Salamo 41:1-13
I le faatonu o le ʻaufaimusika. O le pese a Tavita.
41 E fiafia o lē e faaalia le magafagafa i lē ua faatauvaa;+E lavea‘i e Ieova o ia i le aso o le puapuaga.
2 E leoleoina o ia e Ieova ma faaola iā te ia.
E taʻua o ia o lē e fiafia i le lalolagi;+E te lē tuuina atu lava o ia i le mana‘o o ona fili.+
3 E tausia o ia e Ieova i luga o lona moega a o maʻi o ia;+E te suia foʻi lona moega uma lava a o maʻi o ia.
4 Auā ou te faapea atu: “Ieova e, ia e alofa mai iā te aʻu.+
Ia e faamālōlōina aʻu,+ auā ua ou agasala iā te oe.”+
5 Ae ua fai e oʻu fili tala leaga e faatatau iā te aʻu:
“O afea e oti ai o ia ma mou atu ai lona igoa?”
6 Afai e sau se tasi o i latou e vaai aʻu, e tautala mai lona loto i mea pepelo.
E vaavaai o ia i se mea e faatigā ai aʻu;Ona alu atu lea o ia i fafo ma faasalalau atu.
7 Ua femusuaʻi i latou uma o ē e ita mai iā te aʻu;Ua latou faufau se mea leaga faasaga iā te aʻu:
8 “Ua oo se mea matuā leaga iā te ia;O lenei ua taoto o ia, e lē toe tulaʻi lava.”+
9 E oo fo‘i i le tagata na ma uō, o lē na ou faatuatuaina,+O lē na ʻai i aʻu meaʻai, ua ia aa mai iā te aʻu i lona mulivae.*+
10 A o oe Ieova e, ia e alofa mai ma faatulaʻi iā te aʻu,Ina ia ou toe taui atu ai iā i latou.
11 O le mea lenei ou te iloa ai ua e fiafia mai iā te aʻu:
Pe a lē mafai ona alaga fiafia loʻu fili ona o aʻu.+
12 A o a‘u nei, ua e taofia aʻu ona o loʻu faamaoni;+E te faatūina aʻu i ou luma e faavavau.+
13 Tau ina ia viia Ieova le Atua o IsaraeluSe‘ia oo lava i le faavavau.*+
Amene ma Amene.
Faamatalaga Pito i Lalo
^ Po o le “ua ia faasagatau mai iā te aʻu.”
^ Po o le “E mai i le vavau e oo i le faavavau.”
