Levitiko 15:1-33

  • Vavale e lē mamā ai mai i totogasā (1-33)

15  Ua fetalai mai pea Ieova iā Mose ma Arona e faapea:  “Ia fai atu i le fanauga a Isaraelu, ma faapea atu iā i latou, ‘Afai e sau se vavale mai i totogasā* o se tane, o lenei vavale e lē mamā ai o ia.+  E lē mamā o ia ona o le vavale, e tusa pe e sau pea le vavale mai i ona totogasā po ua punitia, e lē mamā lava o ia.  “‘E lē mamā so o se moega e taoto ai lē ua sau ai le vavale, ma e lē mamā foʻi so o se mea e saofaʻi ai o ia.  O se tagata e paʻi i lona moega e ao ona tatā ona ofu ma tāʻele i le vai, ma e lē mamā o ia seʻia oo i le afiafipō.+  O so o se tasi e nofo i luga o se mea na nofo ai lē ua sau ai le vavale, e ao ona tatā ona ofu ma tāʻele i le vai, ma e lē mamā o ia seʻia oo i le afiafipō.  O so o se tasi e paʻi i le tino o lē ua sau ai le vavale, e ao ona ia tatā ona ofu ma tāʻele i le vai, ma e lē mamā o ia seʻia oo i le afiafipō.  Afai e feanu o lē ua sau ai le vavale i se tasi e mamā, e ao i lea tagata ona tatā ona ofu ma tāʻele i le vai, ma e lē mamā o ia seʻia oo i le afiafipō.  E lē mamā foʻi so o se nofoa o se manu na tiʻetiʻe ai lē ua sau ai le vavale. 10  O se tasi e paʻi i se mea na nofo ai o ia, e lē mamā seʻia oo i le afiafipō, ma o lē na te aveina na mea e ao ona tatā ona ofu ma tāʻele i le vai, ma e lē mamā o ia seʻia oo i le afiafipō. 11  Afai e leʻi fufuluina i le vai lima o lē ua sau ai le vavale+ ma ua ia pa‘i i se isi tagata, e ao i lea tagata ona tatā ona ofu ma tāʻele i le vai, ma e lē mamā o ia seʻia oo i le afiafipō. 12  Afai e paʻi lē ua sau ai le vavale i se tanoa omea, e ao ona nutililiia, ae afai o se tanoa laau, e ao ona fufulu i le vai.+ 13  “‘Afai ua uma ona sau o le vavale o lea tane ma ua mamā ai, ona ia faitau lea o aso e fitu mo lona faamamāina, ma e ao ona ia tatā ona ofu ma tāʻele i le vai mai i le vaipuna, ona mamā ai lea o ia.+ 14  I le aso lona valu, e tatau ona ia ave ni manutagi se lua po o ni tamaʻi lupe+ se lua, ma ia alu i luma o Ieova i le faitotoʻa o le faleʻie o le feiloaʻiga, ma avatu ai i le ositaulaga. 15  E osi e le ositaulaga le taulaga i ia mea, o le tasi mo le taulaga o agasala, a o le isi mo le taulaga mū, ma e fai e le ositaulaga le togisala mo ia i luma o Ieova, ona o le vavale ua sau mai iā te ia. 16  “‘Afai e sau le sua o se tane, e ao ona tāʻele lona tino atoa i le vai ma e lē mamā o ia seʻia oo i le afiafipō.+ 17  E ao ona ia tatā i le vai o so o se ofu po o so o se paʻu e alu i ai le sua, ma e lē mamā ai seʻia oo i le afiafipō. 18  “‘Pe a momoe se tane ma se fafine ma ua alu i ai le sua, e ao ona la tāʻeele i le vai ma e lē mamā ai seʻia oo i le afiafipō.+ 19  “‘Afai e sau le toto mai i se fafine, e faaauau ona lē mamā o ia ona o lona maʻi masina i aso e fitu.+ O se tasi foʻi e paʻi iā te ia, e lē mamā seʻia oo i le afiafipō.+ 20  O so o se mea e taoto ai o ia, e lē mamā ona o lona maʻi masina, ma o mea uma lava e saofaʻi ai o ia, e lē mamā.+ 21  O se tasi e paʻi i lona moega, e ao ona tatā ona ofu ma tāʻele i le vai, ma e lē mamā o ia seʻia oo i le afiafipō. 22  O se tasi e paʻi i se mea na nofo ai o ia, e ao ona tatā ona ofu ma tāʻele i le vai, ma e lē mamā o ia seʻia oo i le afiafipō. 23  Afai na nofo le fafine i luga o le moega po o se isi lava mea ae paʻi i ai se tasi, e lē mamā o ia seʻia oo i le afiafipō.+ 24  Pe afai e momoe le tane ma le fafine, ae alu ai le toto o lona maʻi masina ma oo atu i le tane,+ e lē mamā le tane i aso e fitu, atoa foʻi ma so o se moega e taoto ai o ia. 25  “‘Afai e alu le toto o se fafine mo le tele o aso+ ae lē o le taimi lea mo lona maʻi masina,+ pe afai foʻi e umi ona alu lona maʻi masina nai lo o le mea e masani ai, e lē mamā o ia i aso uma e alu ai lona toto, e pei foʻi o aso o lona maʻi masina. 26  O so o se moega e taoto ai o ia i aso o loo alu ai lona toto, o le a pei lava o le moega i le taimi o lona maʻi masina,+ ma o so o se mea e saofaʻi ai o ia e lē mamā, e pei ona lē mamā o ia i le taimi o lona maʻi masina. 27  O se tasi e paʻi i ia mea e lē mamā ai, ma e ao ona ia tatā ona ofu ma tāʻele i le vai, ma e lē mamā o ia seʻia oo i le afiafipō.+ 28  “‘Ae afai ua uma le alu o lona toto, ona ia faitau lea o aso e fitu, a mavae lea ona mamā ai lea o ia.+ 29  I le aso lona valu, e tatau ona ia ave ni manutagi se lua po o ni tamaʻi lupe+ se lua, ma avatu i le ositaulaga i le faitotoʻa o le faleʻie o le feiloaʻiga.+ 30  E osi e le ositaulaga le taulaga o agasala i le tasi manulele a o le isi e fai ai le taulaga mū, ma e fai e le ositaulaga le togisala mo ia i luma o Ieova, ona o le alu o lona toto lea na lē mamā ai o ia.+ 31  “‘E ao ona oulua fesoasoani i le fanauga a Isaraelu ina ia mamā i latou ma lē feoti ai ona o le faaleagaina o loʻu faleʻie paia, lea e iai i le mea o loo latou nonofo ai.+ 32  “‘O le tulafono lenei e faatatau i le tane ua sau le vavale mai iā te ia, le tane e lē mamā ona o le sua e sau mai iā te ia,+ 33  le fafine ua lē mamā ona o lona maʻi masina,+ o so o se tane po o se fafine e sau se mea mai i lona tino,+ ma se tamāloa ua momoe ma se fafine ua lē mamā.’”

Faamatalaga Pito i Lalo

Epe., “i le tino.”