Levitiko 1:1-17

  • Taulaga mū (1-17)

1  Ua valaau foʻi Ieova iā Mose, ua fetalai mai iā te ia mai i le faleʻie o le feiloaʻiga+ e faapea:  “Ia fai atu i le fanauga a Isaraelu,* ia e faapea atu iā i latou, ‘Ai se tasi o outou e aumaia sana taulaga mo Ieova mai i manu lalata, e ao ona aumaia a outou taulaga mai i le lafumanu po o le lafu mamoe.+  “‘Afai o lana taulaga o se taulaga mū mai i le lafumanu, e ao ona ia aumaia se manu poʻa e matuā lelei lava.+ E na te aumaia ma lona lotomalie+ i luma o Ieova o lana taulaga, i le faitotoʻa o le faleʻie o le feiloaʻiga.  E tatau ona ia faaee lona lima i luga o le ulu o le manu e fai ai le taulaga mū, ma e taliaina mo ia ina ia faamagalo ai ana agasala.  “‘Ona fasi ai lea o le tamaʻi povi poʻa i luma o Ieova, ma e avatu e ositaulaga,+ o atalii ia o Arona le toto, ma sausau i itu uma o le fata faitaulaga+ lea e i luma o le faitotoʻa o le faleʻie o le feiloaʻiga.  E tatau ona saeese le paʻu o le manu o le taulaga mū ma vaevae i vaega.+  O ositaulaga, o atalii ia o Arona, e latou te aumaia le afi i luga o le fata faitaulaga+ ma faatulaga fafie e faamumū ai le afi.  E tatau foʻi i ositaulaga, o atalii ia o Arona, ona faatulaga vaega+ e aofia ai le ulu ma le gaʻo* i luga o fafie ua mumū, ia ua i luga o le fata faitaulaga.  Ae ia fufulu ona gaʻau ma ona vae* i le vai, ma e tatau i le ositaulaga ona faamū ia mea uma i luga o le fata faitaulaga o le taulaga mū, o le taulaga e fai i le afi, o se manogi lelei lea iā* Ieova.+ 10  “‘Afai o lana taulaga mo le taulaga mū e mai i le lafu,+ e ao ona ia avatu se tamaʻi mamoe poʻa po o se ʻoti poʻa, e matuā lelei lava.+ 11  E tatau ona fasi le manu i le itu i mātū o le fata faitaulaga i luma o Ieova, ona sausau lea e ositaulaga, o atalii ia o Arona, le toto i itu uma o le fata faitaulaga.+ 12  E na te penaina le manu i vaega, o lona ulu ma le gaʻo,* ma e ao foʻi i le ositaulaga ona faatulaga ia mea i luga o fafie ua mumū, ua i luga o le fata faitaulaga. 13  E na te fufuluina foʻi gaʻau ma vae* i le vai, ma e avatu e le ositaulaga ia mea uma ma susunu i luga o le fata faitaulaga. O le taulaga mū, o le taulaga e fai i le afi, o se manogi lelei lea iā* Ieova. 14  “‘Ae afai o lana taulaga o se taulaga mū iā Ieova e mai i manulele, e na te avatu lana taulaga mai i manutagi po o tamaʻi lupe.+ 15  E tatau i le ositaulaga ona avatu le manulele i le fata faitaulaga ma sesele lona ua, ma susunu i luga o le fata faitaulaga, a o lona toto e ao ona faaalu ese i le itu o le fata faitaulaga. 16  E tatau ona ia aveesea lona tagāʻai ma ona fulufulu, ma lafo i autafa o le fata faitaulaga i le itu i sasaʻe, o le mea e tuu ai lefulefu.*+ 17  E na te tipiina le tino o le manu i ona apaʻau, ae e na te lē vaeluaina. E ao i le ositaulaga ona susunu i luga o le fata faitaulaga i luga o fafie o loo mumū. O le taulaga mū, o le taulaga e fai i le afi, o se manogi lelei lea iā* Ieova.

Faamatalaga Pito i Lalo

Epe., “i atalii o Isaraelu.”
Po o le “gaʻo o fatugaʻo.”
Po o le “manogi ua faamalieina ai.”
E faasino atu i le vaega pito i lalo o le tulivae agaʻi i lalo.
Po o le “gaʻo o fatugaʻo.”
E faasino atu i le vaega pito i lalo o le tulivae agaʻi i lalo.
Po o le “manogi ua faamalieina ai.”
Po o “lefulefu ua gaʻoa,” e faasino atu i lefulefu ua gaʻoa mai i taulaga.
Po o le “manogi ua faamalieina ai.”