O le Tusi i le Faapotopotoga i Roma 11:1-36
11 O lea, ou te fesili atu ai, pe na teena ea e le Atua ona tagata?+ E leai lava! Auā o aʻu foʻi o le Isaraelu, o le fanau a Aperaamo, e mai i le ituaiga o Peniamina.
2 E leʻi teena e le Atua ona tagata, o ē na ia muaʻi uaʻi atu i ai.+ Pe e tou te leʻi iloa ea le mea ua tusia i tusitusiga paia e faatatau iā Elia, ina ua ia faitio iā Isaraelu i luma o le Atua?
3 Na ia faapea atu: “Ieova* e, ua latou fasiotia au perofeta, ua latou elia ou fata faitaulaga, ae e na o aʻu lava ua totoe, ma o loo latou saʻili e fasioti iā te aʻu.”+
4 Ae o le ā le tali mai a le Atua iā te ia? “Ua ou faatotoeina le toʻa 7,000 o tamāloloa mo aʻu, o ē e leʻi tootutuli iā Paala.”+
5 O lenei, ua faapea foʻi i le taimi nei, ua iai se vaega totoe+ o ē ua filifilia e tusa ma le agalelei faifua.
6 Afai e faia lenei mea ona o le agalelei faifua,+ e lē toe faia ona o galuega;+ ana lē faia faapea, semanū e lē toe avea ai le agalelei faifua ma agalelei faifua.
7 Ae faapefea la? E leʻi maua e Isaraelu le mea na latou naunau e saʻilia, ae na maua e ē ua filifilia.+ Ae ua maaa loto o isi uma,+
8 e pei ona tusia: “Ua tuuina atu e le Atua iā i latou le agaga e moegase ai,+ o mata e lē vāai ai, o taliga e lē faalogo ai, ua oo mai lava i le aso nei.”+
9 Ua faapea mai foʻi Tavita: “Ia avea la latou laoai ma mailei, ma matāsele, ma mea e tausuai ai, ia fai foʻi ma taui iā i latou.
10 Ia faapogisaina o latou mata ina ia lē mafai ai ona vāai, ma ia faanoʻunoʻu pea o latou tua.”+
11 O lea la ou te fesili atu ai, Pe na tausuai ea i latou, ma paʻuʻū ua lē mafai ai ona toe tutū? E mautinoa e leai! Ae o la latou solitulafono ua maua ai e tagata o nuu ese le faaolataga, ina ia faatupu ai iā i latou le fuā.+
12 Afai o la latou solitulafono ua oo ina tamaoaiga ai le lalolagi, ma o le faaitiitia o i latou ua tamaoaiga ai tagata o nuu ese,+ e atili ai ona tamaoaiga ona o le aofaʻiga atoa o i latou!
13 O lenei, ou te tautala atu iā te outou tagata o nuu ese. Talu ai o aʻu o le aposetolo o nuu ese,+ ou te faamamaluina* laʻu faiva+
14 ina ia iloa pe mafai ona ou faatupu le fuā i oʻu tagata, ma faaolaina nisi o i latou.
15 Auā afai o le lafoaʻiina o i latou+ ua faia ai se leleiga mo le lalolagi, po ua lē maua ai ea le ola mai i le oti ona o le taliaina o i latou?
16 Afai foʻi e paia le vaega muamua o le paluga, o uluaʻi fua ia, e paia foʻi le paluga atoa; ma afai e paia le aa, e paia foʻi lālā.
17 Peitaʻi, afai ua gauia ese nisi o lālā, ma o oe, e ui o le olive vao, ae ua faapipiiina atu iā i latou, ona tofusia faatasi ai lea i le tele o mea lelei mai i le aa o le olive,
18 aua le faasausili* i lālā. Ae afai ua e faasausili* i lālā,+ ia manatua e lē o oe ua ola ai le aa, a o le aa ua e ola ai.
19 E te ono faapea mai: “Ae ua gauia ese lālā ina ia faapipii atu i ai aʻu.”+
20 E moni! Ona o lo latou lē faatuatua, ua gauia ese ai i latou,+ ae ua e tumau ona o le faatuatua.+ Aua e te faamaualuga, ae ia e mataʻu.
21 Auā afai e leʻi faasaoina e le Atua lālā moni, e na te lē faasaoina foʻi oe.
22 O lea, ia manatu i le agalelei+ ma le faasalaga a le Atua. E faasalaina i latou e paʻuʻū ese,+ ae e te maua le agalelei o le Atua, pe afai e te tumau i lona agalelei; a lē faia faapea, e salaeseina foʻi oe.
23 E faapea foʻi i latou, afai e toe faatuatua, e toe faapipiiina i ai,+ auā e mafai e le Atua ona toe faapipiiina i latou.
24 Auā afai e salaeseina oe mai i le olive vao, ma faapipiiina i le olive moni na totō e ui e lē o se faiga e masani ai, e sili atu la ona faapipiiina lālā moni i lo latou lava laau olive!
25 Le ʻauuso e, ou te manaʻo ina ia outou iloa lenei mea lilo paia,+ ina ia aua neʻi o outou faafiapopoto: Ua faamaaaina loto o nisi o tagata Isaraelu, seʻia ō mai i totonu le aofaʻiga atoa o tagata o nuu ese,
26 ma o le auala lenei e faaolaina ai Isaraelu uma.+ E pei ona tusia: “E sau mai i Siona+ le faaola, ma faateʻaeseina amioga leaga mai i le fanauga a Iakopo.
27 O laʻu feagaiga lenei ua faia ma i latou,+ pe a ou aveesea a latou agasala.”+
28 E moni, ona o le tala lelei ua avea ai i latou ma fili mo lo outou lelei; ae ona o le filifiliga a le Atua, ua alofagia ai i latou ona o o latou augātamā.+
29 Auā e lē salamō lava le Atua i ana meaalofa ma lana valaau.
30 E pei ona sa outou lē usiusitaʻi muamua i le Atua,+ ae ua maua nei le alofa mutimutivale+ ona o lo latou lē usiusitaʻi,+
31 o le lē usiusitaʻi foʻi o i latou nei, ua iʻu ai ina outou maua le alofa mutimutivale, ua mafai ai foʻi ona maua e i latou nei le alofa mutimutivale.
32 Auā ua taofia faatasi e le Atua i latou uma i le lē usiusitaʻi,+ ina ia mafai ai ona ia alofa mutimutivale iā i latou uma.+
33 Maʻeu le tele o le tamaoaiga, ma le atamai atoa ma le silafaga a le Atua! E lē masuʻesuʻeina ana faamasinoga, ma e lē mafai ona malamalama atoatoa i ona ala!
34 Auā “po o ai ua na iloa le finagalo o Ieova,* o ai foʻi na te fautuaina o ia?”+
35 Po “o ai foʻi na muaʻi foaʻi atu se mea iā te ia, ina ia toe totogi mai iā te ia?”+
36 Auā e mai iā te ia, ma e ala iā te ia, e iʻu atu foʻi iā te ia mea uma lava. Ia iā te ia le mamalu e oo i le faavavau. Amene.
Faamatalaga Pito i Lalo
^ Po o le “faasilisilia.”
^ Po o le “mitamitavale.”
^ Po o le “mitamitavale.”
