Hakai 2:1-23
2 O le masina lona fitu, i le aso lona 21 o le masina, na oo mai ai le afioga a Ieova e ala mai i le perofeta o Hakai,+ ua faapea mai,
2 “Faamolemole, ia fesili atu iā Serupapelu+ le atalii o Salatielu, o le kovana o Iuta,+ ma Iosua+ le atalii o Iosatako,+ o le ositaulaga sili, ma ē ua totoe o le nuu e faapea:
3 ‘O ai o outou o ē ua totoe na vāai i le matagofie na iai muamua lenei fale?*+ O le ā la outou vaai i ai i lenei taimi? Pe e lē o se meanoa ea pe a faatusatusa atu i lona matagofie na iai muamua?’+
4 “‘A o lenei, Serupapelu e, inā faamalosi ia oe,’ ua fetalai mai ai Ieova, ‘ma ia faamalosi oe Iosua le atalii o Iosatako, o le ositaulaga sili.’
“‘Ia faamalolosi outou o tagata uma o le atunuu,’+ ua fetalai mai ai Ieova, ‘ma ia galulue.’
“‘Auā ou te faatasi ma outou,’+ ua fetalai mai ai Ieova o ʻau.
5 ‘Ia outou manatua le mea na ou folafola atu iā te outou, ina ua outou ō ese mai i Aikupito,+ ma o loo tumau loʻu agaga iā te outou.*+ Aua le fefefe.’”+
6 “Auā o le fetalaiga lenei a Ieova o ʻau, ‘E toe tasi, e toeitiiti lava, ona ou lūlūina lea o le lagi ma le lalolagi, o le sami ma le laueleele mātūtū.’+
7 “‘Ou te lūlūina fo‘i atunuu uma, ona ō mai ai lea o ‘oa tautele* mai i atunuu uma;+ ou te faatumuina lenei fale i le mamalu,’+ ua fetalai mai ai Ieova o ʻau.
8 “‘O aʻu e ona le siliva, o aʻu foʻi e ona le auro,’ ua fetalai mai ai Ieova o ʻau.
9 “‘O le a sili atu le mamalu o lenei fale mulimuli nai lo o le fale muamua,’+ ua fetalai mai ai Ieova o ʻau.
“‘Ou te avatu i lenei mea le filemu,’+ ua fetalai mai ai Ieova o ʻau.”
10 O le aso lona 24 o le masina lona iva, i le tausaga lona lua o le nofoaiga a Tariu, na oo mai ai le afioga a Ieova i le perofeta o Hakai,+ e faapea:
11 “O le fetalaiga lenei a Ieova o ʻau, ‘Faamolemole, ia fesili atu i ositaulaga e uiga i le tulafono,+ e faapea:
12 “Afai e ave e se tamāloa se tufaaga paia i lona pito ofu, ma ua paʻi atu lona pito ofu i se falaoa po o se sitiū, po o se uaina, po o se suāuu, po o se isi ituaiga o meaʻai, pe e paia ai ea ia mea?”’”
Ona tali mai lea o ositaulaga: “E leai!”
13 Ua toe fesili atu Hakai: “Afai e lē mamā se isi ona o se tino oti ma ua paʻi atu i se tasi o nei mea, pe e lē mamā ai ea lea mea?”+
Ona tali mai lea o ositaulaga: “E lē mamā ai.”
14 Ua faapea atu Hakai: “‘E faapena lenei nuu, ma e faapena foʻi lenei atunuu i oʻu luma,’ ua fetalai mai ai Ieova, ‘e faapena foʻi galuega uma a o latou lima; o mea uma ua latou avatu i inā ua lē mamā.’
15 “‘A o lenei, faamolemole, ia ua‘i atu o outou loto* i lenei mea mai i le asō e oo atu i aso o i luma: A o leʻi tuuina le tasi maa i luga o le isi maa i le malumalu o Ieova,+
16 na faape‘ī le tulaga na iai? Ina ua alu atu se tasi i le faaputuga o saito e faatalitalia ni fua e 20, ae na maua ai na o le 10; ma ina ua alu ane se tasi i le mea e tali ai suāvine e utu mai ai ni fua e 50, ae na maua ai na o le 20;+
17 na ou taia outou, o galuega uma a o outou lima, e ala i le matagi vevela, o le polopologā+ ma le uatoʻa, ae e leai se tasi o outou na liliu mai iā te aʻu,’ ua fetalai mai ai Ieova.
18 “‘Faamolemole ia ua‘i atu o outou loto* i lenei mea mai i le asō e oo atu i aso o i luma, e mai i le aso lona 24 o le masina lona iva, e mai i le aso na fai ai le faavae o le malumalu o Ieova;+ ia ua‘i atu o outou loto i lenei mea:
19 Po ua iai ea ni fatu i le fale teuoloa?*+ E leʻi fua mai lava le vine, le mati, le rimoni, ma le laau o le olive, a ea? E amata mai i lenei aso ona ou avatu le faamanuiaga.’”+
20 Ua toe oo faalua mai le afioga a Ieova iā Hakai, i le aso lona 24 o le masina,+ e faapea:
21 “Ia fai atu iā Serupapelu le kovana o Iuta, ‘O le a ou lūlūina le lagi ma le lalolagi.+
22 Ou te fulisia nofoālii o malo ma faaumatia le malosi o malo o atunuu;+ ou te fulisia foʻi le kariota ma ē e tiʻetiʻe ai, ma e paʻuʻū foʻi i lalo solofanua ma ē e tiʻetiʻe ai, e taʻitoʻatasi i le pelu a lona lava uso.’”+
23 “‘I lenā aso,’ ua fetalai mai ai Ieova o ʻau, ‘ou te ave ai oe, laʻu auauna o Serupapelu+ le atalii o Salatielu,’+ ua fetalai mai ai Ieova, ‘ou te faia oe e pei o se mama faamaufaailoga, auā o oe o lē ua ou filifilia,’ ua fetalai mai ai Ieova o ʻau.”
Faamatalaga Pito i Lalo
^ Po o le “malumalu.”
^ Pe atonu “ma ina ua tū loʻu agaga faatasi ma outou.”
^ Po o “mea ua manaʻomia.”
^ Po o le “ia manatunatu loloto.”
^ Po o le “ia manatunatu loloto.”
^ Po o le “mea e teu ai fatu?”
