Levitiko 6:1-30

  • Isi mea e faatatau i le taulaga o le nofosala (1-7)

  • Faatonuga mo taulaga (8-30)

    • Taulaga mū (8-13)

    • Taulaga i mea‘ai (14-23)

    • Taulaga o agasala (24-30)

6  Ua toe fetalai mai Ieova iā Mose:  “Afai e agasala se tasi ma lē faamaoni iā Ieova+ e ala i le ʻolegia o lona tuaoi i so o se mea ua tuuina atu iā te ia e tausia,+ po ua faoa pe ave faagaoi se mea mai i lona tuaoi,  po ua ia maua se mea na leiloa ae faafiti ai, ma ia tautō pepelo e tusa ma so o se agasala e mafai ona ia faia,+ o le mea lenei e ao ona ia faia:  Afai ua agasala o ia ma nofosala ai, e ao ona ia toe faafoʻi atu le mea na ia gaoia, le mea na ia maua i faiga taufaamataʻu, le mea na ia ave faagaoi, le mea na tuuina atu na te tausia, po o le mea na leiloa lea na ia mauaina,  po o so o se mea lava ua ia tautō pepelo ai, ma e tatau ona ia taui atu le tau atoa mo lea mea,+ ma ia faaopoopo i ai le tasi vaelima i le tau o lea mea. E na te avatu i lē e ona lea mea i le aso e faamaonia ai lona nofosala.  E na te aumaia i le ositaulaga o lana taulaga o le nofosala iā Ieova, o se mamoe poʻa e matuā lelei lava mai i le lafu e tusa ma le fua faatatau o le tau, ina ia faia ai le taulaga o le nofosala.+  E faia e le ositaulaga le togisala mo ia i luma o Ieova, ma o le a faamagaloina o ia e tusa ai ma so o se mea atonu na ia faia ua nofosala ai.”+  Ua fetalai mai pea Ieova iā Mose e faapea:  “Ia e poloaʻi atu iā Arona ma ona atalii e faapea, ‘O le tulafono lenei o le taulaga mū:+ O le a iai pea le taulaga mū i le taʻinafi i luga o le fata faitaulaga i le pō atoa seʻia oo i le taeao, ma e mū ai pea le afi i le fata faitaulaga. 10  E ao i le ositaulaga ona ofu i ofu o le ositaulaga o le ʻie lino lea,+ e na te ofuina lona ofuvae pupuu ua faia i le ‘ie lino+ e ufiufi ai lona tino. E na te aveesea foʻi lefulefu*+ o le taulaga mū lea e susunu i le afi i luga o le fata faitaulaga, ma tuuina i autafa o le fata faitaulaga. 11  Ona ia aveesea lea o ona ofu+ ae toe ofu isi ofu, ma ave lefulefu i se nofoaga mamā i tua o le togālauapi.+ 12  E mumū pea le afi i luga o le fata faitaulaga. E lē tatau ona pē. E ao i le ositaulaga ona faamumū ai fafie+ i taeao ta‘itasi, ma faatulaga ai le taulaga mū, e ao foʻi ona ia susunuina ai gaʻo o le taulaga faifaatasi.+ 13  E mumū pea le afi i luga o le fata faitaulaga. E lē tatau ona pē. 14  “‘O le tulafono lenei o taulaga i meaʻai:+ O outou o atalii o Arona, ia aumaia le taulaga i luma o Ieova i luma o le fata faitaulaga. 15  E luluu mai e se tasi o i latou se luuga o falaoamata lelei o le taulaga i meaʻai, ma se vaega o le suāuu ma le lipano uma lea o loo i le taulaga i meaʻai, ma e ao ona ia faamūina i luga o le fata faitaulaga e avea o se manogi lelei,* e fai ma sui o le taulaga atoa* iā Ieova.+ 16  A o mea e totoe e ʻai e Arona ma ona atalii.+ O le a ʻaina o ni falaoa e lē faafefeteina i le nofoaga paia. E latou te ʻaina i le lotoā o le faleʻie o le feiloaʻiga.+ 17  E lē tatau ona tao a o iai se mea fefete.+ Ua ou avatu ia mea e fai ma a latou mea mai i aʻu taulaga ua faia i le afi.+ O se mea e sili ona paia,+ e pei o le taulaga o agasala ma e pei foʻi o le taulaga o le nofosala. 18  E aai ai tane uma mai i atalii o Arona.+ O le fuafuaga tumau lea mo i latou i o outou tupulaga o loo mulimuli mai, i taulaga a Ieova ua faia i le afi.+ O so o se mea e paʻi i ia taulaga, e paia lava.’” 19  Ua fetalai mai pea Ieova iā Mose: 20  “O le taulaga lenei a Arona ma ona atalii, e latou te aumaia e lē aunoa iā Ieova i le aso e faauu ai o ia:+ o le tasi vaesefulu o le efa*+ o le falaoamata lelei o le taulaga i meaʻai,+ o le ʻafa i le taeao ma le ʻafa i le afiafipō. 21  Ia faavela faatasi ma le suāuu i le uʻamea mafolafola.+ E te aumaia le taulaga i meaʻai ua uma ona tuu i ai le suāuu, ma e te avatu le taulaga i meaʻai ua vela ma ua vaevaeina i fasi mea, o se manogi lelei lea iā* Ieova. 22  E faia lea e le ositaulaga ua faauuina o lē e suitulaga iā te ia mai i ona atalii.+ O se tuutuuga e ao ona tausia pea lava: Ia susunuina i le afi le taulaga atoa iā Ieova. 23  O taulaga uma i meaʻai a le ositaulaga, e ao ona susunuina le taulaga atoa. E lē tatau ona ʻaina.” 24  Ua fetalai mai pea Ieova iā Mose: 25  “Ia e fai atu iā Arona ma ona atalii e faapea, ‘O le tulafono lenei o taulaga o agasala:+ E ao ona fasia le manu mo le taulaga mo agasala i luma o Ieova, i le nofoaga lava e tasi e fasia ai le manu mo taulaga mū.+ O se mea lea e sili ona paia. 26  O le ositaulaga e faia le taulaga o agasala, o ia e ‘aina le taulaga.+ E ʻaina le taulaga i le nofoaga paia i le lotoā o le faleʻie o le feiloaʻiga.+ 27  “‘O so o se mea e paʻi i le tino o le taulaga e paia lava lea, ma pe a pisia le ofu o se tasi i sina vaega o le toto o le taulaga, e ao ona tā lona ofu i se nofoaga paia. 28  E ao ona nutililii le ulo omea lea e faavela ai. Ae afai e faavela i se ulo ʻapamemea, e ao ona fufulu mamā ma faamamā i le vai. 29  “‘E aai ai tane uma o ē o ni ositaulaga.+ O se mea lea e sili ona paia.+ 30  Peitaʻi, e lē tatau ona aai i le taulaga o agasala, lea e avatu ai se vaega o le toto i totonu o le faleʻie o le feiloaʻiga, ina ia faia ai le togisala i le mea paia.+ E ao ona susunuina i le afi.

Faamatalaga Pito i Lalo

Po o “lefulefu ua gaʻoa,” e faasino atu i lefulefu ua gaʻoa mai i taulaga.
Po o le “manogi e faamalieina ai.”
Po o le “e avea o se vaega o le taulaga e fai ma faamanatuga.”
O le tasi vaesefulu o le efa e tusa ma le 2.2 lita. Tagaʻi i le Faa. E14.
Po o le “manogi ua faamalieina ai.”