Levitiko 3:1-17

  • Taulaga faifaatasi (1-17)

    • Aua le aai i le ga‘o po o le toto (17)

3  “‘Afai o lana taulaga o le taulaga faifaatasi,*+ afai e aumaia e ia lana taulaga mai i le lafu povi o se manu poʻa po o se manu fafine, e tatau ona ia avatua i luma o Ieova o se manu e matuā lelei lava.  E na te faaee foʻi lona lima i luga o le ulu o le manu e fai ai lana taulaga, ma fasi ai i le faitotoʻa o le faleʻie o le feiloaʻiga; e ao ona sausau e ositaulaga, o atalii ia o Arona le toto i itu uma o le fata faitaulaga.  E na te aumaia nisi o mea o le taulaga faifaatasi, o se taulaga iā Ieova ua faia i le afi:+ o le gaʻo+ lea ua ufiufi ai gaʻau, o gaʻo uma lava e pipii i gaʻau,  ma fatugaʻo e lua ma le gaʻo i luga o na mea e lata i suilapalapa. E na te aveesea foʻi gaʻo o le ate faatasi ma fatugaʻo.+  E ao i atalii o Arona ona susunu ia mea uma i luga o le fata faitaulaga, faatasi ma le taulaga mū i luga o fafie ua i luga o le afi;+ o le taulaga ua faia i le afi, o se manogi lelei lea iā* Ieova.+  “‘Afai o lana taulaga mo le taulaga faifaatasi iā Ieova e aumaia mai i le lafu mamoe, e tatau ona ia aumaia se manu poʻa po o se manu fafine e matuā lelei lava.+  Afai e na te aumaia se tamaʻi mamoe poʻa e fai ai lana taulaga, e ao ona aumaia i luma o Ieova.  E na te faaee atu lona lima i luga o le ulu o le manu e fai ai lana taulaga, ma fasi ai i luma o le faitotoʻa o le faleʻie o le feiloaʻiga. E ao ona sausau e atalii o Arona le toto i itu uma o le fata faitaulaga.  E na te aumaia le gaʻo mai i le taulaga faifaatasi, o se taulaga iā Ieova ua faia i le afi.+ E na te vavaeeseina le siʻusiʻu gaʻoa atoa e lata i le ivitū, o le gaʻo ua ufiufi ai gaʻau, o gaʻo uma e pipii i gaʻau, 10  ma fatugaʻo e lua ma le gaʻo i luga o na mea e lata i suilapalapa. E na te aveesea foʻi gaʻo o le ate faatasi ma fatugaʻo.+ 11  E susunu e le ositaulaga ia mea uma i luga o le fata faitaulaga o ni meaʻai,* o se taulaga iā Ieova ua faia i le afi.+ 12  “‘Afai e na te aumaia se ʻoti e fai ai lana taulaga, e ao ona aumaia i luma o Ieova. 13  E na te faaee lona lima i luga o le ulu o le ʻoti, ma fasi ai i luma o le faitotoʻa o le faleʻie o le feiloaʻiga; e ao ona sausau e atalii o Arona le toto i itu uma o le fata faitaulaga. 14  O le vaega e na te avatu e fai ai lana taulaga, o se taulaga iā Ieova ua faia i le afi, o le gaʻo lea ua ufiufi ai gaʻau, o gaʻo uma lava e pipii i gaʻau,+ 15  ma fatugaʻo e lua ma le gaʻo i luga o na mea e lata i suilapalapa. E na te aveesea foʻi gaʻo o le ate faatasi ma fatugaʻo. 16  E susunu e le ositaulaga ia mea uma i luga o le fata faitaulaga o ni meaʻai,* o le taulaga ua faia i le afi, o se manogi lelei lea.* E fai mo Ieova le gaʻo uma.+ 17  “‘O le tulafono tumau lenei i o outou tupulaga o loo mulimuli mai, i mea uma tou te nonofo ai: Aua lava neʻi outou aai i le gaʻo po o le toto.’”+

Faamatalaga Pito i Lalo

Po o “le taulaga o le filemu.”
Po o le “manogi ua faamalieina ai.”
Epe., “falaoa.” O loo faaata i inei le vaega a le Atua i le taumafataga faifaatasi.
Epe., “falaoa.” O loo faaata i inei le vaega a le Atua i le taumafataga faifaatasi.
Po o le “manogi e faamalieina ai.”