Ieremia 37:1-21
37 Ua pule le tupu o Setekaia+ le atalii o Iosia e sui iā Konia*+ le atalii o Ioakima, auā na tofia o ia e Nepukanesa le tupu o Papelonia e fai ma tupu i le nuu o Iuta.+
2 Ae e leʻi faalogo o ia, o ana auauna, ma tagata o le nuu i afioga a Ieova na fetalai mai ai e ala i le perofeta o Ieremia.
3 Ona aauina mai lea e le tupu o Setekaia o Iukali+ le atalii o Selemia, ma Sefanaia+ le atalii o Maaseia le ositaulaga i le perofeta o Ieremia, ua faapea mai: “Ia e tatalo faamolemole iā Ieova lo tatou Atua mo i matou.”
4 Ae ua fealuaʻi saʻoloto Ieremia i totonu o le nuu, auā o le taimi lenā e latou te leʻi tuuina ai o ia i le falepuipui.+
5 Ua ō mai le ʻautau a Farao mai i Aikupito,+ ma ua faalogo i ai le ʻau Kaletaia o ē na siʻomia Ierusalema i le tala e uiga iā i latou. Ona latou tuumuli ai lea mai i Ierusalema.+
6 Ua oo mai foʻi le afioga a Ieova i le perofeta o Ieremia, ua faapea mai:
7 “O le mea lenei ua fetalai mai ai Ieova le Atua o Isaraelu, ‘O le mea lenei ia outou fai atu ai i le tupu o Iuta, o lē na aauina mai outou iā te aʻu e fesili mai iā te aʻu: “Faauta! O le ʻautau a Farao o loo ō mai e fesoasoani iā te outou, e toe foʻi atu lava i latou i lo latou nuu o Aikupito.+
8 E toe foʻi mai le ʻau Kaletaia ma tau faasaga i lenei aai, e faatoʻilaloina ma susunuina i le afi.”+
9 O le mea lenei ua fetalai mai ai Ieova, “Aua neʻi faasesēina outou i le faapea ane, ‘E ō ese lava le ʻau Kaletaia mai iā i tatou,’ auā e lē ō ese i latou.
10 E tusa pe e tou te fasiotia ʻautau uma a le ʻau Kaletaia o ē o loo tau ma outou, ma e totoe na o o latou tagata na manunuʻa, e tutulaʻi lava i latou mai i o latou faleʻie ma susunu i le afi lenei aai.”’”+
11 Ina ua ō ese le ʻautau a Kaletaia mai i Ierusalema ona o le ʻautau a Farao,+
12 ona alu atu ai lea o Ieremia mai i Ierusalema i le nuu o Peniamina,+ ina ia maua lona fanua i inā i totonu o lona nuu.
13 Ae ina ua taunuu le perofeta o Ieremia i le Faitotoʻa o Peniamina, na puʻea o ia e le alii pule o loo vaaia leoleo, o lona igoa o Iria le atalii o Selemia, o le atalii o Hanania, ma ua faapea mai: “O lenā o le a e sola atu i le ʻau Kaletaia!”
14 Ae ua faapea atu Ieremia: “E lē saʻo lau tala! Ou te lē o sola atu i le ʻau Kaletaia.” Ae ua lē faalogo o ia iā Ieremia. O lea, ua taofia e Iria o Ieremia ma avatu o ia i perenise.
15 Ua matuā feita perenise iā Ieremia,+ ua latou fasia o ia ma faafalepuipui o ia*+ i le fale o Ionatana le failautusi, lea na fai ma falepuipui.
16 Ua tuuina Ieremia i le lua maulalo* i sela o loo iai, ma ua iai pea o ia i inā mo le tele o aso.
17 Ona feʻau mai lea o ia e le tupu o Setekaia, ma ua fesili faalilolilo le tupu iā te ia i lona fale.+ Ua ia fesili mai, “Pe e iai ea se afioga mai iā Ieova?” Ona fai atu lea o Ieremia, “E iai!” Ua ia toe faapea atu, “E tuuina atu lava oe i le lima o le tupu o Papelonia!”+
18 Ua fai atu foʻi Ieremia i le tupu o Setekaia: “O le ā laʻu agasala ua faia iā te oe, o au auauna, ma lenei nuu, ua outou tuuina ai aʻu i le falepuipui?
19 O fea nei o iai a outou perofeta o ē na vavalo atu iā te outou, ‘E lē sau le tupu o Papelonia e siitaua mai iā te outou ma lenei nuu’?+
20 O lenei, loʻu alii e le tupu, inā faafofoga mai ia faamolemole. Tau ina ia e talia laʻu talosaga faamolemole mo lou finagalo malie. Aua neʻi e toe auina atu aʻu i le fale o Ionatana+ le failautusi, ina neʻi oʻu oti ai i inā.”+
21 Ona poloaʻi atu lea o le tupu o Setekaia ina ia taofia Ieremia i le Lotoā o le Leoleo,+ ma ua avatu iā te ia se falaoa lapotopoto i aso taʻitasi mai i le auala o le ʻaufaifalaoa,+ seʻia oo ina lē toe iai se falaoa i le aai.+ Ua nofo ai pea Ieremia i le Lotoā o le Leoleo.
