Iopu 24:1-25
24 “Aiseā ua lē atofa ai e Lē e ona le malosi uma lava se aso?+
Aiseā ua lē vāai ai i latou na iloa o ia i lona aso?*
2 Ua sii e tagata pine o tuaoi;+Ua latou gaoia mamoe mo a latou lava lafu.
3 Ua latou tutuliesea asini a tamaiti ua leai ni tamā,Ua faoa foʻi le povi poʻa a le fafine ua oti lana tane e fai ma mea e faamau ai le aitalafu.+
4 Ua latou tuleiesea tagata matitiva mai i le ala;E ao ona lalafi ē ua mafatia o le lalolagi mai iā i latou.+
5 Ua saʻili e ē matitiva ni meaʻai e pei o le asini vao+ o le toafa;Ua latou sa‘ili i le toafa mo meaʻai mo a latou fanau.
6 E ao ona latou selesele i le fanua o se isi tagata*Ma ao mai i le togāvine a lē e amioleaga.
7 Ua latou momoe lē lavalavā i le pō, e aunoa ma ni ofu;+Ua leai ni mea e latou te aafu ai i le mālūlū.
8 Ua susū i latou i timuga o mauga;Ua pipii atu i latou i papa ona e leai se mea e malu ai.
9 Ua faoesea le tama ua leai se tamā mai i le susu o lona tinā;+Ua ave foʻi ofu o lē ua mativa e faamau ai le aitalafu,+
10 Ua faamalosia i latou e feoaʻi solo e lē lavalavā, e aunoa ma ni ofu,Ma fia aai a o latou ave fusi saito.
11 Ua latou galulue pea i le vā o pā o le togāvine i le vevela o le lā;*Ua latou soli foʻi mea e soli ai vine, ae ua latou fia feinu pea.+
12 Ua feoi pea i le aai tagata o le a feoti;E alalaga atu foʻi mo se fesoasoani o ē ua manunuʻa tigāina,+Ae e le‘i manatu i ai le Atua o se mea e lē tonu.*
13 E iai i latou e fouvale i le malamalama;+E latou te lē iloa ona ala,E lē mulimuli foʻi i latou i ona ala.
14 E tulaʻi o lē e fasioti tagata i le tafa o ata;E na te fasiotia lē ua leai se fesoasoani ma lē ua mativa,+Ae avea o ia ma gaoi i le pō.
15 Ua faatalitali e mata o lē e mulilua le afiafipō,+Ua faapea ane, ‘E leai se tasi e na te iloa mai aʻu!’+
Ma ua ia ufiufi foʻi ona mata.
16 E latou te osofaʻia* fale i le pōuliuli;E latou te lokaina i latou lava i totonu i le ao.
E latou te lē iloa le malamalama.+
17 Ua tutusa iā i latou le taeao ma le pogisa tele;Ua latou iloa mea mataʻutia o le pogisa tele.
18 Ae e vave ona tafea ese atu i latou i vai.*
E faamalaiaina lo latou tofi o le fanua.+
E latou te lē toe foʻi i o latou togāvine.
19 E pei ona mitiia e le lāmala ma le vevela le kiona ua liusuāvai,E faapea foʻi ona faia e le Tuugamau* iā i latou ua agasala!+
20 E faagaloina o ia e lona tinā;* e ‘aina o ia e ilo.
E lē toe manatuaina o ia.+
E gau foʻi lē ua amiolētonu e pei o le laau.
21 E agaleaga o ia i le fafine e pā,Ma faileagaina le fafine ua oti lana tane.
22 E faaaogā e le Atua* lona mana e faaumatia ai ē e malolosi;E ui e tulaʻi mai i latou, ae e lē mautinoa lo latou ola.
23 E tuuina atu e le Atua ina ia maufaatuatuaina i latou ma saogalemu;+Ae e silasila ona fofoga i mea uma e latou te faia.*+
24 Ua faaeaina i latou mo sina taimi, ona leai lea o i latou.+
Ua faamaulaloina i latou+ ma faapotopotoina e pei o isi tagata uma;Ua salaeseina i latou e pei o le tumutumu o ʻau o saito.
25 O ai la e na te faamaonia ou te pepeloPe faalēaogāina laʻu upu?”
Faamatalaga Pito i Lalo
^ E faasino atu i lona aso o le faamasinoga.
^ Pe atonu “selesele mea‘ai a manu i le fanua.”
^ Pe atonu “Ua latou tatau le suāuu i le vā o pā o le togāvine.”
^ Pe atonu “Ae e leʻi taʻusalaina e le Atua se tasi.”
^ Epe., “elia.”
^ Epe., “E vave ona tafea ese atu o ia i luga o vai.”
^ Po o “Seoli.” Tagaʻi i le Uiga o Upu.
^ Epe., “le manava.”
^ Epe., “e ia.”
^ Epe., “i o latou ala.”
