Salamo 18:1-50
I le faatonu o le ʻaufaimusika. O le salamo a le auauna a Ieova, o Tavita, o lē na fai atu iā Ieova upu o lenei pese, i le aso na laveaʻiina ai o ia e Ieova mai i lima o ona fili uma ma le lima o Saulo. Ua ia faapea atu:+
18 Ieova e, loʻu malosi, ou te alofa lava iā te oe.+
2 O Ieova o loʻu papa, o loʻu ʻolo malosi, ma o Lē e lavea‘iina a‘u.+
O loʻu Atua o loʻu papa+ lea ou te sulufaʻi i ai,O loʻu talita ma le nifo* o loʻu faaolataga,* o loʻu sulufaʻiga malupuipuia.*+
3 Ou te valaau atu iā Ieova, o lē e ao ona viia,Ona faaolaina lea o aʻu mai i oʻu fili.+
4 Na siʻosiʻomia aʻu e maea o le oti;+Na ou atuatuvale i tafega malolosi a tagata lē aogā.+
5 Na siʻomia aʻu e maea o le Tuugamau;*Na faafetaiaʻia aʻu e mailei o le oti.+
6 Na ou valaau atu iā Ieova i loʻu puapuaga,Na ou valaau atu pea i loʻu Atua mo se fesoasoani.
Na faafofoga mai o ia i loʻu leo mai i lona malumalu,+Na faafofoga mai foʻi o ia i laʻu alaga atu mo se fesoasoani.+
7 Ona lūlūina lea ma gatete le lalolagi;+Na maluelue faavae o mauga,Na lūlūina pea ona o lona toʻasā.+
8 Na alu aʻe le asu mai i ona pogaʻiisu,Na sau mai i lona fofoga le afi e faaumatia ai;+Na mumū mai iā te ia o malala ola.
9 Na ia loloʻu ifo le lagi a o ia alu ifo,+Na i lalo foʻi o ona vae le ao mafiafia.+
10 Na tiʻetiʻe mai o ia i luga o le kerupi o loo lele mai.+
Na lele faavave mai o ia i luga o apaʻau o se agelu.*+
11 Ona ia ufitia lea o ia i le pōuliuli,+E siʻomia ai o ia e pei o se faleʻie,O vai pōuliuli ma ao mafiafia.+
12 Ua susulu le malamalama i ona lumaMa ua toʻulu mai i ao le uatoʻa ma malala ola.
13 Ona faapā lea e Ieova o le faititili i le lagi;+Ua lagona foʻi le tulei mai o le siʻufofoga o le Silisili Ese+Ma ua toʻulu ifo le uatoʻa ma malala ola.
14 Na ia fana mai ana aū ina ia faataapeape ai i latou;+Na ia faaemo mai ana uila ina ia faafenuminumiaʻi ai i latou.+
15 Ua aliali mai le ilitivai;*+Ua faaalia faavae o le laueleele ona o lau aʻoaʻiga, Ieova e,Ma le mānava o ou pogaʻiisu.+
