Faamaumauga a Ioane 7:1-52
7 Ua mavae lenei mea, ona femaliua‘i* pea lea o Iesu i Kalilaia, auā e leʻi manaʻo o ia e faia faapea i Iutaia, ona ua lamalama tagata Iutaia e fasioti iā te ia.+
2 Peitaʻi, ua latalata i le tausamiga a tagata Iutaia, o le Tausamiga o Faleapitaga.*+
3 Ona fai mai lea o ona uso+ iā te ia: “Ia e tuua lenei mea ae alu atu i Iutaia, ina ia vāai ai foʻi ou soo i galuega ua e faia.
4 Auā e leai se tasi na te faia faalilolilo se mea, pe a fia lauiloa o ia. Afai o loo e faia nei mea, ia faailoa atu oe i le lalolagi.”
5 O le mea moni, e leʻi faatuatua ona uso iā te ia.+
6 Ona fetalai atu lea o Iesu iā i latou: “E leʻi oo mai loʻu taimi,+ a o outou, e pule outou i le taimi tou te ō ai.
7 E leai se mea e ʻinoʻino ai fua le lalolagi iā te outou, ae ua ʻinoʻino mai iā te aʻu, auā ua ou molimau atu i ana galuega leaga.+
8 Ia outou ō aʻe i le tausamiga; ou te lē alu aʻe i le tausamiga auā e leʻi oo i loʻu taimi.”+
9 Ina ua uma ona ia taʻu atu nei mea iā i latou, ona nofo ai pea lea o ia i Kalilaia.
10 Peitaʻi, ina ua ō aʻe ona uso i le tausamiga, ona ia alu aʻe foʻi lea faalilolilo e aunoa ma le iloa e tagata.
11 Ua saʻilia o ia e tagata Iutaia i le tausamiga ma faapea ane: “O fea o iai lenā tagata?”
12 Ua talanoa taumusumusu le motu o tagata e faatatau iā te ia. Ua faapea mai nisi: “O ia o se tagata lelei.” Ae ua fai mai isi: “E leai, auā ua ia faasesēina le motu o tagata.”+
13 Ae ua leai se tasi ua fai atu se tala e faatatau iā te ia i luma o tagata, ona o le fefefe i tagata Iutaia.+
14 Pe tusa o le aso lona fā o le tausamiga, ona alu aʻe lea o Iesu i le malumalu ma aʻoaʻo atu i tagata.
15 O lea, ua taufaiofo ai tagata Iutaia ma faapea ane: “E faapefea ona poto lenei tagata i Tusitusiga Paia+ ae e leʻi aʻoaʻoina o ia e se tasi?”*+
16 Ona tali atu lea o Iesu ma fetalai atu: “O mea ua ou aʻoaʻoina atu, e lē o ni oʻu manatu, a o manatu o lē na auina mai aʻu.+
17 Afai e naunau se tasi e fai Lona finagalo, o le a iloa ai e ia pe e mai i le Atua+ mea o loo oʻu aʻoaʻoina atu, po o oʻu lava manatu.
18 O lē e tautala e tusa ma ona lava manatu, o loo saʻili e ia lona lava viiga. Peitaʻi, o lē e saʻili le viiga o lē na auina mai o ia,+ e faamaoni ma e amiotonu lava o ia.
19 Pe e leʻi tuuina atu ea e Mose le Tulafono+ iā te outou? Ae e leai se tasi o outou o loo usitaʻi i le Tulafono. Aiseā ua outou lamalama ai e fasioti aʻu?”+
20 Ae ua tali mai le motu o tagata e faapea: “Ua uluitinoina oe e se temoni. O ai o loo lamalama e fasioti iā te oe?”
21 Ua tali atu Iesu iā i latou: “E tasi le galuega na ou faia, ae ua faateʻia uma ai outou.
22 O lea, seʻi mātau: Na tuuina atu e Mose le peritome+ iā te outou, (e lē faapea e mai iā Mose, ae e mai i o outou augātamā)+ ma ua outou peritomeina tagata i le sapati.
23 Afai e peritome se tagata i le sapati ina ia lē solia ai le Tulafono a Mose, aiseā la ua outou matuā feita ai iā te aʻu ona ua ou faamālōlōina se tagata i le sapati?+
24 Soia tou te faamasino e tusa ma mea ua outou vāai i ai, ae ia tonu la outou faamasinoga.”+
25 Ua faapea ane nisi o ē o nonofo i Ierusalema: “Pe e lē o le tagata ea lenei o loo latou lamalama e fasioti?+
26 Ae vaai! O loo aʻoaʻo atu o ia i nofoaga faitele, ae e leai ma sa latou tala o fai atu iā te ia. Pe faamata ua iloa e faipule o le Keriso lea?
27 Ae i le isi itu, ua tatou iloa le mea e sau ai lenei tagata;+ ae pe a maliu mai le Keriso, e lē iloa e se tasi le mea e sau ai o ia.”
