Sakaria 4:1-14
4 Ua foʻi mai le agelu sa ma talanoa ma fafagu iā te aʻu, e pei o loo fafagu i se tagata sa moe.
2 Ona ia faapea mai lea iā te aʻu: “O ā mea ua e vaaia?”
Ona ou faapea atu lea: “Ua ou iloa, faauta! o le tuugāmolī e auro uma,+ ua iai le ipu faaofuofu i ona luga. O loo iai molī e fitu i luga o le tuugāmolī,+ ioe, e fitu lava, ma ua iai paipa e fitu i molī o loo i luga o le tuugāmolī.
3 E lua laau o le olive i tala ane o le tuugāmolī,+ o le tasi i le itu taumatau o le ipu faaofuofu, ma le isi i le itu tauagavale.”
4 Ona ou fesili atu lea i le agelu o loo ma talanoa: “Loʻu alii e, o le ā le uiga o ia mea?”
5 Ua fesili mai le agelu o loo ma talanoa: “Pe e te lē iloa ea le uiga o nei mea?”
Ua ou tali atu: “Loʻu alii e, e leai.”
6 Ona ia faapea mai lea iā te aʻu: “O le afioga lenei a Ieova iā Serupapelu: ʻ“E lē o ʻautau, e lē o le malosi,+ a o loʻu agaga,”+ ua fetalai mai ai Ieova o ʻau.
7 Le mauga tele e, o ai ea oe? E fai oe ma laueleele laugatasi+ i luma o Serupapelu.+ O le a ia aumaia le maa pito i luga a o latou alalaga atu: “Maʻeu le matagofie! Maʻeu le matagofie!”’”
8 Ua toe oo mai le afioga a Ieova iā te aʻu, e faapea:
9 “Ua faataatia e lima o Serupapelu le faavae o lenei fale,+ ma o le a faaumaina e ona lava lima le fale.+ E tou te iloa ai, na auina mai aʻu iā te outou e Ieova o ʻau.
10 Auā o ai ua ʻinoʻino i le aso o se amataga faatauvaa?*+ Auā e latou te olioli ma vāai atu i le fua e tautau* i le lima o Serupapelu. O ia mata e fitu o fofoga o Ieova, ia o loo fetaufetuliaʻi i le lalolagi uma.”+
11 Ona ou fesili atu lea iā te ia: “O le ā le uiga o laau olive e lua ia o loo i le itu taumatau ma le itu tauagavale o le tuugāmolī?”+
12 Ona ou toe fesili faalua atu lea iā te ia: “O le ā le uiga o lālā e lua o laau olive, ia o loo liligi mai ai le suāuu auro e ala i faagaʻau auro e lua?”
13 Ua ia fesili mai iā te aʻu: “Pe e te lē iloa ea le uiga o nei mea?”
Ona ou tali atu lea: “Loʻu alii e, e leai.”
14 Ona ia faapea mai lea: “O tagata e toʻalua nei ua faauuina, o ē o loo tutū i autafa o le Alii o le lalolagi uma.”+