16 Na ia faaloaloa lona aao mai i le mea maualuga;Na ia tago mai ma ave aʻe aʻu mai i vai loloto.+
17 Na ia laveaʻiina aʻu mai i loʻu fili malosi,+Mai i ē e feita iā te aʻu, o ē e malolosi atu iā te aʻu.+
18 Na latou faafetaiaʻia aʻu i le aso o loʻu malaia,+A o Ieova na lagolago mai iā te aʻu.
19 Na ia aumaia aʻu ma tuu i se mea saogalemu;*Na ia faasaoina aʻu auā ua ia fiafia iā te aʻu.+
20 Ua tauia aʻu e Ieova e tusa ma laʻu amiotonu;+Ua ia tauia foʻi aʻu e tusa ma oʻu lima mamā.+
21 Auā ua ou tausia ala o Ieova,Ou te leʻi faia foʻi se mea leaga i loʻu tuulafoaʻia o loʻu Atua.
22 Ua i oʻu luma ana faamasinoga uma;Ou te lē manatu māmā i ana tulafono.
23 O le a tumau ona ou lē ponā i ona luma,+Ou te lē faia foʻi se mea sesē.+
24 Ia tauia aʻu e Ieova e tusa ma laʻu amiotonu,+E tusa ma oʻu lima mamā i ona luma.+
25 E te faamaoni i le tagata faamaoni;+E lē ponā au feutagaʻiga ma le tagata e lē ponā;+
26 E te amio mamā i le tagata e amio mamā,+Ae e te faautauta i le tagata faapiʻopiʻo.+
27 Auā e te faaolaina tagata faatauvaa*+Ae e te faamaulaloina ē e faamaualuluga.*+
28 Auā o oe, Ieova e, e te tutuina loʻu molī,O loʻu Atua o lē e faamalamalamaina loʻu pōuliuli.+
29 O lau fesoasoani ua mafai ai ona ou tetee i le ʻau e faoa mea;+O le mana o le Atua ua mafai ai ona ou aʻea le pā.+
30 E lelei atoatoa le ala o le Atua moni;+Ua faamamāina le afioga a Ieova.+
O le talita o ia i ē uma e sulufaʻi atu iā te ia.+
31 Auā o ai se Atua e ese mai iā Ieova?+
O ai foʻi se papa e ese mai i lo tatou Atua?+
32 O le Atua moni e na te fusia aʻu i le malosi,+E na te faia foʻi loʻu ala ia lelei atoatoa.+
33 E na te faia oʻu vae e pei o vae o se ʻaila;E na te faatūina aʻu i mea maualuluga+ ou te lē gafatia.
34 E na te aʻoaʻo oʻu lima mo le taua;Ua loloʻu foʻi e oʻu lima se ʻaufana ʻapamemea.
35 E te tuuina mai iā te aʻu lau talita o le faaolataga,+O lou lima taumatau e lagolagoina* ai aʻu,O lou agamalu* foʻi ua faasilisiliina ai aʻu.+
36 Ua e faalautele le mea ou te savali ai;E lē see foʻi oʻu vae.*+
37 Ou te tuliloa oʻu fili ina ia ou maua i latou;Ou te lē foʻi mai seʻia faaumatia i latou.
38 Ou te nutililii i latou ina ia lē mafai ona toe tutū i luga;+E latou te paʻuʻū foʻi i lalo o oʻu vae.
39 E te faaauupegaina aʻu i le malosi mo le taua;E te faia foʻi oʻu fili ia paʻuʻū i lalo.+
40 E te faia oʻu fili ina ia sosola ese mai iā te aʻu,*Ou te faaumatia* foʻi o ē e ita mai iā te aʻu.+
41 E latou te alalaga mo se fesoasoani, ae e leai sē e faaolaina i latou;E alalaga atu foʻi iā Ieova, ae e lē tali mai o ia iā i latou.
42 Ou te tuʻininiia i latou e pei o le pefu i le matagi;Ou te sasaaina atu i latou e pei o le palapala o le auala.
43 E te laveaʻiina aʻu mai i le nuu vaavaai masei.+
E te tofia aʻu ia avea ma ulu o atunuu.+
E auauna mai foʻi iā te aʻu se nuu ou te leʻi iloaina.+
44 E usiusitaʻi i latou iā te aʻu ona o le tala ua faalogo i ai;E ō mai ma le gatete tagata ese i oʻu luma.+
45 E mou atu le lototele o tagata ese;E latou te ō mai ma le gatete mai i mea e puipuia ai i latou.
46 O loo soifua Ieova! Ia viia loʻu Papa!+
Ia faaeaina foʻi le Atua o loʻu faaolataga.+
47 E faia e le Atua moni le tauimasui mo aʻu;+E na te faatoʻilaloina tagata iā te aʻu.
48 E na te laveaʻi aʻu mai i oʻu fili ua feita mai;E te faaeaina aʻu e sili i ē e osofaʻia aʻu;+E te laveaʻiina foʻi aʻu mai i le tagata faasauā.
49 Ieova e, o le mea lea ou te faaneenee atu ai iā te oe i luma o atunuu,+Ou te usuina foʻi viiga* i lou suafa.+
50 E na te faia galuega tetele o le faaolataga* mo lana tupu;+E alofa faamaoni o ia i lē ua ia faauuina,+Iā Tavita ma lana fanau e oo i le faavavau.+
Faamatalaga Pito i Lalo
^ Tagaʻi i le Uiga o Upu.
^ Po o “ma loʻu faaola malosi.”
^ Po o le “ʻolo malupuipuia.”
^ Po o “Seoli.” Tagaʻi i le Uiga o Upu.
^ Po o “le matagi.”
^ Po o “alāvai.”
^ Po o “se mea lautele.”
^ Po o “tagata ua mafatia.”
^ Epe., “fia matamuamua.”
^ Epe., “faamaulalo.”
^ Po o le “tausia.”
^ Po o “tapuvae.”
^ Po o le “E te tuuina mai iā te aʻu tua o oʻu fili.”
^ Epe., “faafilemu.”
^ Po o le “tā ma usuina pese.”
^ Po o le “faia manumalo tetele.”
