Numera 30:1-16
30 Ua fai atu Mose i ulu+ o ituaiga o Isaraelu e faapea: “O fetalaiga nei ua poloaʻi mai ai Ieova:
2 Afai e faia e se tamāloa se tautoga+ iā Ieova pe e tautō i se tautoga+ e faafitia ai se mea ma ua noanoatia ai o ia, e lē tatau ona ia solia ana upu.+ E ao ona ia faia o mea uma ua ia tautō e fai.+
3 “Afai e tautō se fafine iā Ieova po ua noanoatia o ia i se tautoga e faafitia se mea, a o teine muli o ia ma nofo i le aiga o lona tamā,
4 ma a faalogo lona tamā i lana tautoga po o lana tautoga lea ua noanoatia ai o ia e faafitia ai se mea, ae e lē tetee atu lona tamā i ana tautoga, e tumau ana tautoga uma, atoa ma ana tautoga uma ua noanoatia ai o ia e faafitia ai se mea, e tumau pea ia.
5 Peitaʻi, afai e vavao e lona tamā o ia pe a faalogo i ana tautoga po o ana tautoga ua noanoatia ai o ia e faafitia ai se mea, e lē tumau ia. E faamagaloina o ia e Ieova, ona ua vavao o ia e lona tamā.+
6 “Peita‘i, afai e faaipoipo o ia i se tane, ae o loo noanoatia o ia i sana tautoga po o se folafolaga na ia faia e aunoa ma le mafaufau i ai lea ua noanoatia ai o ia,
7 ma e faalogo i ai lana tane ma e lē tetee lana tane i le aso ua faalogo ai i ana tautoga, e tumau ana tautoga, e tumau foʻi ana tautoga ua noanoatia ai o ia e faafitia ai se mea.
8 Ae afai e vavao o ia e lana tane i le aso ua faalogo ai, e mafai ona faalēaogāina e lana tane lana tautoga ua fai, po o le folafolaga ua ia faia e aunoa ma le mafaufau i ai lea ua noanoatia ai o ia,+ ma e faamagaloina o ia e Ieova.
9 “Ae afai e fai e se fafine ua oti lana tane po o se fafine ua teteʻa ma lana tane se tautoga, e tumau ona noanoatia o ia e tusa ma mea uma ua ia tautō i ai.
10 “Peita‘i, afai ua tautō se fafine po ua tautō i se tautoga ua noanoatia ai o ia e faafitia ai se mea ae o loo i le fale o lana tane,
11 ma ua faalogo i ai lana tane ae ua lē tetee pe vavao e lana tane o ia, e tumau ana tautoga uma, po o ana tautoga ua noanoatia ai o ia e faafitia ai se mea.
12 Ae afai e matuā faalēaogāina e lana tane i le aso ua faalogo ai i ana tautoga, o so o sana tautoga na fai po o se tautoga e faafitia ai se mea, e lē tumau ia.+ Ua faalēaogāina e lana tane ana tautoga ma e faamagaloina o ia e Ieova.
13 E tusa ai o so o se taʻutinoga po o so o se tautoga e faafitia ai se mea,* e ao i lana tane ona faatumauina pe faalēaogāina ia tautoga.
14 Ae afai e lē tetee lava i ai le tane i lea aso ma lea aso, ua ia faatumauina fo‘i tautoga uma a le avā po o ana tautoga uma ua noanoatia ai o ia e faafitia se mea. Ua faatumauina e le tane ia tautoga, auā ua ia lē tetee i le aso na ia faalogo o faia ai e lana avā ia tautoga.
15 Ae afai ua ia faalēaogāina mulimuli ane ia tautoga pe a mavae le aso na ia faalogo i ai, e nofosala o ia i le sala a lana avā.+
16 “O tuutuuga ia ua poloaʻi mai ai Ieova iā Mose e faatatau i se tane ma lana avā, e faatatau fo‘i i se tamā ma lona afafine a o teine muli o ia ma nofo i le aiga o lona tamā.”
Faamatalaga Pito i Lalo
^ Po o “se tautoga e faapuapuagatia ai o ia lava.”
