Levitiko 2:1-16

  • Taulaga i meaʻai (1-16)

2  “‘Pe afai e aumai e se tasi se taulaga i meaʻai*+ e ofo atu iā Ieova, e ao ona faia lana taulaga i le falaoamata lelei, e tatau foʻi ona ia liligiina i ai le suāuu ma tuu i ai le lipano.*+  E tatau ona ia avatu lenei mea i ositaulaga, o atalii ia o Arona, ma e luluu mai ai e le ositaulaga se luuga o falaoamata lelei faatasi ma le suāuu ma le lipano uma, e ao foʻi ona ia faamū i luga o le fata faitaulaga, e fai ma sui o le taulaga atoa,*+ o le taulaga e faia i le afi, o se manogi lelei lea iā* Ieova.  O mea e totoe mai i le taulaga i meaʻai, e fai mo Arona ma ona atalii,+ o mea ia e sili ona paia+ mai i le taulaga iā Ieova ua faia i le afi.  “‘Pe afai e te aumaia se taulaga i meaʻai ua tao i le ogaumu, e ao ona faia i le falaoamata lelei, o falaoa lapotopoto e lē faafefeteina ua iai sina suāuu, po o falaoa manifinifi e lē faafefeteina ua nini i le suāuu.+  “‘Afai o lau taulaga o se taulaga i meaʻai ua faia i luga o le uʻamea mafolafola,+ ia faia i le falaoamata lelei e lē faafefeteina ua iai sina suāuu.  Ia vaevae i ni vaega ninii, ma e ao ona e liligiina i ai le suāuu.+ O le taulaga lea i meaʻai.  “‘Afai o lau taulaga o se taulaga i meaʻai ua faia i se ulo, ia faia i le falaoamata lelei ma le suāuu.  E ao ona e aumaia iā Ieova taulaga i meaʻai ua faia i ia mea, ma ia avatu i le ositaulaga e na te aumaia le taulaga i autafa o le fata faitaulaga.  E ao i le ositaulaga ona aveese nisi o mea mai i le taulaga i meaʻai ma faamū ai i luga o le fata faitaulaga, e fai ma sui o le taulaga atoa,*+ o le taulaga e faia i le afi, o se manogi lelei lea iā* Ieova.+ 10  O mea e totoe mai i le taulaga i meaʻai, e fai mo Arona ma ona atalii, o mea ia e sili ona paia mai i le taulaga iā Ieova ua faia i le afi.+ 11  “‘E lē tatau ona faia i se mea faafefete+ o so o se taulaga i meaʻai e tou te avatu iā Ieova, auā e lē tatau ona tou faamūina se paluga ua fefete po o le meli i se taulaga iā Ieova ua faia i le afi. 12  “‘E mafai ona outou aumaia na taulaga iā Ieova o se taulaga o uluaʻi fua,+ ae e lē tatau ona faamū ia mea i le fata faitaulaga e fai ma manogi lelei.* 13  “‘E ao ona e faamasima au taulaga uma i meaʻai; ia lē aunoa ona iai le masima, e faamanatu ai iā te oe le feagaiga a lou Atua i au taulaga i meaʻai. Ia e avatu au taulaga uma faatasi ma le masima.+ 14  “‘Afai e te aumaia iā Ieova le taulaga i meaʻai o uluaʻi fua ua matutua, ia e avatu o fatu fou* ua tunu i le afi, o fatu mai i uluaʻi fua ua tuʻi, e fai ma taulaga i meaʻai o uluaʻi fua ua matutua.+ 15  Ia e liligiina i ai le suāuu ma tuu i ai le lipano. O le taulaga lea i meaʻai. 16  Ona faamū lea e le ositaulaga o ia mea e fai ma sui o le taulaga atoa,*+ o nisi o fatu ua tuʻi ma sina suāuu, ma le lipano uma, o se taulaga iā Ieova ua faia i le afi.

Faamatalaga Pito i Lalo

Po o le “taulaga i fatu.” E aofia i ia taulaga o falaoamata lelei, o fatu ua tunu, o falaoa lapotopoto, o falaoa manifinifi ua tao, pe faia i luga o uʻamea mafolafola, pe falai i le gaʻo.
Tagaʻi i le Uiga o Upu.
Po o le “e avea o se vaega o le taulaga e fai ma faamanatuga.”
Po o le “manogi ua faamalieina ai.”
Po o le “manogi ua faamalieina ai.”
Po o le “e avea o se vaega o le taulaga e fai ma faamanatuga.”
Po o le “ma manogi e faamalieina ai.”
Po o le “avatu fatu ua vaivai.”
Po o le “e avea o se vaega o le taulaga e fai ma faamanatuga.”