Levitiko 25:1-55

  • Le tausaga o le Sapati (1-7)

  • Le tausaga o le Iupelī (8-22)

  • Toe faafo‘isia o fanua (23-34)

  • Feutaga‘iga ma lē e mativa (35-38)

  • Tulafono e faatatau i pologa (39-55)

25  Ua toe fetalai mai Ieova iā Mose i le mauga o Sinai e faapea:  “Ia e fai atu i le fanauga a Isaraelu ma e faapea atu iā i latou, ‘Pe a outou taunuu atu i le laueleele ou te foaʻiina atu iā te outou,+ aua neʻi galueaʻiina le laueleele ona o le sapati iā Ieova.+  E ono tausaga e te lūlū ai fatu i lou fanua, e ono foʻi tausaga e te teu ai lou togāvine, ma ao ai fua o faaeleeleaga o le fanua.+  Ae i le tausaga lona fitu o le sapati iā Ieova, ia tuu ai pea le fanua auā o le sapati lea. Aua e te lūlū ai fatu i lou fanua, pe teuina lou togāvine.  Aua e te seleseleina fua o laau ua ola aʻe mai i fatu na paʻuʻū ina ua uma le seleselega, aua foʻi e te aoaoina vine mai i togāvine e leʻi teuina. E ao ona tuu ai pea le fanua mo le tausaga.  Peita‘i, e mafai ona e ‘ai i mea‘ai ua ola a‘e i le laueleele i le sapati; o oe, o au tane pologa ma teine pologa, o lē ua faigaluega totogi, ma tagata ese o aumau faatasi ma oe, e mafai ona aai ai,  faapea manu lalata ma manu o le vao o loo i lou fanua. E mafai ona aai i fua uma o le laueleele.  “‘Ia e faitauina tausaga faasapati e fitu, e fitu taimi faatele i le fitu tausaga, ma o aso o tausaga faasapati e fitu, e tusa ia ma le 49 tausaga.  Ona ili leotele lea o le pū i le masina lona fitu i le aso lona sefulu o le masina; i le Aso o le Togisala,+ e ao ona outou faatulagaina le iliga o pū i lo outou atunuu atoa. 10  E tatau ona outou faapaiaina le tausaga lona 50 ma faasilasila atu le saʻolotoga i le atunuu i ona tagata uma.+ O le Iupelī lea mo outou, ma ia taʻitoʻatasi outou ma toe foʻi atu i lona fanua, ma ia taʻitoʻatasi outou ma toe foʻi atu i lona aiga.+ 11  E fai le tausaga lona 50 ma Iupelī mo outou. Aua tou te lūlūina fatu pe seleseleina fua o laau ua ola aʻe mai i fatu na paʻuʻū, pe aoaoina vine mai i togāvine e leʻi teuina.+ 12  Auā o le Iupelī lea. Ia avea o se mea paia iā te outou. Ia outou aai mai i mea e fua mai i le fanua.+ 13  “‘O le tausaga foʻi o le Iupelī, e ao ona taʻitoʻatasi outou ma toe foʻi atu i lona fanua.+ 14  Afai e te faatau atu ni mea i lou tuaoi, pe e te faatau mai se mea mai iā te ia, aua neʻi faia ni faiga faapiʻopiʻo e le tasi i le isi.+ 15  Pe a e faatau mai se fanua mai i lou tuaoi, e ao ona e faitau le aofaʻi o tausaga talu mai le Iupelī, ma e tatau ona ia faatau atu iā te oe e fua i tausaga o totoe e aoao mai ai fua o faaeleeleaga.+ 16  Pe afai e tele tausaga o totoe, e mafai ona ia faateleina lona tau, ae afai e itiiti tausaga o totoe, e ao ona ia faaitiitia lona tau, auā o loo ia faatau mai iā te oe le aofaʻiga o fua o faaeleeleaga o le a fua mai. 17  Aua tou te faia ni faiga faapiʻopiʻo i se tasi o ou tuaoi,+ ae ia e mataʻu i lou Atua,+ auā o aʻu o Ieova lo outou Atua.+ 18  O lo outou usiusitaʻi i aʻu tulafono ma tausia iʻuga o aʻu faamasinoga, o le a outou nonofo ai ma le saogalemu i le laueleele.+ 19  E fua mai lava le laueleele,+ e tou te aai ma maoona ai ma nonofo ai ma le saogalemu.