusa.
21 Ae na ou lotovaivai+Ma matuā tigā ai oʻu faalogona.*
22 Ou te le‘i mafaufau lelei, ma ou te leʻi iloaina foʻi;Sa pei a‘u o se manu e leai se mafaufau i ou luma.
23 A o lenei ua ou faatasi pea ma oe;Ua e taofia loʻu lima taumatau.+
24 Ua e taʻitaʻia aʻu i lau fautuaga,+Mulimuli ane, e te ta‘ita‘ia atu aʻu i le mamalu.+
25 O ai ea se isi i le lagi e fesoasoani mai iā te a‘u?
E leai foʻi se tasi ou te naunau i ai i le lalolagi, ua na o oe.+
26 E ono vaivai loʻu tino ma loʻu loto,Ae o le Atua o le papa o loʻu loto ma loʻu tofi e faavavau.+
27 E moni, e fano i latou e taumamao mai iā te oe.
E te faaumatia* i latou uma o ē e amio lē mamā* ua tuua oe.+
28 A o aʻu nei, ou te faalatalata atu i le Atua ou te lelei ai.+
Ou te faia le Alii Pule Silisili Ese o Ieova ma o‘u sulufa‘iga,Ina ia folafola atu au galuega uma lava.+
Faamatalaga Pito i Lalo
^ Po o le “mitamitavale.”
^ Po o le “Ua puputa o latou manava.”
^ Po o le “puputa.” Epe., “o latou gaʻo.”
^ Epe., “inosia.”
^ Epe., “oʻu fatugaʻo.”
^ Epe., “faafilemu.”
^ Po o le “lē faamaoni.”
