Levitiko 13:1-59

  • Tulafono e faatatau i le lepela (1-46)

  • Faaleagaina ofu i le lepela (47-59)

13  Ua toe fetalai mai Ieova iā Mose ma Arona e faapea:  “Afai e oso i le pa‘u* o se tagata se fula, se paʻupaʻu, po o se ila, ma ua iʻu ina maua ai le maʻi o le lepela*+ i lona pa‘u, e ao ona avatu o ia iā Arona le ositaulaga, po o se tasi o ona atalii, o ositaulaga ia.+  E ao ona vaai i ai le ositaulaga i le maʻi ua i lona paʻu. Afai ua liu papaʻe fulufulu i le mea ua iai le maʻi, ma ua iloa ua sosolo le maʻi i le aano, o le maʻi lea o le lepela. E ao i le ositaulaga ona vaai i ai, ma faailoa atu ua lē mamā o ia.  Ae afai e paʻepaʻe le ila i lona paʻu, ma ua iloa ua lē sosolo i le aano, ma ua lē liu papaʻe fulufulu, e ao i le ositaulaga ona faanofoesea le tagata ma‘i mo aso e fitu.+  E ao i le ositaulaga ona vaai iā te ia i le aso lona fitu, ma afai e foliga mai ua teʻa le maʻi, ua lē sosolo i le paʻu, e ao i le ositaulaga ona faanofoesea o ia mo isi aso e fitu.  “E ao i le ositaulaga ona toe vaai iā te ia i le aso lona fitu, afai ua tau vaivai le lanu o le maʻi, ma ua lē sosolo i le paʻu, e ao i le ositaulaga ona taʻu atu ua mamā o ia;+ ua na o se paʻupaʻu. E ao ona ia tatā ona ofu ma mamā ai.  Ae afai e sosolo lava le paʻupaʻu* i le paʻu ae ua uma ona alu atu i le ositaulaga, ma ua uma ona taʻu atu ua mamā o ia, e ao ona ia toe alu atu i luma o le ositaulaga.  E ao i le ositaulaga ona vaai i ai, ma afai ua sosolo le paʻupaʻu i le paʻu, e ao i le ositaulaga ona faailoa atu ua lē mamā o ia. O le lepela lea.+  “Afai e maua se tagata i le maʻi o le lepela, e ao ona avatu o ia i le ositaulaga, 10  ma e ao i le ositaulaga ona vaai i ai.+ Ae afai ua paʻepaʻe se fula i le paʻu, ma ua liu papaʻe fulufulu, ma ua pā+ le fula, 11  e tugā le lepela i lona paʻu, ma e ao i le ositaulaga ona faailoa atu ua lē mamā o ia. E lē manaʻomia ona faanofoesea o ia+ ina ia toe vaai o ia, auā ua lē mamā o ia. 12  Ae afai ua matuā sosolo le lepela i le paʻu, ma ua lilofia uma ai le paʻu o se tasi ua maua i le maʻi e mai i lona ulu e oo i ona vae, i mea uma ua vaai i ai le ositaulaga, 13  ma ua vaai i ai le ositaulaga ma iloa ua lilofia lona pa‘u i le lepela, ona ia faailoa atu lea ua mamā le tagata maʻi. Ua liu paʻepaʻe uma le lepela, ma ua mamā o ia. 14  Ae o le aso e iloa ai ua tōtō aano le maʻi, ua lē mamā o ia. 15  Pe a vaai le ositaulaga i le tōtō aano, e ao ona ia faailoa atu ua lē mamā o ia.+ E lē mamā le tōtō aano. O le lepela lea.+ 16  Ae afai foʻi ua toe liu paʻepaʻe le tōtō aano, e ao ona ia alu atu i le ositaulaga. 17  E ao i le ositaulaga ona vaai o ia,+ ma afai ua liu paʻepaʻe le maʻi, ona faailoa atu lea e le ositaulaga ua mamā le tagata maʻi. Ua mamā lava o ia. 18  “A faapea e oso se maʻi sua i le pa‘u o se tasi ae ua pē, 19  ae ua oso aʻe ai se fula paʻepaʻe po o se ila mūmū paʻepaʻe i le mea sa iai le maʻi sua, e ao ona ia faaali atu i le ositaulaga. 20  E ao i le ositaulaga ona vaai i ai,+ ma afai e sosolo i le aano ma ua liu papaʻe fulufulu, e ao i le ositaulaga ona faailoa atu ua lē mamā o ia. O le maʻi lepela lea ua oso aʻe i le mea sa iai le maʻi sua. 21  Ae afai e vaai i ai le ositaulaga ma ua leai ni fulufulu papaʻe ua iai, ma e lē sosolo foʻi i le aano ma ua vaivai le lanu, e ao i le ositaulaga ona faanofoesea o ia mo aso e fitu.