+ 20  “‘Ae afai tou te faapea mai: “O ā mea o le a matou aai ai i le tausaga lona fitu, auā matou te leʻi lūlūina ni fatu pe aoaoina fua o a matou faaeleeleaga?”+ 21  O le a ou avatu laʻu faamanuiaga mo outou i le tausaga lona ono, ma e fua mai e le laueleele faaeleeleaga e lava ai tausaga e tolu.+ 22  Ona outou lūlū lea o fatu i le tausaga lona valu, ma aai i fua tuai o faaeleeleaga seʻia oo i le tausaga lona iva. E tou te aai i fua tuai seʻia fua mai ona faaeleeleaga. 23  “‘E lē tatau ona faatau motu le fanua,+ auā o aʻu e ana.+ Auā i loʻu manatu o outou o tagata ese ma ē e aumau i le fanua.+ 24  E tusa ma laueleele uma o le a fai mo outou, e ao ona outou tuu atu le aiā e toe faatau mai ai fanua. 25  “‘Afai e oo ina mativa lou uso ma ua ia faatau atu nisi o ona fanua, e ao i lē e na te toe faataua, o se tasi foʻi e la te aiga, ona alu atu ma toe faatau mai mea na faatau atu e lona uso.+ 26  Afai ua lē o iā te ia sē e na te toe faataua mai, ae ua lava ana tupe e toe faatau mai ai lona fanua, 27  e ao ona ia fuaina le tau o le fanua mo tausaga na ia faatau ese ai, ona toese lea i le tau na ia faatau atu ai le fanua, o le tupe e totoe ai e ao ona ia totogi atu i le tagata na ia faatau atu ai le fanua. Ona ia toe foʻi atu lea i lona fanua.+ 28  “‘Ae afai e na te lē gafatia le tupe e toe faafo‘i mai ai lona fanua, o mea ua ia faatau atu e faaauau ona iai i lē na faataua seʻia oo i le tausaga o le Iupelī;+ ma e toe faamatuu mai ia mea i le Iupelī, ma toe foʻi atu ai o ia i lona fanua.+ 29  “‘Ae afai e faatau atu e se tasi se fale o loo i totonu o le aai ua siʻomia i le pā, e faaauau pea lana aiā e toe faatau mai ai le fale mo le tausaga atoa, e amata mai i le taimi na ia faatau atu ai; e faaauau pea mo le tausaga lana aiā e toe faatau mai ai.+ 30  Ae afai e uma le tausaga e leʻi toe faatauina mai e ia le fale, ona fai pea lea o le fale ua iai i le aai ua siʻomia i le pā ma meatotino a lē na faatauina, e oo lava i ona tupulaga o loo mulimuli mai. E lē faamatuuina atu i le Iupelī. 31  Ae o fale o nuu e leai ni pā o siʻomia ai, e ao ona taʻua o ni vaega o fanua i uta. E faaauau pea le aiā e toe faatau ai ma e faamatuu atu i le Iupelī. 32  “‘Ae o fale o le ʻau sa Levī ia ua iai i totonu o o latou aai,+ e iai pea i le ʻau sa Levī le aiā e toe faatau mai ai. 33  A faapea e leʻi toe faatauina mai meatotino a le ʻau sa Levī, e ao ona faamatuu atu le fale ua faatauina ua iai i lo latou aai pe a oo i le Iupelī,+ auā o fale o i aai o le ʻau sa Levī, o lo latou tofi lea mai i le fanauga a Isaraelu.+ 34  O fanua taalaelae+ i tua o o latou aai e lē faatauina, auā o se tofi tumau lea mo i latou. 35  “‘Afai e oo ina mativa lou uso, o lē e nofo latalata ane iā te oe ma ua lē mafai ona tausia o ia lava, e ao ona e tausia o ia+ e pei ona e faia i le tagata ese ma lē e aumau,+ ina ia ola ai pea o ia faatasi ma oe. 36  Aua e te manaʻo i se tupe faasili po o se polofiti mai iā te ia.+ Ia e mataʻu i lou Atua,+ ina ia ola ai lou uso faatasi ma oe. 37  Aua e te nonō atu iā te ia au tupe ina ia maua ai se tupe faasili,+ pe avatu au meaʻai ina ia maua ai se polofiti. 38  O aʻu o Ieova lo outou Atua, o lē na aumaia outou mai i le atunuu o Aikupito+ ina ia avatu iā te outou le laueleele o Kanana, e faailoa ai iā te outou o aʻu o lo outou Atua.