Faamaumauga a Mataio 21:1-46
21 Ua latalata i latou i Ierusalema ma ua taunuu atu i Petefake i le mauga o Olive, ona aauina atu lea e Iesu o ona soo e toʻalua,+
2 ma faapea atu: “Ia oulua ō i le nuu lea o loo vaai atu i ai, ma e lua te maua ai se asini o loo nonoa ma lana tama. Ia tatala ma aumai iā te aʻu.
3 Afai e fai mai e se tasi se upu iā te oulua, ia oulua fai atu i ai, ‘E manaʻo i ai le Alii.’ Ona ia tuuina mai loa lea.”
4 Ua tupu lenei mea ina ia taunuu ai le upu na ala mai i le perofeta e faapea:
5 “Ia outou taʻu atu i le tama fafine a Siona: ‘Faauta! Ua afio mai lou tupu iā te oe,+ e agamalu o ia,+ ma o loo tiʻetiʻe i se asini, o se tamaʻi asini, o le tama a le manu ave avega.’”+
6 Ona ō atu lea o ia soo ma fai e pei lava ona faatonuina ai i laʻua e Iesu.+
7 Ona la aumaia lea o le asini ma lana tama, ua fofola ai i luga o latou ofu tele, ma ua tiʻetiʻe ai o ia.+
8 Ua fofola foʻi e le toʻatele o le motu o tagata o latou ofu tele i le ala,+ a o isi ua latou tā mai lālā o laau ma fola ai le ala.
9 E lē gata i lea, ua alalaga atu pea le motu o tagata o ē ua muamua atu iā te ia, ma ē o loo mulimuli mai e faapea: “Matou te tatalo ia faaolaina le Alo o Tavita!+ E manuia lē e maliu mai i le suafa o Ieova!*+ Matou te tatalo i lē e afio i mea maualuluga, ina ia faaola iā te ia!”+
10 A o ulu atu o ia i Ierusalema, ua vevesi le aai atoa ma faapea ane: “O ai ea lenei tagata?”
11 Ae ua fai atu pea le motu o tagata: “O Iesu lenei, le perofeta+ mai Nasareta i Kalilaia!”
12 Ua ulufale atu Iesu i le malumalu ma tutuli i fafo ē uma ua fai fefaatauaʻiga i le malumalu, ma fuli laulau a tagata suitupe ma nofoa o le ʻaufaatau lupe.+
13 Ua ia faapea atu iā i latou: “Ua tusia, ‘E taʻua loʻu fale o le fale tatalo,’+ a o lenei ua outou faia ma ana o ē e faomea.”+
14 Ua ō ane foʻi tagata tauaso ma pipili i le malumalu, ma ua ia faamālōlōina i latou.
15 Ua iloa e le ʻaufaitaulaga sili ma le ʻautusiupu galuega mamana ua ia faia ma tama o loo alalaga i le malumalu e faapea: “Matou te tatalo ia faaolaina le Alo o Tavita!”+ ona feita ai lea o i latou+
16 ma fai mai iā te ia: “Po o e faalogo atu ea i a latou upu?” Ua fetalai atu Iesu iā i latou: “Ioe. Pe e tou te leʻi faitau ea e faapea, ‘Ua e saunia le viiga e ala mai i gutu o tamaiti ma pepe’?”+
17 Ona ia tuua lea o i latou ae alu atu i le aai o Petania ma tofā ai i inā.+
18 A o toe foʻi atu i le aai i le taeaopō, ona fia taumafa ai lea o ia.+
19 Ua silafia e ia le laau o le mati i tafatafa o le auala, ona ia alu atu lea i ai, ae e leai ni fua ua na o lau.+ Ona ia faapea atu lea i le mati: “Ia aua lava neʻi toe iai ni ou fua.”+ Ona mamae faafuaseʻi ai lea o le mati.
20 Ua iloa atu e le ʻausoo, ona latou ofo ai lea ma faapea ane: “Na faapefea ona mamae faafuaseʻi le mati?”+
21 Ona tali atu lea o Iesu iā i latou: “E moni ou te fai atu iā te outou, afai tou te faatuatua ae lē masalosalo, e lē gata tou te faia e pei ona ou faia i le mati, ae tou te fai atu foʻi i lenei mauga, ‘Ia siitia ma lafo i le sami,’ ona faia lava lea.+
22 O mea uma tou te talosaga atu ai i le tatalo ma le faatuatua, tou te maua lava.”+
23 Ua ulufale atu o ia i le malumalu, ona ō mai ai lea o le ʻaufaitaulaga sili ma le ʻautoeaina o le nuu a o ia aʻoaʻo atu, ua faapea mai: “O le pule a ai ua e faia ai nei mea? O ai foʻi na tuuina atu lenei pule iā te oe?”+
24 Ua tali atu Iesu iā i latou: “E iai foʻi le mea lea ou te fia fesili atu ai iā te outou. Afai tou te taʻu mai iā te aʻu le tali, ona ou taʻuina atu foʻi lea po o le pule a ai ua ou faia ai nei mea:
25 E mai i fea le papatisoga a Ioane? Pe e mai i le lagi ea pe e mai i tagata?”* Ae ua latou talatalanoa ma faapea ane: “Afai tatou te fai atu, ‘E mai i le lagi,’ ona ia faapea mai lea iā i tatou, ‘Aiseā la ua outou lē talitonu ai iā te ia?’+
26 Ae afai tatou te faapea atu, ‘E mai i tagata,’ o le a lamatia la i tatou i le motu o tagata, auā e latou te manatu o Ioane o le perofeta.”
