Salamo 26:1-12
O le salamo a Tavita.
26 Ieova e, ia e faamasino mai iā te aʻu auā ua ou savali ma loʻu faamaoni;+Ou te faatuatua iā Ieova, ou te lē tautevateva ai.+
2 Ieova e, ia e suʻesuʻeina aʻu ma ia e tofotofo iā te aʻu;Ia e faamamāina foʻi oʻu manatunatuga loloto* ma loʻu loto.+
3 Auā ua iai pea i oʻu luma lou alofa faamaoni,Ma ua ou savali i lau upu moni.+
4 Ou te lē faifaimea* faatasi ma tagata taufaasesē,+Ma ou te ‘alofia tagata taufaaʻoleʻole.*
5 Ou te ʻinoʻino i le faapotopotoga o ē e fai mea leaga,+Ou te lē fia faifaimea* faatasi foʻi ma tagata amioleaga.+
6 Ou te fafano oʻu lima ina ia iloa ai ua ou lē sala,Ieova e, ou te savali faataamilo foʻi i lou fata faitaulaga,
7 Ina ia lagona ai le leo o aʻu faafetai,+Ma faalauiloa atu ai au galuega ofoofogia uma.
8 Ieova e, ou te fiafia i le fale o loo e afio ai,+O le mea o loo iai lou mamalu.+
9 Aua e te tafiesea aʻu faatasi ma tagata agasala+Pe aveesea loʻu ola faatasi ma tagata sauā,*
10 O ē o loo faia i o latou lima amioga matagā,Ma ē o loo tutumu o latou lima taumatau i faiga faatogafalea.
11 A o aʻu, ou te savali ma loʻu faamaoni.
Ia e laveaʻi* iā te aʻu ma ia e finagalo malie mai iā te aʻu.
12 E tū oʻu vae i le mea laugatasi;+Ou te vivii atu iā Ieova i totonu o le faapotopotoga tele.+
Faamatalaga Pito i Lalo
^ Po o “oʻu faalogona loloto.” Epe., “oʻu fatugaʻo.”
^ Epe., “nofo.”
^ Po o “ē e natia o latou tulaga moni.”
^ Epe., “Ou te lē nofo.”
^ Po o “tagata faamasaatoto.”
^ Epe., “faaola.”