+ 39  “‘Afai e oo ina mativa lou uso e nofo latalata ane iā te oe ma ia faatau atu o ia iā te oe,+ aua e te faafaigaluega o ia e pei o se pologa.+ 40  E ao ona faia o ia e pei o sē ua faigaluega totogi,+ e pei foʻi o sē e aumau. E ao ona galue iā te oe seʻia oo i le tausaga o le Iupelī. 41  Ona alu lea o ia, o ia ma lana fanau* faatasi ma ia, ua toe foʻi i lona aiga. E ao ona toe foʻi o ia i fanua o ona augātamā.+ 42  Auā o aʻu pologa le fanauga a Isaraelu o ē na ou aumaia mai i le atunuu o Aikupito.+ E lē tatau ona latou faatauina i latou e fai ma pologa. 43  Aua e te pule ma le sauā iā te ia,+ ae ia e mataʻu i lou Atua.+ 44  E maua mai i atunuu e siʻomia ai outou o au tane pologa ma teine pologa, e tou te faatau mai iā i latou o se tane pologa po o se teine pologa. 45  E maua mai foʻi i fanau a ē e aumau o ni tagata ese ua iā te outou,+ e tou te faatau mai iā i latou ni pologa, e maua mai foʻi i o latou aiga ua faatasi ma outou o ē na latou fanauina i lo outou laueleele, ma o outou e ona i latou. 46  E tou te tuu atu ia tagata i o outou atalii pe a mavae atu outou, o se tofi tumau lea mo i latou. Ia outou faafaigaluega ia tagata, ae aua tou te pule ma le sauā i o outou uso,+ o le fanauga lea a Isaraelu. 47  “‘Ae afai e oo ina mauʻoa se tagata ese po o sē e aumau, ae ua oo ina mativa lou uso Isaraelu i lou vaipanoa, ma ua ia faatau atu o ia i le tagata ese po o lē e aumau faatasi ma oe, po o se isi o le aiga o le tagata ese, 48  e faaauau pea ona iai lana aiā e toe faatau mai ai o ia pe a uma ona ia faatauina atu o ia. E mafai e se tasi o ona uso ona toe faatau mai o ia,+ 49  e mafai fo‘i ona toe faatau mai o ia e le uso o lona tamā, po o le atalii o le uso o lona tamā, po o se isi o ona aiga vavalalata,* o se tasi o lona aiga e mafai ona toe faatau mai o ia. “‘Pe afai foʻi ua oo ina mauʻoa o ia, e mafai ona ia toe faatau mai o ia lava.+ 50  E ao ona la faitau ma lē na faatauina o ia le taimi, e mai i le tausaga na faatauina atu ai o ia lava iā te ia seʻia oo i le tausaga o le Iupelī,+ ma e tatau ona tutusa le tau na faatau atu ai o ia ma ia tausaga.+ O le totogi o aso na ia faigaluega ai i na tausaga ia fai e pei o le totogi o se tagata faigaluega.+ 51  Afai e tele pea tausaga o totoe, e ao ona ia toe totogi atu le tupe na faatau ai o ia e tusa ma tausaga o totoe. 52  Ae afai e itiiti tausaga o totoe seʻia oo i le tausaga o le Iupelī, e ao ona ia faia se faatatauga mo ia lava ma totogi atu le tupe na faatau ai o ia e tusa ma tausaga o totoe. 53  E ao ona ia auauna pea iā te ia e pei o se tagata faigaluega totogi mai i lea tausaga i lea tausaga; ma ia e faamautinoa e lē pule sauā o ia iā te ia.+ 54  Peitaʻi, afai e lē mafai ona ia faatauina mai o ia lava e tusa ma ia tuutuuga, ona sa‘oloto lea o ia i le tausaga o le Iupelī,+ o ia ma lana fanau* faatasi ma ia. 55  “‘Auā o le fanauga a Isaraelu o a‘u pologa lava i latou. O i latou o aʻu pologa na ou aumaia mai i le atunuu o Aikupito.+ O aʻu o Ieova lo outou Atua.

Faamatalaga Pito i Lalo

Epe., “ona atalii.”
Po o le “o ona toto ma aano.”
Epe., “ona atalii.”