Ieremia 29:1-32
29 O upu nei o le tusi na auina atu e le perofeta o Ieremia mai i Ierusalema, i ē na totoe o toeaina o le nuu na aveina faapagota, i ositaulaga, i perofeta, ma le nuu uma o ē na ave faapagota e Nepukanesa mai i Ierusalema i Papelonia,
2 ina ua mavae ona ō ese mai i Ierusalema o Iekonia+ le tupu, le tinā o le tupu,*+ o tagata aloaʻia, o perenise o Iuta ma Ierusalema, o tufuga, ma ē e faia u‘amea.*+
3 Na ia auina atu le tusi e ala i le lima o Eliasa le atalii o Safana+ ma Kimaria le atalii o Hilikia, o ē na aauina atu e Setekaia+ le tupu o Iuta i Papelonia iā Nepukanesa le tupu o Papelonia, e faapea:
4 “O le mea lenei ua fetalai mai ai Ieova o ʻau, o le Atua o Isaraelu i le nuu uma na ave faapagota, o ē na ou ave faapagota mai i Ierusalema i Papelonia,
5 ‘Ia outou fau fale ma nonofo ai. Ia totō togālaau ma aai i o latou fua.
6 Inā faiavā ia ma fananau mai ai atalii ma afafine; ia aumaia foʻi ni avā mo o outou atalii ma avatu o outou afafine e faaipoipo i tane, ina ia latou fananau mai ai ni tama ma ni teine. Ia faatoʻateleina ai i inā, ae aua le faatoʻaitiitia.
7 Ia outou saʻili foʻi i le filemu o le aai ua ou ave faapagota i ai outou, ma ia tatalo iā Ieova mo le aai, auā o lona filemu e tou te filemu ai foʻi.+
8 Auā o le mea lenei ua fetalai mai ai Ieova o ʻau, o le Atua o Isaraelu: “Aua neʻi faasesēina outou+ e o outou perofeta ma ē e faia valovaloga faataulāitu ua iā te outou, aua foʻi neʻi outou faalogo atu i miti ua latou miti ai.
9 Auā ‘ua latou vavalo mai i mea pepelo iā te outou i loʻu igoa. Ou te leʻi aauina atu i latou,’+ ua fetalai mai ai Ieova.”’”
10 “Auā o le mea lenei ua fetalai mai ai Ieova, ‘Pe a atoa tausaga e 70 i Papelonia, ona ou liliu atu lea iā te outou,+ ma ou faataunuuina iā te outou laʻu folafolaga i le toe faafoʻisia mai o outou i lenei mea.’+
11 “‘Auā ua ou iloa lelei manatu ua ou manatu ai iā te outou,’ ua fetalai mai ai Ieova, ‘o manatu o le filemu ae e lē o le malaia,+ ina ia avatu iā te outou se lumanaʻi ma se faamoemoe.+
12 E tou te valaau mai iā te aʻu, ma ō mai ma tatalo mai iā te aʻu, ona ou faalogo atu ai lea iā te outou.’+
13 “‘E tou te saʻili mai iā te aʻu ma outou maua aʻu,+ auā e tou te saʻili mai iā te aʻu ma o outou lotoatoa.+
14 E tou te maua lava aʻu,’+ ua fetalai mai ai Ieova. ‘Ou te faapotopoto foʻi outou o ē na ave faapagota, ma aoaoina faatasi outou mai i atunuu ma mea uma na ou faataapeape i ai outou,’+ ua fetalai mai ai Ieova. ‘Ou te toe aumaia outou i le mea na ou ave faapagota i ai outou.’+
15 “Ae ua outou fai mai, ‘Ua faatūina e Ieova mo i tatou ni perofeta i Papelonia.’
