Iosua 7:1-26
7 Ae ua lē faamaoni le fanauga a Isaraelu e tusa ai ma mea e tatau ona faaumatia, ina ua ave e Akana+ le atalii o Karame, o le atalii lea o Sapati, o le atalii o Sera, o le ituaiga o Iuta, nisi o mea na tatau ona faaumatia.+ O le mea lea na matuā toʻasā ai Ieova i le fanauga a Isaraelu.+
2 Ona aauina atu lea e Iosua o ni tamāloloa mai i Ieriko e ō i Ai,+ lea e lata ane i Petavene i le itu i sasaʻe o Peteli,+ ma faapea atu: “Inā ō atu faalilolilo ia e mataʻi le nuu.” Ona ō faalilolilo ai lea o tamāloloa e mataʻi le nuu o Ai.
3 Ina ua latou toe foʻi mai iā Iosua, na latou faapea mai: “E lē manaʻomia ona ō aʻe uma le ‘autau. Ia ō aʻe tau o se 2,000 pe 3,000 tagata e faatoʻilaloina Ai. Aua le faatigāina fua le ‘autau i le ō atu uma i inā, auā e to‘aitiiti tagata o le nuu.”
4 Ona ō atu ai lea i inā o le ‘autau e pe tusa ma le toʻa 3,000, ae ua latou sosola ese mai i luma o tagata o Ai.+
5 Ona fasiotia lea e tagata o Ai o le toʻa 36 o i latou, ma tuliloa iā i latou e amata mai i le faitotoʻa o le aai e faaifo atu i Separema,* ma faaauau pea ona fasia i latou i le ala. Ona vaivai ai lea o loto o le fanauga a Isaraelu e pei ua liusuāvai.
6 Ona saeia lea e Iosua o lona ofu, ma faapaʻū faō i le eleele i luma o le Atolaau a Ieova seʻia oo i le afiafipō, o ia ma toeaina o Isaraelu, ma ua latou asu aʻe pea efuefu i luga o o latou ulu.
7 Ona faapea atu lea o Iosua: “Auē, le Alii Pule Silisili Ese Ieova e, aiseā na e aumaia mamao ai lenei nuu e sopoʻia mai le vaitafe o Ioritana, ina ia tuuina atu i matou i lima o tagata Amorī e faaumatia ai? Ma‘imau pe ana matou nonofo pea i le isi itu* o Ioritana!
8 Ieova e, faamolemole, o le ā laʻu tala o le a fai atu ina ua liliu ma sosola ese Isaraelu mai i luma o ona fili?
9 Pe a faalogo tagata Kanana ma ē uma o loo nonofo i le nuu i lenei mea, ona latou siʻomia lea o i matou ma soloia lo matou igoa mai i le lalolagi; ae o le a faapefea lou suafa silisili?”+
10 Ona fetalai mai lea o Ieova iā Iosua: “Inā e tulaʻi ia! Aiseā ua e faō ai faapena?
11 Ua agasala Isaraelu ma ua latou solia foʻi laʻu feagaiga+ na ou poloaʻi atu ai iā i latou ina ia tausia; ua latou ave nisi o mea e tatau ona faaumatia,+ ua latou gaoia+ ma ua nanā foʻi ma tuufaatasi ma a latou oloa.+
12 O lea, o le a lē mafai ona tutū atu le fanauga a Isaraelu i o latou fili. O le a latou liliu ma sosola ese mai i luma o o latou fili, auā ua tatau ona faaumatia i latou. Ou te lē toe faatasi atu iā te outou, seʻi vaganā ua faaumatia lē e tatau ona faaumatia o loo iā te outou.+
13 Inā tulaʻi ia! Ia saunia* le nuu+ ma ia e faapea atu, ‘Inā sauni* ia outou mo taeao, auā o le mea lea ua fetalai mai ai Ieova le Atua o Isaraelu: “Isaraelu e, o loo iā te outou lē e tatau ona faaumatia. E lē mafai lava ona outou tutū atu i o outou fili, seʻia outou aveesea lē e tatau ona faaumatia o loo iā te outou.