+ 22  Ae afai e sosolo lava i le paʻu, e ao i le ositaulaga ona faailoa atu ua lē mamā o ia. O le faamaʻi lea. 23  Ae afai ua gata le ila i lea mea ma e lē o sosolo, o lona uiga o le mūmū lea o le maʻi sua, ma e ao i le ositaulaga ona faailoa atu ua mamā o ia.+ 24  “Afai e iai se maʻila i le paʻu o se tasi mai i se mū i le afi, ma ua avea le tōtō aano o le maʻila ma ila paʻepaʻe pe mūmū paʻepaʻe foʻi, 25  e ao i le ositaulaga ona vaai i ai. Afai ua liu papaʻe fulufulu ua iai le ila ma ua iloa ua sosolo i le aano, o le lepela lea ua oso mai i le maʻila, ma e ao i le ositaulaga ona faailoa atu ua lē mamā o ia. O le faamaʻi lea o le lepela. 26  Ae afai e vaai i ai le ositaulaga, ma iloa ua leai ni fulufulu papaʻe i le ila, ma e lē o sosolo foʻi i le aano ae ua vaivai le lanu, e ao i le ositaulaga ona faanofoesea o ia mo aso e fitu.+ 27  E ao i le ositaulaga ona vaai o ia i le aso lona fitu, ma afai ua sosolo lava le lepela i le pa‘u, e ao i le ositaulaga ona faailoa atu ua lē mamā o ia. O le faamaʻi lea o le lepela. 28  Ae afai ua gata le ila i lea mea, ma e leʻi sosolo i le pa‘u ma ua vaivai le lanu, ua na o se fula i le maʻila, ma e ao i le ositaulaga ona faailoa atu ua mamā o ia, auā o le mūmū lea o le maʻila. 29  “Pe a iai se tamāloa po o se fafine e oso ai le maʻi i lona ulu po o lona auvae, 30  e ao i le ositaulaga ona vaai i le maʻi.+ A faapea ua iloa ua sosolo i le aano, ua samasama lauulu* ma ua valavala, e ao i le ositaulaga ona faailoa atu ua lē mamā lenā tagata; o le ma‘i lea o lauulu po o le ‘ava. O le lepela lea o le ulu po o le auvae. 31  Ae afai e vaai le ositaulaga i le maʻi ma iloa ai ua lē sosolo i le aano, ua leai foʻi ni lauulu po o ni fulufulu uliuli, e ao i le ositaulaga ona faanofoesea le tagata maʻi mo aso e fitu.+ 32  E ao i le ositaulaga ona vaai i le maʻi i le aso lona fitu, ma afai ua lē sosolo le ma‘i ma ua lē tutupu ai ni lauulu sasama, ma ua iloa fo‘i e lē o sosolo i le aano le ma‘i, 33  e ao i le tagata ona sele ese ona lauulu po o lana ʻava, ae e lē seleina le mea o iai le ma‘i. Ona faanofoesea lea e le ositaulaga o le tagata ma‘i mo aso e fitu. 34  “E ao i le ositaulaga ona toe vaai i le mea o oso ai le ma‘i i le aso lona fitu, ma afai e lē sosolo le ma‘i o lauulu ma le ‘ava i le paʻu, ma ua iloa e lē o sosolo i le aano, e ao i le ositaulaga ona faailoa atu ua mamā o ia, ma e ao ona ia tatā ona ofu ma mamā ai o ia. 35  Ae afai e sosolo lava le ma‘i i le paʻu ina ua uma ona faamamāina o ia, 36  e ao la i le ositaulaga ona vaai o ia, ma afai ua sosolo le ma‘i i le paʻu, e lē manaʻomia ona sa‘ili e le ositaulaga ni fulufulu po o lauulu sasama; ua lē mamā lea tagata. 37  Ae afai e iloa ane ua lē toe sosolo le ma‘i ma ua tutupu ai lauulu uliuli, ua teʻa la le ma‘i. Ua mamā o ia, ma e ao i le ositaulaga ona faailoa atu ua mamā o ia.+ 38  “Afai e tupu ni ila i le paʻu* o se tamāloa po o se fafine, ma o ni ila papaʻe, 39  e ao i le ositaulaga ona vaai i ai.+ Afai o ila i le paʻu e paʻepaʻe vaivai, e lē o se maʻi leaga ua tupu mai i le paʻu. E mamā lea tagata. 40  “Afai e toʻulu lauulu o se tamāloa ma tula ai, e mamā o ia. 41  Afai e toʻulu lauulu o lona muāulu, ma tula ai lona muāulu, e mamā o ia. 42  Ae afai e tupu se maʻi mūmū paʻepaʻe i le tula o lona tumuaʻi po o lona muāulu, o le lepela lea i lona tumuaʻi po o lona muāulu. 