Numera 35:1-34
35 Ua fetalai mai Ieova iā Mose i le fanua laugatasi o le toafa o Moapi, e lata ane i Ioritana+ e faafesagaʻi ma Ieriko, ua faapea mai:
2 “Ia poloaʻi atu i le fanauga a Isaraelu, e ao ona latou avatu i le ʻau sa Levī ni aai mai i o latou tofi ina ia latou nonofo ai,+ ma e ao foʻi ona latou avatu i le ʻau sa Levī o fanua e aai ai lafumanu, ia ua siʻomia ai aai.+
3 E latou te nonofo i ia aai, a o fanua e aai ai lafumanu e mo a latou lafumanu, o a latou fale manu, ma isi a latou manu uma.
4 O fanua e aai ai lafumanu ia e siʻomia ai aai, e tou te avatu i le ʻau sa Levī, e amata mai i le pā e oo i le mea e gata mai ai, e 1,000 kupita.*
5 Ia outou fuatia fafo o le aai i le itu i sasaʻe e 2,000 kupita, o le itu i saute e 2,000 kupita, o le itu i sisifo e 2,000 kupita, ma le itu i mātū e 2,000 kupita, ae e iai i le ogatotonu le aai. E fai ia ma laufanua e aai ai lafumanu o o latou aai.
6 “O aai e tou te avatu i le ʻau sa Levī e 6 aai o sulufa‘iga,+ ia e tou te avatu ina ia sola atu i ai le tagata fasioti tagata paʻivalea,+ atoa ma isi aai e 42.
7 E 48 le aofa‘i o aai e tou te avatu i le ʻau sa Levī, atoa ai ma fanua e aai ai lafumanu.+
8 O aai tou te avatu e mai i tofi o le fanauga a Isaraelu.+ O ituaiga e to‘atele e tou te aumaia ai aai e tele, a o ituaiga e to‘aitiiti e itiiti aai tou te aumaia ai.+ E avatu e ituaiga taʻitasi nisi o o latou aai mo le ‘au sa Levī e tusa ma tofi ua latou mauaina.”
9 Ua fetalai mai pea Ieova iā Mose e faapea:
10 “Ia e fai atu i le fanauga a Isaraelu, ma faapea atu iā i latou, ‘O le a outou sopoʻia Ioritana e agaʻi atu i le laueleele o Kanana.+
11 E ao ona outou filifilia aai e talafeagai mo outou ina ia fai ma aai o sulufaʻiga, ma e sola atu i ai le fasioti tagata, o lē na fasioti tagata paʻivalea.*+
12 E fai foʻi ia aai ma sulufaʻiga iā te outou mai i le tagata e tauimasui i le toto,+ ina neʻi oti le fasioti tagata paʻivalea a o leʻi tū o ia i luma o le faapotopotoga e faamasinoina ai.+
13 O le fuafuaga lenā o aai o sulufaʻiga e ono ia tou te tuuina atu.
14 E tolu aai e tou te tuuina atu i lenei itu o Ioritana,+ e tolu foʻi aai e tou te tuuina atu i le laueleele o Kanana+ e fai ma aai o sulufaʻiga.
15 E fai na aai e ono ma aai o sulufaʻiga mo le fanauga a Isaraelu, mo le tagata ese,+ ma lē e aumau ma i latou, ina ia sola atu i ai so o se tagata fasioti tagata paʻivalea.+
16 “‘Peitaʻi, afai e na te tāina se tagata i se mea ua faia i le uʻamea ma oti ai, o le fasioti tagata o ia. Ia fasiotia lava le fasioti tagata.+
17 Afai na te tuʻi o ia i se maa lea e mafai ona oti ai ma e oti ai lava, o le fasioti tagata o ia. Ia fasiotia lava le fasioti tagata.
18 Afai e na te tāina o ia i se laau lea e mafai ona oti ai ma e oti ai lava, o le fasioti tagata o ia. Ia fasiotia lava le fasioti tagata.
19 “‘O lē na te tauimasui i le toto, o ia lea na te fasiotia le fasioti tagata. Afai na te maua atu lea tagata, e na te fasiotia o ia.
20 Afai e oti se tasi ona ua tūlei e se isi i lona ita, pe togi o ia i se mea ma se faanaunauga leaga,*+
21 pe na te faaoo lona lima iā te ia ona o lona ita ma oti ai, e ao ona fasiotia lava lea tagata. O ia o le fasioti tagata. O lē na te tauimasui i le toto, e na te fasiotia le fasioti tagata pe a maua atu o ia.
22 “‘Ae afai e teʻi ua ia tūlei iā te ia e aunoa ma le ita pe togi atu se mea iā te ia e aunoa ma se faanaunauga leaga,*+
23 pe e na te faapaʻū i ona luga se maa ae e na te lē iloa atu o ia, ma e lē o ia o sona fili pe e na te leʻi fia faia foʻi se mea leaga iā te ia, ma oti ai o ia,
24 e ao i le faapotopotoga ona faamasino i le tagata na faia le mea leaga ma lē na te tauimasui i le toto e tusa ma ia tulafono.+
25 E tatau i le faapotopotoga ona laveaʻi le fasioti tagata paʻivalea mai i lima o lē e tauimasui i le toto, ma toe faafoʻi o ia i lona aai o sulufaʻiga lea ua sola i ai, ma e ao ona ia nofo ai i inā seʻia oti le ositaulaga sili, o lē na faauuina i le suāuu paia.+
26 “‘Ae afai e alu atu le fasioti tagata paʻivalea i fafo o le tuaoi o lona aai o sulufaʻiga lea ua ia sola atu i ai,
27 ma ua maua o ia e lē e tauimasui i le toto i fafo o le tuaoi o lona aai o sulufaʻiga, ma fasiotia ai le fasioti tagata paʻivalea, e lē nofosala o ia i le toto o lea tagata.
28 Auā e tatau ona nofo o ia i lona aai o sulufaʻiga seʻia oti le ositaulaga sili. Ae pe a mavae le oti o le ositaulaga sili, e mafai ona toe foʻi le fasioti tagata paʻivalea i lona lava fanua.+
29 E fai nei mea ma aiāiga mo faamasinoga mo outou ma o outou tupulaga uma i mea uma tou te nonofo ai.
30 “‘O se tasi e fasiotia se tagata e tatau ona fasiotia o ia+ ona o faamatalaga a ni molimau;+ ae e lē tatau ona fasiotia se tasi ona o le faamatalaga a se molimau e toʻatasi.
31 E lē tatau ona outou talia se togiola mo le ola o se fasioti tagata o lē ua tatau i ai le oti, e ao lava ona fasiotia lea tagata.+
32 E lē tatau foʻi ona outou talia se togiola mo se tasi ua sola i lona aai o sulufaʻiga, e faataga ai e toe foʻi mai e nofo i lona fanua ae e leʻi oti le ositaulaga sili.
33 “‘Aua foʻi tou te faaleagaina le laueleele tou te nonofo ai, auā e faaleagaina le laueleele i le toto,+ ma e lē mafai ona togiolaina le laueleele ona o le toto ua faamaligiina i ai, seʻi vaganā ai le toto o lē ua faamaligiina le toto.+
34 Aua tou te faaleagaina le laueleele tou te nonofo ai, lea ou te nofo ai; auā o aʻu o Ieova, ou te nofo faatasi ma le fanauga a Isaraelu.’”+
Faamatalaga Pito i Lalo
^ E faasino atu i se tagata na fasiotia se tasi e aunoa ma le fuafuaina.
^ Epe., “ma lamalama iā te ia.”
^ Epe., “ae e leʻi lamalama iā te ia.”
