Salamo 64:1-10
-
Puipuiga mai i osofaʻiga faalilolilo
-
“E fana e le Atua i latou” (7)
-
I le faatonu o le ʻaufaimusika. O le pese a Tavita.
64 Le Atua e, ia e faafofoga mai i loʻu leo a o o‘u ‘ai‘oi atu.+
Ia e leoleomalu i loʻu ola mai i mea mataʻutia a le fili.
2 Ia e puipuia aʻu mai i faufauga faalilolilo a ē e amioleaga,+Ma le motu o tagata e faia mea sesē.
3 Ua faamaʻai o latou laulaufaiva e pei o se pelu;Ua taʻi a latou upu oona e pei o aū,
4 E fana atu i sē e lē sala mai i mea o lalafi ai;E faafuaseʻi ona latou fana atu iā te ia e aunoa ma le fefefe.
5 Ua latou taofimau i a latou faufauga leaga;*Ua latou talatalanoa i auala e natia ai a latou mailei.
Ua latou faapea ifo: “O ai e na te iloaina?”+
6 Ua latou saʻilia auala fou e faia ai mea sesē;Ua latou fafau faalilolilo a latou togafiti ua fuafuaina lelei;+O manatu foʻi o tagata taʻitoʻatasi i o latou loto ua suʻegatā lava.
7 Ae e fana e le Atua i latou;+E faafuaseʻi ai ona latou manunuʻa i se aū.
8 E latou te lavevea i a latou lava upu;+E lūlū foʻi ulu o i latou uma e vaavaai atu iā i latou.
9 Ona fefefe ai lea o tagata uma,Ma latou ta‘uta‘u atu ai le mea ua faia e le Atua,Ma latou malamalama ai i ana galuega.+
10 E olioli lē e amiotonu iā Ieova ma sulufaʻi atu iā te ia;+E olioli* foʻi o ē uma e saʻo o latou loto.
Faamatalaga Pito i Lalo
^ Po o le “Ua faalaeiau e le tasi le isi e faia mea leaga.”
^ Po o le “mitamita.”