43  E ao i le ositaulaga ona vaai iā te ia, ma afai e tupu mai ai se fula mūmū paʻepaʻe i le tula o lona tumuaʻi po o lona muāulu, ma e pei o le lepela i lona paʻu, 44  o le tagata lava lea ua lepela. Ua lē mamā o ia, ma e ao i le ositaulaga ona faailoa atu ua lē mamā lava o ia, ona o le ma‘i i lona ulu. 45  A o le tagata lepela ua iai le maʻi, e ao ona saeia ona ofu ma lē teuina lona ulu, ma e ao ona ia ufiufi i lana ʻavaaluga ma valaau atu, ‘E lē mamā, e lē mamā!’ 46  E lē mamā o ia i aso uma lava e iai iā te ia le maʻi. Ona ua lē mamā o ia, e ao ai ona nofo ese o ia. E nofo o ia i tua o le togālauapi.+ 47  “Afai ua faaleagaina se ofu i le ma‘i o le lepela, e tusa po o se ofu fulufulu mamoe po o se ofu lino, 48  po o filo faalalava po o filo faatutū o le ʻie lino po o le ʻie fulufulu mamoe, po o le paʻu po o so o se mea e faia i le paʻu, 49  ma se pisia mai i le faama‘i e samasama meamata pe e mūmū ua faaleagaina ai se ofu, o le paʻu, o filo faalalava, o filo faatutū, po o so o se mea e faia i le paʻu, o se mea lea ua faaleagaina i le lepela, ma e ao ona faaali i le ositaulaga. 50  E ao i le ositaulaga ona su‘esu‘e le faama‘i, ma tuuesea lea mea mo aso e fitu.+ 51  Pe a ia su‘esu‘eina le faama‘i i le aso lona fitu ma iloa ai ua sosolo i le ofu, o filo faalalava, o filo faatutū, po o le paʻu (e tusa po o le ā e faaaogā i ai le pa‘u), o le lepela aati lea ma e lē mamā.+ 52  E ao ona ia susunu le ofu po o filo faalalava po o filo faatutū i le ʻie fulufulu mamoe po o le ʻie lino, po o so o se mea e faia i le paʻu lea ua iai le faama‘i, auā o le lepela aati lea. E ao ona susunu i le afi. 53  “Ae afai e su‘esu‘e e le ositaulaga, ma e lē o sosolo le faama‘i i le ofu, po o filo faalalava po o filo faatutū, po o so o se mea e faia i le paʻu, 54  ona faatonuina lea e le ositaulaga le tāina o le mea ua faaleagaina, ma e na te tuuesea lea mea mo isi aso e fitu. 55  E ao i le ositaulaga ona su‘esu‘e le mea ua faaleagaina ina ua uma ona tā mamā. Afai e lē suia foliga o le mea na faaleagaina e ui e lē o sosolo le faama‘i, e lē mamā lava. E ao ona e susunuina i le afi, ona ua vavala le pito i fafo po o le pito i totonu o le ofu. 56  “Ae afai ua su‘esu‘e e le ositaulaga, ma ua vaivai le lanu o le mea ua faaleagaina ina ua uma ona tā mamā, ona ia saeia ese lea o le vaega ua faaleagaina o le ofu, po o le paʻu po o filo faalalava po o filo faatutū. 57  Ae afai o loo iai pea i se isi vaega o le ofu po o filo faalalava po o filo faatutū, po o so o se mea e faia i le paʻu, ma o loo sosolo pea, e ao ona e susunuina i le afi o so o se mea ua faaleagaina.+ 58  Ae pe a alu ese le mea ua faaleagaina mai i le ofu po o filo faalalava po o filo faatutū po o so o se mea e faia i le paʻu na e tāina, e ao ona toe tāina, ona mamā ai lea. 59  “O le tulafono lenei i le ma‘i o le lepela i ofu fulufulu mamoe, po o ʻie lino, po o filo faalalava po o filo faatutū, po o so o se mea e faia i le paʻu, ina ia faailoa atu ai e mamā pe e lē mamā.”

Faamatalaga Pito i Lalo

Epe., “paʻu o le tino.”
O le upu Eperu ua faaliliuina “lepela” e lautele lona uiga ma e mafai ona aofia ai faamaʻi eseese o le paʻu ia e pipisi. E ono mafai foʻi ona aofia ai siama e maua i ofu ma totonu o fale.
Po o “le maʻi.”
Po o “le ʻava.”
Epe., “paʻu o le tino.”