Ruta 1:1-22
1 I aso a o faia e faamasino+ o faamasinoga, na oo ai se oge i le nuu, ona alu atu lea o se tamāloa mai i Peteleema+ i Iuta e aumau ai o se tagata ese i fanua* o Moapi,+ o ia, o lana avā, ma ona atalii e toʻalua.
2 O Elimeleka* le igoa o le tamāloa, o Naomi* le igoa o lana avā, ma o igoa foʻi o ona atalii e toʻalua o Maalona* ma Kiliona,* o tagata Efarata mai i Peteleema i Iuta. Ona latou ō atu lea i fanua o Moapi ma nonofo ai i inā.
3 Ina ua mavae sina taimi, ona oti ai lea o Elimeleka le tane a Naomi, ae ua totoe ai na o ia ma lana fanau tama e toʻalua.
4 Mulimuli ane, ona faiavā lea o tama i fafine Moapi. O le igoa o le tasi o Orepa, a o le igoa o le isi o Ruta.+ Ua latou nonofo ai pea i inā pe tusa ma le sefulu tausaga.
5 Ona feoti ai foʻi lea o Maalona ma Kiliona, ua totoe ai na o le fafine, ua leai lana fanau e toʻalua ma lana tane.
6 Ona filifili lea o ia e toe foʻi i lona nuu faatasi ma avā a lana fanau, ma ō ese mai i fanua o Moapi, auā na ia faalogo a o iai i Moapi, ua liuliualo Ieova i lona nuu ma foaʻi atu meaʻai* iā i latou.
7 Ona alu ese lea o ia mai i le mea na nonofo ai ma avā a lana fanau. A o latou savavali i le ala e toe foʻi i le nuu o Iuta,
8 ona fai mai lea o Naomi i avā a lana fanau: “Inā ō ia, ia ta‘itasi ma toe foʻi atu i le aiga o lona tinā. Tau ina ia alofa faamaoni Ieova iā te oulua,+ e pei ona oulua faia i a oulua tane ua feoti, atoa foʻi ma aʻu.
9 Ia foaʻi atu e Ieova iā te oulua ni tane, ina ia oulua maua ai le mapusaga.”+ Ona sogi atu lea o ia iā i laʻua, ma ua latou fetagisi leotetele.
10 Ua la fai atu pea iā te ia: “E leai, e tatou te ō ma oe i lou nuu.”
11 Ae ua fai mai Naomi: “Inā toe foʻi atu ia laʻu fanau e. Aiseā e lua te ō ai ma aʻu? Pe e mafai ona ou toe fanauina ni tama e avea ma a oulua tane?+
12 Inā toe foʻi ia, laʻu fanau e, auā ua ou loomatua, e lē mafai ona ou toe nofotane. E tusa po ou te faamoemoe e maua sa‘u tane i le pō nei ma maua ai sa‘u fanau tama,
13 pe e lua te faatali pea ea seʻia matutua i laʻua? Pe e lua te nonofofua pea ea e lē faia ni a oulua tane? E leai laʻu fanau e, ua ou tigā tele pe a ou mafaufau iā te oulua, auā ua oo mai iā te aʻu le aao o Ieova.”+
14 Ua latou toe fetagisi leotetele, ona sogi atu lea o Orepa i le tinā o lana tane, ma alu. Ae ua pipii atu pea Ruta iā Naomi.
15 Ona ia fai mai lea: “Faauta! Ua toe foʻi le avā a le uso o lau tane i lona nuu ma ona atua. Inā toe foʻi ia faatasi ma ia.”
16 Ae ua fai atu Ruta: “Aua e te tauanau mai iā te aʻu ina ia ou tuua oe, ia ou lē mulimuli atu iā te oe; auā o le mea e te alu i ai, ou te alu fo‘i i ai, o le mea e te moe ai i le pō, ou te moe ai foʻi i le pō. O lou nuu e fai ma oʻu nuu, ma o lou Atua, o loʻu Atua foʻi lea.+
17 O le mea e te oti ai, ou te oti ai, e tanu ai foʻi aʻu. Ia matuā faasala a‘u e Ieova* pe afai e iai se mea e tuueseeseina ai i taʻua, seʻi vaganā le oti.”
18 Ina ua iloa e Naomi e lē suia lava le manatu o Ruta e ō faatasi ma ia, ona ia lē toe tauanau atu lea iā te ia.
19 Ua la ō pea i lo la ala seʻia oo i Peteleema.+ Ina ua la oo i Peteleema, ona vāvāō ai lea o le aai atoa ona o i laʻua, ua faapea ane fafine: “Po o Naomi ea lenei?”
20 Ae ua ia fai atu i fafine: “Aua neʻi taʻua aʻu o Naomi.* Ia taʻua aʻu o Mara,* auā ua matuā oona mea ua faia e Lē e ona le malosi uma lava iā te aʻu.+
21 Na ou tamaoaiga ina ua ou alu ese, ae ua ou mativa ina ua toe faafo‘i mai aʻu e Ieova. Aiseā e tou te taʻua ai aʻu o Naomi, ae ua teena a‘u e Ieova, ma ua faapuapuagatia aʻu+ e Lē e ona le malosi uma lava?”
22 O le tala lenei i le auala na tuua ai e Naomi fanua o Moapi,+ ma toe fo‘i i lona nuu faatasi ma Ruta le fafine Moapi, o le avā a lana tama. Ua la ō mai i Peteleema i le amataga o le seleselega o karite.*+
Faamatalaga Pito i Lalo
^ Po o “i le vaipanoa.”
^ Lona uiga “Loʻu Atua o le Tupu.”
^ Lona uiga “Loʻu Fiafia.”
^ Atonu e maua mai i se upu Eperu o lona uiga “faasolo ina vaivai; ua maʻi.”
^ Lona uiga “Sē ua Vaivai; Sē ua Lata Ina Oti.”
^ Epe., “falaoa.”
^ Epe., “Ia faapea ona faia e Ieova iā te aʻu ma faaopoopo i ai.”
^ Lona uiga “Loʻu Fiafia.”
^ Lona uiga “Oona.”
^ O se isi ituaiga saito. O le upu Peretania, o le barley.