16 “Auā o le mea lenei ua fetalai mai ai Ieova i le tupu o loo tiʻetiʻe i le nofoālii o Tavita,+ ma le nuu uma o loo nonofo i lenei aai, o o outou uso e leʻi ō faatasi ma outou ina ua ave faapagota outou,
17 ‘O le mea lenei ua fetalai mai ai Ieova o ʻau: “O lenei ou te auina atu iā i latou le pelu, o le oge, ma le faamaʻi,+ ou te faia foʻi i latou e pei o mati ua pala,* ua lē mafai ona ʻaina ona ua leaga.”’+
18 “‘Ou te tuliloa i latou i le pelu,+ o le oge, ma le faamaʻi, ou te faia foʻi i latou ma mea e fefefe ai malo uma o le lalolagi,+ ma e avea i latou ma mala, o se mea e ofo ai, o se mea e tuufaaili ai,+ ma tauemuga i atunuu uma ou te faataapeape i ai i latou,+
19 auā e latou te leʻi faalogo i aʻu upu na ou auina atu iā i latou e ala i aʻu auauna le ʻauperofeta,’ ua fetalai mai ai Ieova, ‘ua aauina atu pea lava pea i latou.’*+
“‘Ae e tou te leʻi faalogo lava,’+ ua fetalai mai ai Ieova.
20 “O lea, ia faalogo mai i le afioga a Ieova, o outou uma ua ave faapagota, o ē na ou aauina atu mai i Ierusalema i Papelonia.
21 O le mea lenei ua fetalai mai ai Ieova o ʻau, o le Atua o Isaraelu, e faatatau iā Aapo le atalii o Kulaia ma Setekaia le atalii o Maaseia, o ē ua vavalo atu mea pepelo iā te outou i loʻu igoa,+ ‘Ou te tuuina atu i laʻua i le lima o Nepukanesa le tupu o Papelonia, ma e na te fasiotia lava i laʻua i o outou luma.
22 E avea foʻi i laʻua ma faaaʻoaʻoga pe a faamalaia se tasi e ē uma na ave faapagota o Iuta o loo i Papelonia, e faapea: “Tau ina ia faia oe e Ieova ia pei o Setekaia ma ia pei foʻi o Aapo, o ē na tunupaʻu e le tupu o Papelonia i le afi!”
23 auā na la faia mea e faalumaina ai i Isaraelu,+ ma mulilulua ma avā a o laʻua tuaoi, ma tautatala i mea pepelo i loʻu igoa, o le upu ou te leʻi poloaʻi atu ai iā i laʻua.+
“ʻ“O aʻu lava o Lē ua iloa ma molimau i ai,”+ ua fetalai mai ai Ieova.’”
24 “E te fai atu foʻi iā Semaia+ le Neelami,
25 ‘O le mea lenei ua fetalai mai ai Ieova o ʻau, o le Atua o Isaraelu: “Ona ua e aauina atu i lou igoa o tusi i le nuu uma o loo i Ierusalema, o Sefanaia+ le atalii o Maaseia le ositaulaga, ma ositaulaga uma, e faapea,
26 ‘Ua faia e Ieova oe ma ositaulaga nai lo o Ioiata le ositaulaga ina ia fai ma ovasia i le fale o Ieova, e vaavaaia so o se tagata ua valea e amio e pei o se perofeta, ma ia tuu foʻi o ia i laau faamau;*+
27 aiseā la ua e lē aʻoaʻia ai Ieremia le Anatota,+ o lē o loo amio e pei o se perofeta iā te outou?+
28 Auā na auina mai lana feʻau iā i matou i Papelonia, e faapea: “E umi ona ave faapagota outou! Ia outou fau fale ma nonofo ai. Ia totō togālaau ma aai i o latou fua,+—”’”’”
29 Ina ua faitau e Sefanaia+ le ositaulaga lenei tusi a o faalogo le perofeta o Ieremia,
30 ona oo mai lea o le afioga a Ieova iā Ieremia e faapea:
31 “Ia e auina atu se feʻau i le nuu uma na ave faapagota, e faapea, ‘O le mea lenei ua fetalai mai ai Ieova e faatatau iā Semaia le Neelami: “Ona ua vavalo atu Semaia iā te outou, e ui ou te leʻi auina atu o ia, ma ua ia taumafai foʻi e faatupu lo outou faatuatua i mea pepelo,+
32 o le mea lea ua fetalai mai ai Ieova, ‘Ou te taui atu iā Semaia le Neelami ma ē e tupuga mai iā te ia. E leai se tasi o lona aiga e faasaoina i lenei nuu, e lē vaai foʻi o ia i mea lelei ou te faia mo loʻu nuu,’ ua fetalai mai ai Ieova, ‘auā ua ia uuna‘ia le nuu e fouvale iā Ieova.’”’”