27 O lea ua latou tali mai ai iā Iesu: “Matou te lē iloa.” Ona ia fetalai atu lea iā i latou: “Ou te lē taʻuina atu foʻi la iā te outou, po o le pule a ai ua ou faia ai nei mea.
28 “O le ā so outou manatu? E iai se tamāloa e toʻalua ona atalii. Na alu atu o ia i le atalii muamua ma fai atu iā te ia, ‘Loʻu atalii e, alu e galue i le togāvine i le asō.’
29 Ona tali mai lea o le atalii, ‘Ou te lē alu,’ ae na mulimuli ane salamō o ia ma alu.
30 Ona ia alu atu lea i le atalii lona lua ma fai atu foʻi faapena. Ua tali mai o ia i lona tamā, ‘Ua lelei, o le a ou alu,’ ae e leʻi alu.
31 O ai o atalii e toʻalua na faia le mea na loto i ai lo la tamā?” Ua latou faapea mai: “O le atalii muamua.” Ona faapea atu lea o Iesu: “E moni ou te fai atu iā te outou, e muamua atu le ʻauaolafoga ma fafine talitane iā te outou i le Malo o le Atua.
32 Auā na sau Ioane iā te outou i le ala o le amiotonu, ae tou te leʻi talitonu iā te ia. Peitaʻi, na talitonu i ai le ʻauaolafoga ma fafine talitane.+ Ae e ui ina outou vāai i ai, e tou te leʻi salamō ma talitonu iā te ia.
33 “Ia faalogo mai i se isi talafaatusa: Sa iai se matai o le aiga o lē na totō se togāvine+ ma siʻo ai i le pā, ma eli le mea e soli ai vine ma faatū se ʻolo;+ ona ia lisiina atu lea i ē galulue vine ae malaga i nuu mamao.+
34 Ina ua oo i le tau e fua ai laau, ona ia aauina atu lea o ana pologa i ē galulue vine, ina ia aumai ai ni fua.
35 Peitaʻi, na pupuʻe e ē galulue vine ana pologa, ona latou fasi lea o le tasi, fasioti le isi, ae fetogi le isi i maa.+
36 Ona ia toe aauina atu lea o isi pologa, e toʻatele atu i pologa muamua, a o le mea foʻi lenā na latou faia iā i latou.+
37 Mulimuli ane, ona ia auina atu lea o lona atalii iā i latou, ua faapea ane, ‘E latou te āva i loʻu atalii.’
38 Ina ua iloa atu e ē galulue vine le atalii, ona latou faapea ifo lea iā i latou lava, ‘O le suli lenei,+ seʻi tatou ō e fasioti o ia ma ave lona tofi!’
39 O lea, na latou puʻe ai iā te ia ma lafo i tua o le togāvine ma fasioti iā te ia.+
40 O lea la, pe a taunuu mai lē e ana le togāvine, o le ā le mea e na te faia i na tagata galulue vine?”
41 Ua latou fai mai iā te ia: “E na te matuā faaumatia i latou ona o lo latou leaga, ma lisi atu le togāvine i isi tagata galulue vine, o ē o le a avatua iā te ia ni fua pe a oo i le tau e fua ai laau.”
42 Ua fetalai atu Iesu iā i latou: “Pe e tou te leʻi faitau ea i Tusitusiga Paia, ‘O le maa lea na tuulafoaʻiina e tufuga, ua avea ma maa tulimanu sili.+ E mai iā Ieova* lenei mea, ma e ofoofogia i la tatou vaai’?+
43 O le mea lea ou te fai atu ai iā te outou, e aveesea le Malo o le Atua mai iā te outou, ae tuuina atu i se nuu e fua mai ai ona fua.
44 E lē gata i lea, e nutililii le tagata e paʻū i luga o lenei maa.+ Ae o sē e paʻū i ai le maa, e nutipalaina o ia.”+
45 Ua faalogo le ʻaufaitaulaga sili ma le ʻau Faresaio i ana talafaatusa, ona latou iloa ai lea ua faatatau atu ana fetalaiga iā i latou.+
46 E ui ina latou mananaʻo e puʻe iā te ia, ae ua fefefe i le motu o tagata, auā ua manatu nei tagata, o ia o le perofeta.+
Faamatalaga Pito i Lalo
^ Po o le “tupuga mai i tagata?”
