Galuega a le ʻAuaposetolo 6:1-15
6 I na aso ina ua faatoʻateleina le ʻausoo, ua faitio ai tagata Iutaia e tautatala i le gagana Eleni, i tagata Iutaia e tautatala i le gagana Eperu, ona ua lē faaaofia o latou fafine ua oti a latou tane, i mea na tufatufaina i aso fai soo.+
2 Ona aami lea e le toʻa 12 o le toʻatele o soo ma faapea atu: “E lē talafeagai ona matou tuua le afioga a le Atua ae tufatufa atu meaʻai.+
3 O lea, le ʻauuso e, ia filifili mai iā te outou ni tane se toʻafitu e taʻuleleia+ ma e tutumu i le agaga ma le atamai,+ ina ia matou tofia i latou e faia lenei galuega tāua;+
4 ae o le a matou uaʻi atu i tatalo ma le faiva e tusa ai ma le afioga a le Atua.”
5 Ua fiafia foʻi tagata uma i le upu ua fai mai, ona latou filifilia lea o Setefano, o se tagata ua tumu i le faatuatua ma le agaga paia, o Filipo,+ o Pokoro, o Nikanora, o Timona, o Pamena, ma Nikolao, o se tagata liulotu mai i Anetioka.
6 Ua aumaia i latou i luma o le ʻauaposetolo, ma ina ua uma le tatalo, ona faaee atu lea o lima o le ʻauaposetolo iā i latou.+
7 O le iʻuga, ua tupu pea le afioga a le Atua,+ ma ua matuā faatoʻateleina pea soo+ i Ierusalema; e toʻatele foʻi ositaulaga ua usiusitaʻi i le faatuatua.+
8 Ua faia e Setefano, o lē ua finagalo malie i ai le Atua ma ua tumu i le mana, mea ofoofogia* ma faailoga i luma o tagata.
9 Ae ua ō mai nisi tagata mai i le vaega ua taʻua o le Sunako o le ʻAusaʻoloto, ma nisi o le ʻau Kurene ma le ʻau Alesania, ma nisi mai i Kilikia ma Asia e finau ma Setefano.
10 Ae ua lē mafai ona latou tetee atu i le atamai ma le agaga paia lea na taʻitaʻiina ai le auala na ia tautala atu ai.+
11 Ona latou faatauanau faalilolilo lea o tagata ia fai atu e faapea: “Na matou faalogo ua fai upuleaga o ia iā Mose ma le Atua.”
12 Ua latou faavevesi tagata, o toeaina, ma le ʻautusiupu, ma ua latou ō mai faafuaseʻi iā te ia, ua puʻe ma ave faamalosi o ia i le Faamasinoga Sili.
13 Ua latou aumai foʻi ni molimau pepelo, o ē ua faapea atu: “E lē o taofia lava le tautala o lenei tagata faasaga i lenei nofoaga paia ma le Tulafono.
14 Auā na matou faalogo ua fai mai o ia, o le a lafotūina e Iesu le Nasareta lenei nofoaga paia, ma suia tū na tuu mai e Mose iā i tatou.”
15 A o pulatoʻa atu iā te ia i latou uma o loo nonofo i le Faamasinoga Sili, ua latou iloa ai ua pei ona fofoga o fofoga o se agelu.
Faamatalaga Pito i Lalo
^ Po o “vavega.”