Malaki 1:1-14

  • Le alofa o Ieova mo ona tagata (1-5)

  • Faia e ositaulaga taulaga i manu mamaʻi (6-14)

    • Faasilisilia le igoa o le Atua i atunuu (11)

1  O se feʻau mai i le Atua: O le afioga a Ieova iā Isaraelu na ala mai iā Malaki:*  Ua fetalai mai Ieova, “Ua ou alofa iā te outou.”+ Ae ua outou fai atu: “O le ā le auala ua e alofa mai ai iā i matou?” “Pe e lē o Esau ea o le uso o Iakopo?”+ ua fetalai mai ai Ieova. “Ae na ou alofa iā Iakopo,  ma na ou ʻinoʻino iā Esau;+ na ou faia ona mauga ma faatafunaga,+ na faia foʻi lona tofi mo taʻifau o le vao o le toafa.”*+  “E ui ua fai mai Etoma, ‘Ua nutipalaina i matou, ae e matou te toe foʻi ma toe fausia mea ua faatafunaina,’ ae ua fetalai mai Ieova o ʻau, ‘E latou te fausia, ae ou te lepetia, ma e taʻua i latou “o le laueleele o le amioleaga” ma “o le nuu ua taʻusalaina e faavavau e Ieova.”+  E vāai i ai o outou lava mata, ma e tou te faapea ane: “Tau ina ia faasilisilia Ieova i le laueleele o Isaraelu.”’”  “‘E āva le atalii i lona tamā,+ e āva foʻi le auauna i lona matai. Afai o aʻu o le tamā,+ o fea o iai le āva iā te aʻu?+ Afai foʻi o aʻu o le matai,* o fea o iai le mataʻu* iā te aʻu?’ ua fetalai mai ai Ieova o ʻau iā te outou o ositaulaga, o ē o loo ʻinoʻino i loʻu igoa.+ “‘Ae ua outou fai atu: “O le ā le auala ua matou ʻinoʻino ai i lou suafa?”’  “‘E ala i lo outou aumaia o meaʻai* leaga i loʻu fata faitaulaga.’ “‘Ua outou faapea atu foʻi: “O le ā le auala ua e leaga ai ona o i matou?”’ “‘E ala i le faapea atu: “O le laoai a Ieova+ o se mea e ʻinoʻino i ai.”  Pe a outou aumaia se manu tauaso mo le taulaga, ua outou faapea ane: “E lē leaga.” Pe a outou aumaia foʻi se manu pipili pe maʻi, ua outou faapea ane: “E lē leaga.”’”+ “Faamolemole, seʻi avatu ia lenā taulaga i le kovana. Pe e fiafia ea o ia iā te oe, pe e na te talileleia mai oe?” ua fetalai mai ai Ieova o ʻau.  “A o lenei, faamolemole ia ʻaiʻoi atu i le Atua, ina ia talia ai i tatou e ia. Pe a outou avatu taulaga faapena, pe e talileleia ea e ia so o se tasi o outou?” ua fetalai mai ai Ieova o ʻau. 10  “O ai se tasi o outou e lotomalie e tapunia faitotoʻa?*+ Auā ua outou lē tutuina le afi i loʻu fata faitaulaga e aunoa ma se totogi.+ Ou te lē fiafia iā te outou,” ua fetalai mai ai Ieova o ʻau, “ou te lē fiafia foʻi i so o se taulaga e fai ma meaalofa mai i o outou lima.”+ 11  “Auā o le a faasilisilia loʻu igoa i atunuu uma, e mai i le mea e oso aʻe ai le lā e oo atu i le mea e goto i ai.*+ E faamū taulaga i nofoaga uma lava, e faia ai foʻi taulaga i loʻu igoa, o se meaalofa mamā; auā e faasilisilia loʻu igoa i atunuu,”+ ua fetalai mai ai Ieova o ʻau. 12  “Ae ua outou faaleagaina ai*+ i lo outou fai ane, ‘Ua leaga le laoai a Ieova, ma o taulaga ua laulau ai, o meaʻai ia o loo iai, o se mea inosia lava lea.’+ 13  Ua outou fai ane foʻi, ‘Auē! O se avega mamafa!’ ma ua outou ʻinoʻino i ai,” ua fetalai mai ai Ieova o ʻau. “Ua outou aumaia manu ua faoa, pipili, ma mamaʻi. Ioe, ua outou aumaia ia mea e fai ma meaalofa! Po ou te talia ea ia mea mai i o outou lima?”+ ua fetalai mai ai Ieova. 14  “E malaia o lē e taufaaʻoleʻole e iai i lana lafu se manu poʻa e matuā lelei, ae ua ia faia se tautoga ma faia se taulaga iā Ieova i se manu ua leaga. Auā o aʻu o le Tupu silisili,+ ma o lo‘u igoa o le a matata‘u ai atunuu,”+ ua fetalai mai ai Ieova o ʻau.

Faamatalaga Pito i Lalo

Lona uiga “O Laʻu Avefeʻau.”
Tagaʻi i le Uiga o Upu.
Po o le “matai sili.”
Po o le “faaaloalo.”
Epe., “falaoa.”
E foliga mai o se tiute le tapunia o faitotoʻa o le malumalu.
Po o le “mai i le itu i sasaʻe i le itu i sisifo.”
Pe atonu “ua outou faaleaga aʻu.”