Kenese 16:1-16

  • Akara ma Isamaeli (1-16)

16  Ua lē fanau+ Sarai le avā a Aperamo, ae e iai sana auauna, o ia o se Aikupito, o Akara+ lona igoa.  Ona fai atu lea o Sarai iā Aperamo: “Faamolemole, seʻi faalogo mai ia iā te aʻu! Ua taofia aʻu e Ieova mai i le fanauina o se fanau. Ia lua momoe ma laʻu auauna. Atonu ou te maua ai ni fanau mai iā te ia.”+ Ua faalogo Aperamo iā Sarai.  Ina ua mavae le sefulu tausaga talu ona nofo Aperamo i Kanana, ona avatu ai lea e Sarai, le avā a Aperamo, o Akara lana auauna o le Aikupito, i lana tane o Aperamo e fai ma ana avā.  Ua feusuaʻi Aperamo ma Akara ona tō ai lea o ia. Ina ua ia iloa ua tō o ia, ona ia manatu faatauvaa ai lea i lona matai fafine.  Ona fai atu lea o Sarai iā Aperamo: “O oe ua māfua ai le puapuaga ua oo iā te aʻu. Na ou avatu laʻu auauna iā te oe,* ae ina ua ia iloa ua tō o ia, ona ia manatu faatauvaa ai lea iā te aʻu. Tau ina ia faamasino e Ieova po o ai o i taʻua e saʻo.”  Ua tali mai Aperamo iā Sarai: “Vaai oe! Ua iā te oe le pule i lau auauna. Faitalia lava oe i se mea e te faia iā te ia.” Ona faalumaina lea e Sarai o ia, ona sola ese ai lea o ia mai iā Sarai.  Mulimuli ane, ona maua lea o ia e le agelu a Ieova i se vaipuna i le toafa, o le vaipuna lea i le ala i Sura.+  Ua ia fai atu: “Akara e, le auauna a Sarai, o fea e te sau ai, ma o fea a e agaʻi atu i ai?” Ona fai mai lea o Akara: “Ua ou sola ese mai iā Sarai loʻu matai fafine.”  Ua toe faapea atu le agelu a Ieova iā te ia: “Ia e toe foʻi atu nei i lou matai fafine, ma ia e faamaulalo atu iā te ia.” 10  Ona faapea atu lea o le agelu a Ieova iā te ia: “Ou te matuā faatoʻateleina lau fanau, o le a lē mafai ai ona faitaulia ona o le toʻatele.”+ 11  Ua toe faapea atu le agelu a Ieova: “O lenā ua e tō, e te fanau mai se tama tama, ma e te faaigoa iā te ia o Isamaeli,* auā ua faafofogaina e Ieova lou tagiauē. 12  O le a pei o ia o se asini vao.* E tetee atu o ia i tagata uma, ma e tetee mai foʻi tagata uma iā te ia, ma e nofo o ia e latalata i ona uso uma.”* 13  Ona valaau lea o Akara i le suafa o Ieova, o lē ua fetalai mai iā te ia: “O oe o le Atua e silafia mea uma,”+ ma ua ia faapea ifo iā te ia lava: “Po ua ou vaai ea i lē ua silasila mai iā te aʻu?” 14  O le mea lea ua taʻua ai lea vaieli o Pere-laaroi.* (Ua iai i le vā o Katesa ma Pereta.) 15  Ona fanaua lea e Akara o se tama tama mai iā Aperamo, ma ua faaigoa e Aperamo lona atalii lea na fanaua e Akara, o Isamaeli.+ 16  E 86 tausaga o Aperamo, ina ua fanaua e Akara o Isamaeli mai iā te ia.

Faamatalaga Pito i Lalo

Epe., “i lou fatafata.”
Lona uiga “Ua Faafofogaina e le Atua.”
E manatu nisi e faasino atu i se solofanua tusitusi. Atonu e māfua ona o ona uiga tutoʻatasi.
Pe atonu “e nofo o ia ma le feʻainaʻi ma ona uso uma.”
Lona uiga “O le Vaieli o Lē o Loo Soifua ma o Loo Silasila Mai iā te Aʻu.”