14 Ia outou faapotopoto mai i le taeao e tusa ai ma ituaiga, ma o le ituaiga e filifilia e Ieova,+ ia faalatalata mai, o le puiaiga e filifilia e Ieova, ia faalatalata mai, ma o le aiga e filifilia e Ieova, ia faalatalata mai ona tagata taʻitoʻatasi.
15 O lē e maua o iai le mea e tatau ona faaumatia, e susunu i le afi+ o ia ma tagata uma o loo faatasi ma ia, auā ua ia solia le feagaiga+ a Ieova ma ua ia faia le mea e matuā leaga i Isaraelu.”’”
16 Ona tulaʻi lea o Iosua i le taeaopō ma faapotopoto ane Isaraelu i ituaiga, ma ua filifilia ai le ituaiga o Iuta.
17 Ona ia faalatalata mai lea o puiaiga o Iuta ma filifilia ai le puiaiga o Sera,+ ona faalatalata mai foʻi lea o le puiaiga o Sera, o tagata taʻitasi, ma filifilia ai le tagata o Sapati.
18 Mulimuli ane, ona faalatalata mai lea o le aiga o Sapati, o tagata taʻitasi, ma na filifilia ai Akana le atalii o Karame, o le atalii o Sapati, o le atalii ia o Sera, o le ituaiga o Iuta.+
19 Ona fai atu lea o Iosua iā Akana: “Loʻu atalii e, seʻi e faamamaluina Ieova le Atua o Isaraelu ma taʻutino atu iā te ia. Ta‘u mai iā te aʻu faamolemole le mea na e faia. Aua neʻi e natia lea mea mai iā te aʻu.”
20 Ona tali mai lea o Akana iā Iosua: “E moni ua ou agasala iā Ieova le Atua o Isaraelu, ma o le mea lenei na ou faia.
21 Ina ua ou vaaia i le vete* se ofu matagofie taugatā mai i Senara,+ ma tupe siliva e 200 sekeli,* ma le auro e 50 sekeli lona mamafa, ona ou manaʻo lea i ai ma ou aveina; o loo natia i le eleele i totonu o loʻu faleʻie, o loo pito i lalo le tupe.”
22 Ona aauina atu lea e Iosua o ni avefeʻau, ua latou taufetuli atu foʻi i le faleʻie, ma o loo natia ai i lona faleʻie le ofu faatasi ma tupe o loo pito i lalo.
23 Ona latou aumaia lea o na mea ma avatu iā Iosua ma le fanauga uma a Isaraelu, ona latou tuu atu lea o na mea i luma o Ieova.
24 Ona ave lea e Iosua ma le fanauga uma a Isaraelu o Akana+ le atalii o Sera, o tupe siliva, o le ofu taugatā, o le auro,+ o ona atalii, o ona afafine, o lana povi poʻa, o lana asini, o lana lafu, o lona faleʻie, ma mea uma ua iā te ia, ua latou aumaia uma i le vanu* o Akori.+
25 Ona fai atu lea o Iosua: “Aiseā ua e aumaia ai mala* iā i matou?+ O le aso nei e faaoo atu ai e Ieova mala iā te oe.” Ona fetogi ai lea e Isaraelu uma o ia i maa,+ ma latou susunu iā te i latou i le afi.+ O lea, na latou fetogia ai i latou i maa.
26 Ua latou faaputu foʻi i luga o ia se faaputuga maa telē, o loo iai pea e oo mai i aso nei. Ona liliuese ai lea o le toʻasā tele o Ieova.+ O le mea lenā ua faaigoa ai lea nofoaga o le vanu o Akori,* e oo mai i aso nei.
Faamatalaga Pito i Lalo
^ Lona uiga “Mea e Eli ai Maa.”
^ E faasino atu i le itu i sasaʻe.
^ Epe., “faapaia.”
^ Epe., “faapaia.”
^ Tagaʻi i le Uiga o Upu.
^ Po o “le fanua laugatasi.”
^ Po o “faafitauli.”
^ Lona uiga “Mala.”
