Iona 3:1-10
3 Ona toe oo mai lea o le afioga a Ieova iā Iona, o le faalua lea, e faapea:+
2 “Inā tulaʻi ia ma alu i Nineva+ le aai telē, ma faailoa atu i ai le feʻau ua ou fai atu ai iā te oe.”
3 Ona tulaʻi lea o Iona ma alu atu i Nineva+ e tusa ma le fetalaiga a Ieova.+ O Nineva o se aai e matuā telē,* o le mamao pe a savali e tolu aso.
4 Ona ulu atu lea o Iona i le aai, ua ia savali mo le aso atoa ma folafola atu e faapea: “E toe 40 aso ona faaumatia lea o Nineva.”
5 Ona faatuatua lea o tagata Nineva i le Atua,+ ma ua latou talaʻi atu le anapogi ma oofu i ʻie talatala, e mai lava i ē e sili e oo i ē e faatauvaa.
6 Ina ua oo atu le feʻau i le tupu o Nineva, ona ia tulaʻi lea mai i lona nofoālii ma aveese ona ofu tautupu, ae ofu i le ʻie talatala ma nofo i le lefulefu.
7 E lē gata i lea, ua ia tuuina atu se poloaʻiga i Nineva atoa e faapea,“O le poloaʻiga lenei a le tupu ma ona alii sili: Ia aua neʻi ʻaina se mea e se tagata po o se manu, po o lafu povi po o lafu mamoe. E lē tatau ona latou aai i se meaʻai pe feinu i se vai.
8 Ia latou ufiufi iā i latou i le ʻie talatala, o tagata atoa ma manu; ia latou alalaga faatauanau atu foʻi i le Atua, ma liliuese mai i o latou ala leaga ma faiga sauā na latou faia.
9 O ai na iloa pe e lē toe suia ai e le Atua moni* le mea ua ia fuafua e fai, ma toe liliuese ai lona toʻasā tele ma lē faaumatia ai i tatou?”
10 Ina ua silafia e le Atua moni mea na latou faia, i lo latou liliuese mai i o latou ala leaga,+ ona suia ai lea o lana filifiliga* e tusa ai ma le mala na ia fetalai e faaoo iā i latou, ma e na te leʻi faaooina mai le mala.+
Faamatalaga Pito i Lalo
^ Epe., “o se aai telē i le silafaga a le Atua.”
^ Po o le “pe e lē faanoanoa ai le Atua moni i.”
^ Po o le “ona faanoanoa ai lea.”
