Levitiko 17:1-16

  • Fale‘ie paia, le nofoaga mo taulaga (1-9)

  • Faasā ona ‘aina le toto (10-14)

  • Tulafono mo manu e maua atu ua mamate (15, 16)

17  Ua fetalai mai foʻi Ieova iā Mose:  “Ia e fai atu iā Arona ma ona atalii, atoa ma le fanauga uma a Isaraelu, ma faapea atu iā i latou, ‘O le mea lenei na poloaʻi mai ai Ieova:  “ʻ“O so o se tagata o le nuu o Isaraelu e na te fasi se povi poʻa, po o se tamaʻi mamoe poʻa, po o se ʻoti i le togālauapi pe fasi foʻi i fafo o le togālauapi,  ae e lē aumaia i le faitotoʻa o le faleʻie o le feiloaʻiga, ina ia avatu e fai ma taulaga iā Ieova i luma o le faleʻie paia o Ieova, e nofosala lea tagata i le toto. Ua ia faamasaatoto, ma e ao ona fasiotia o ia.  Ia faia faapea ina ia aumaia ai e le fanauga a Isaraelu taulaga ia ua masani ona latou faia i le laufanua, ma e ao ona latou aumai iā Ieova, i le faitotoʻa o le faleʻie o le feiloaʻiga i le ositaulaga. E ao ona latou avatu ia taulaga e fai ma taulaga faifaatasi iā Ieova.+  E sausau e le ositaulaga le toto i luga o le fata faitaulaga a Ieova i le faitotoʻa o le faleʻie o le feiloaʻiga, ma susunu ai le gaʻo, o se manogi lelei lea iā* Ieova.+  E lē tatau ona latou toe faia taulaga i temoni*+ o ē ua latou faia i ai faiga faatalitane.+ E fai lenei mea ma tulafono tumau mo outou, i o outou tupulaga o loo mulimuli mai.”’  “E te fai atu foʻi iā i latou, ‘O so o se tasi o le nuu o Isaraelu, po o se tagata ese lea e aumau iā te outou, e na te faia se taulaga mū po o se isi taulaga  ae e lē aumaia i le faitotoʻa o le faleʻie o le feiloaʻiga e avatu ai iā Ieova, e tatau ona fasiotia o ia.+ 10  “‘O so o se tasi o le nuu o Isaraelu po o se tagata ese lea e aumau iā te outou e na te ʻaina so o se toto,+ ou te teena lea tagata ua ʻai i le toto, ma ou te fasiotia o ia. 11  Auā o le ola o le meaola ua iai i lona toto,+ ma ua ou tuuina le toto i luga o le fata faitaulaga+ mo outou e fai ai le togisala mo outou,* auā o le toto e fai ai le togisala+ ona ua iai le ola i le toto. 12  O le mea lea, ua ou fai atu ai i le fanauga a Isaraelu: “Aua lava neʻi ʻai se tasi o outou i le toto ma aua foʻi neʻi ʻai ai se tagata ese o aumau iā te outou+ i le toto.”+ 13  “‘O so o se tasi o le fanauga a Isaraelu, po o se tagata ese o aumau iā te outou e alu e tuli manu ma maua se manu o le vao, po o se manulele e ʻaina, e ao ona ia faaalu lona toto+ ma tanu i le eleele. 14  Auā o le ola o ituaiga uma o meaola, o lona toto lea, ona ua iai le ola i le toto. O le mea lea, ua ou fai atu ai i le fanauga a Isaraelu: “Aua tou te aai i le toto o ituaiga uma o meaola, auā o le ola o so o se ituaiga o meaola, o lona toto lea. E fasiotia so o se tasi e ʻai ai.”+ 15  O so o se tasi e ʻai i le aano o se manu e maua atu ua mate po o se manu ua saeia e se manu o le vao,+ e tusa po o se tagatānuu po o se tagata ese, e ao ona ia tatā ona ofu, ma tāʻele i le vai, ma e lē mamā o ia seʻia oo i le afiafipō;+ ona mamā ai lea o ia. 16  Ae afai e na te lē tatāina ona ofu ma lē tāʻele o ia,* e ao ona ia tali atu mo lana mea sesē.’”+

Faamatalaga Pito i Lalo

Po o le “manogi ua faamalieina ai.”
Epe., “ʻoti.” Atonu na manatu i latou na tapuaʻi i ai o ni meaola taufulufulua ma foliga e pei o ni ʻoti poʻa.
Po o le “togisala mo o outou ola.”
Epe., “lona tino.”