Levitiko 24:1-23

  • Suāuu mo molī o le fale‘ie paia (1-4)

  • Falaoa e laulauina (5-9)

  • Fetogi i maa lē na fetuu i le suafa o le Atua (10-23)

24  Ua fetalai mai pea Ieova iā Mose e faapea:  “Ia e poloaʻi atu i le fanauga a Isaraelu, ia latou aumai iā te oe le suāuu lelei mai i olive ua tuʻi mo molī, ina ia faamalamalama ai pea.+  E ao ona vaai e Arona ua mumū pea molī i luma o Ieova mai i le afiafi seʻia oo i le taeao, i luma o le ʻie puipui o le atolaau o le feagaiga* i le faleʻie o le feiloaʻiga. O le tulafono tumau lenei mo outou ma o outou tupulaga o loo mulimuli mai.  E na te saunia molī i luga o le tuugāmolī+ o auro māoʻi i aso uma lava i luma o Ieova.  “Ia e ave foʻi le falaoamata lelei e fai ai falaoa lapotopoto e 12, ona tao lea. E tatau ona iai le lua vaesefulu o le fua o le efa* i falaoa lapotopoto taʻitasi.  Ia e faia ni faaputuga se lua, e taʻiono falaoa i le faaputuga e tasi,+ ma tuu i luga o le laulau ua faia i le auro māoʻi i luma o Ieova.+  E ao ona e tuu i ai o le lipano lelei i faaputuga taʻitasi, ma ia fai ma falaoa e fai ma sui o le taulaga atoa*+ i le Atua, o le taulaga iā Ieova ua faia i le afi.  O le a ia saunia e lē aunoa falaoa i Sapati ta‘itasi i luma o Ieova.+ O le feagaiga tumau lea ma le fanauga a Isaraelu.  E ao ona fai ma Arona ma ona atalii,+ ma e aai ai i latou i le nofoaga paia,+ auā o se mea e sili ona paia mo ia mai i taulaga iā Ieova ua faia i le afi, o se tuutuuga tumau lea.” 10  Ua iai i le fanauga a Isaraelu le tama tama a se fafine Isaraelu, o ia foʻi o le atalii o se tane Aikupito,+ ma ua fusu le tama a le fafine Isaraelu ma se tamāloa Isaraelu i le togālauapi. 11  Ua amata ona upuleagaina le suafa o le Atua e le tama tama a le fafine Isaraelu ma fetuu i ai.+ Ona latou avatua lea o ia iā Mose.+ O le igoa o lona tinā o Selomita, o le afafine o Kiperi mai i le ituaiga o Tanu. 12  Ua latou tuuina atu o ia ina ia leoleoina seʻia faailoa manino mai iā i latou le faai‘uga a Ieova.+ 13  Ona fetalai mai lea o Ieova iā Mose: 14  “Ia ave lē na fetuu i lo‘u igoa i tua o le togālauapi, ma o i latou uma na faalogo iā te ia, e ao ona faaee o latou lima i luga o lona ulu, ma ia fetogi o ia i maa e le faapotopotoga atoa.+ 15  E te fai atu foʻi i le fanauga a Isaraelu e faapea, ‘Afai e fetuu se tasi i lona Atua, e ao ona ia tali atu mo lana agasala. 16  E ao ona fasiotia lava lē na upuleaga i le suafa o Ieova.+ E fetogia o ia i maa e le faapotopotoga atoa. E faapea lava ona fasiotia le tagata ese e pei o le tagatānuu, ona o le upuleagaina o lea Suafa. 17  “‘Afai e fasi e se tane se isi ma oti ai, e ao lava ona fasiotia o ia.+ 18  A o lē na ia fasimate se manu lata a se isi tagata, e ao ona ia totogi atu lea manu, o le manu e sui ai le manu. 19  Afai ua faamanu‘alia e se tasi lona tuaoi, e pei ona ia faia, ia faapea lava ona faia iā te ia.+ 20  O le gau e sui ai le gau, o le mata e sui ai le mata, o le nifo e sui ai le nifo, o le manu‘a na ia faaoo i lea tagata, o le mea foʻi lea ia faia iā te ia.+ 21  O lē na ia fasimate le manu a se isi tagata, ia totogi atu le manu,+ a o lē na fasia se isi tagata ma oti ai, e ao lava ona fasiotia o ia.+ 22  “‘E tasi le iʻuga o faamasinoga mo outou, e tusa lava po o le tagata ese e aumau, po o le tagatānuu,+ auā o aʻu o Ieova lo outou Atua.’” 23  Ona faamatala atu lea e Mose i le fanauga a Isaraelu, ma ua latou aumaia lē na fetuu i le suafa o le Atua i tua o le togālauapi, ua latou fetogi iā te ia i maa.+ Ua faapea lava ona faia e le fanauga a Isaraelu e pei ona poloaʻi mai ai Ieova iā Mose.

Faamatalaga Pito i Lalo

Epe., “Molimau.”
O le lua vaesefulu o le efa e tusa ma le 4.4 lita. Tagaʻi i le Faa. E14.
Po o le “e avea o se vaega o le taulaga e fai ma faamanatuga.”