28 Ona alaga atu lea o Iesu a o aʻoaʻo atu i le malumalu: “Ua outou iloa aʻu ma le mea ou te sau ai. Ou te leʻi sau foʻi ona o loʻu lava loto,+ ae e iai moni Lē na auina mai aʻu, ae tou te lē iloa o ia.+
29 Ua ou iloa o ia,+ auā o aʻu o lona sui, ma o Ia o lē na auina mai aʻu.”
30 O lea, ua latou lamalama ai e puʻe o ia,+ ae e leʻi oo se lima o se tasi iā te ia auā e leʻi oo i lona taimi.*+
31 Ae ua faatuatua iā te ia le toʻatele o le motu o tagata,+ ma ua latou faapea ane: “Pe a afio mai le Keriso, po o le a ia faia ea ni faailoga e sili atu i lo o lenei tagata?”
32 Ua faalogo le ʻau Faresaio i tala a le motu o tagata e faatatau iā te ia, ona aauina atu lea e le ʻaufaitaulaga sili ma le ʻau Faresaio o ni leoleo e puʻe iā te ia.
33 Ona faapea atu lea o Iesu: “Ou te toe nofo ma outou mo ni nai aso, ae ou te leʻi alu atu i Lē na auina mai aʻu.+
34 O le a outou saʻili mai iā te aʻu ae tou te lē maua aʻu, o le mea foʻi ou te iai, e lē mafai ona outou ō mai i ai.”+
35 Ona fetalanoaaʻi lea o tagata Iutaia e faapea: “O fea o loo fuafua lenei tagata e alu i ai, ina ia tatou lē maua ai o ia? Po o fuafua o ia e alu atu i tagata Iutaia o loo taapeape i Eleni, ma aʻoaʻo atu foʻi i tagata Eleni?
36 O le ā le uiga o lana fetalaiga, ‘O le a outou saʻili mai iā te aʻu ae tou te lē maua aʻu, o le mea foʻi ou te iai, e lē mafai ona outou ō mai i ai’?”
37 I le aso mulimuli, o le aso tele lea o le tausamiga,+ ona tū lea o Iesu ma alaga atu e faapea: “Afai e fia inu se tasi, inā sau ia iā te aʻu e inu ai.+
38 Ua faapea mai tusitusiga paia e faatatau i lē e faatuatua mai iā te aʻu: ‘E tafe mai vai o le ola mai i totonu iā te ia.’”+
39 Peitaʻi, ua fetalai o ia e uiga i le agaga, lea o le a maua e i latou o ē e faatuatua iā te ia; ae o le taimi lea e leʻi iai se agaga,+ auā e leʻi faamamaluina Iesu.+
40 Ona faapea ane lea o nisi o le motu o tagata ua faalogo i ana upu: “E moni lava o le Perofeta lenei.”+
41 Ua faapea mai nisi: “O le Keriso lenei.”+ Ae ua fai mai isi: “Pe e tupuga mai ea le Keriso mai i Kalilaia?+
42 Pe e lē o fai mai ea tusitusiga paia, e tupuga mai le Keriso mai i le fanau a Tavita,+ ma e mai i Peteleema+ le aai sa nofo ai Tavita?”+
43 Ona vaeluaina ai lea o le motu o tagata ona o ia.
44 E ui ua mananaʻo nisi o i latou e puʻe iā te ia, ae leai se tasi ua oo lona lima iā te ia.
45 Ona toe foʻi lea o leoleo i le ʻaufaitaulaga sili ma le ʻau Faresaio. Ua latou faapea atu i leoleo: “Aiseā ua outou lē aumaia ai o ia?”
46 Ua tali mai leoleo: “E leai lava se tagata ua tautala e pei o lenei tagata.”+
47 Ae ua fai atu le ʻau Faresaio: “Po ua faasesēina foʻi ma outou?
48 Po ua faatuatua ea iā te ia se tasi o faipule po o le ʻau Faresaio?+
49 Peitaʻi, ua faamalaiaina lenei motu o tagata, o ē e lē iloa le Tulafono.”
50 Ona fai atu lea o Nikotemo o lē na alu atu muamua iā te ia, ma o se tasi o i latou:
51 “Pe e faamasinoina i la tatou Tulafono se tagata, ae e leʻi faalogologo muamua iā te ia ma iloa lana mea na fai?”+
52 Ua latou tali mai iā te ia: “Po o oe foʻi o se Kalilaia? Ia saʻili ma iloa ai, e leai se perofeta e sau mai i Kalilaia.”*
Faamatalaga Pito i Lalo
^ Po o le “fesavaliaʻi.”
^ Po o le “Tausamiga o Fale Lauvao.”
^ E faasino atu i le aʻoaʻoina e taʻitaʻi lotu.
^ Ele., “itula.”
^ I nisi o manusikulipi maufaatuatuaina anamua, ua aveese ai le fuai. 53 e oo i le mataupu 8, fuai. 11.
