Iopu 2:1-13
2 Mulimuli ane, ua oo i le aso e ō mai ai atalii o le Atua moni*+ e tutū i luma o Ieova,+ ma na sau ai foʻi Satani faatasi ma i latou ina ia tū o ia i luma o Ieova.+
2 Ona fetalai atu lea o Ieova iā Satani: “O fea e te sau ai?” Ua tali mai Satani iā Ieova: “Ua ou sau na ou fealualuaʻi i le lalolagi ma fesavaliaʻi ai.”+
3 Ona fetalai atu lea o Ieova iā Satani: “Po ua e mātauina ea* laʻu auauna o Iopu? E leai se tasi e pei o ia i le lalolagi. O ia o se tagata e amio saʻo ma faamaoni,*+ e mataʻu i le Atua ma ʻaloʻalo ese i mea leaga. Ua taofimau pea o ia i lona faamaoni,+ e ui ina e taumafai e faaoso aʻu e faaumatia*+ fua o ia.”
4 Ona tali mai lea o Satani iā Ieova: “O le paʻu e sui ai le paʻu. E avatu e le tagata mea uma ua iā te ia e sui ai lona ola.
5 Peitaʻi, ia aapa atu lou aao ma tago atu i ona ivi ma lona tino, ma e mautinoa e faifai o ia i ou lava luma.”+
6 Ona fetalai atu lea o Ieova iā Satani: “Faauta! Ua i ou lima o ia!* Tau o lona ola e te faasaoina!”
7 Ona alu ese ai lea o Satani mai i luma* o Ieova, ma ia taia Iopu i ni maʻi sua matuā tigā*+ e amata mai i ona alofivae e oo i lona tumuaʻi.
8 Ona tago lea o Iopu i se taʻega ipu omea e valu ai o ia, ma ua nofo o ia i le lefulefu.+
9 Ona fai mai lea o lana avā iā te ia: “Pe e te taofimau pea ea i lou faamaoni? Inā faifai ia i le Atua ma e oti ai!”
10 Ona fai atu lea o ia iā te ia: “Ua e tautala mai e pei o se fafine valea. Po o le a ta talia ea na o mea lelei mai i le Atua, ae lē talia foʻi ma mea leaga?”+ E leʻi agasala Iopu i nei mea uma i ona laugutu.+
11 Ua faalogo aumea e toʻatolu a Iopu i puapuaga uma ua oo iā te ia, ona ō mai ai lea e ta‘ito‘atasi mai i lona nuu, o Elifasa+ le Timanu, o Pilitati+ le Sua,+ ma Sofara+ le Naama. Ua latou filifili faatasi e ō mai e faamaise iā Iopu ma faamāfanafana atu iā te ia.
12 Ina ua latou vāai mamao mai, latou te leʻi mātaulia o ia. Ona latou fetagisi leotetele lea ma saei o latou ofu, ma asu aʻe le lefulefu i luga o o latou ulu.+
13 Ona latou nonofo faatasi lea ma ia i le eleele mo ao e fitu ma pō e fitu. E leai foʻi se tasi na fai mai se upu iā te ia, auā na latou iloa lona matuā tigā tele.+
Faamatalaga Pito i Lalo
^ O se faaupuga Eperu e faasino atu i atalii agelu o le Atua.
^ Epe., “ua uaʻi atu lou loto i.”
^ Po o “se tagata e lē taʻuleagaina ma amio saʻo.”
^ Epe., “folo.”
^ Po o le “Ua e pule iā te ia!”
^ Epe., “fofoga.”
^ Po o le “i se maʻi papala leaga.”
