Galuega a le ʻAuaposetolo 25:1-27
25 Ua mavae aso e tolu talu ona taunuu Feso+ i lona itumalo, ona alu aʻe lea o ia i Ierusalema mai i Kaisareia.
2 Ua faailoa atu iā te ia e le ʻaufaitaulaga sili ma alii sili o Iutaia, faamatalaga e taʻusalaina ai Paulo.+ Ona latou ʻaiʻoi atu lea iā Feso,
3 ma faapele o ia ina ia auina atu Paulo e alu atu i Ierusalema. Ae ua lamalama i latou ina ia fasioti Paulo i le auala.+
4 Peitaʻi, ua tali atu Feso e taofia pea Paulo i Kaisareia, ma ua toeitiiti ona ia toe foʻi atu lea i inā.
5 Ua ia faapea atu: “O lea, ia ō ifo ni o outou tagata aloaʻia faatasi ma aʻu, ma molia o ia pe afai e saʻo ua faia e lenei tagata se mea sesē.”+
6 Ua nofo o ia ma i latou pe na o le valu po o le sefulu aso, ona alu ifo lea i Kaisareia, ma ua nofo i le nofoa faamasino i le aso na sosoo ai, ma faatonu atu e aumai Paulo i ona luma.
7 Ina ua sau o ia, ona tutū faataamilo lea o tagata Iutaia na ō ifo mai i Ierusalema, ma tolaulau mai le tele o moliaga matuiā ia e leʻi mafai ona latou faamaonia.+
8 I lana tali atu, ua faapea atu ai Paulo: “Ou te leʻi agasala i le Tulafono a tagata Iutaia, po o le malumalu, po o Kaisara foʻi.”+
9 Ae ua naunau Feso ina ia faafiafia tagata Iutaia;+ o lea ua ia tali mai ai iā Paulo: “Pe e te manaʻo e te alu aʻe i Ierusalema, e faamasinoina ai oe i oʻu luma, e faatatau i nei moliaga?”
10 Ae ua tali atu Paulo: “O loo ou tū nei i luma o le nofoa faamasino o Kaisara, i le mea e tatau ona faamasinoina ai aʻu. Ou te leʻi faia se mea leaga i tagata Iutaia, e pei foʻi ona e silafia lelei.
11 Afai e saʻo o aʻu o se tagata fai mea sesē, ma ua ou faia se mea ua tatau i ai le oti,+ ou te lotomalie la ou te oti. Ae afai e lē moni tuuaʻiga ua faia e nei tagata iā te aʻu, e leai la se aiā a se tasi e tuuina atu ai aʻu ina ia faamalie ai i latou. Ou te tagi atu iā Kaisara!”+
12 Ona talanoa atu lea o Feso i alii o le fono, ma ua faapea mai o ia: “Ona ua e tagi atu iā Kaisara; e te alu lava iā Kaisara.”
13 Ina ua mavae ni nai aso, ona taunuu ane lea o le asiasiga faapitoa a le tupu o Akeripa ma Perenike i Kaisareia iā Feso.
14 Talu ai na la nonofo i inā mo ni aso, ona faailoa atu lea e Feso i le tupu, o le mataupu e uiga iā Paulo e faapea:
“E iai se tagata na saisaitia e Filiki,
15 ma a o oʻu iai i Ierusalema, na faamatala mai ai e le ʻaufaitaulaga sili ma le ʻautoeaina o Iutaia mea e faatatau iā te ia,+ ma talosaga mai e faasalaina o ia.
16 Ae na ou tali atu iā i latou e faapea, e lē o se tū a tagata Roma le tuuina atu o se tagata e faamalie ai nisi, a o leʻi faafesagaʻi lē ua molia ma ē ua molia o ia, ma maua ai se avanoa e tali atu ai i moliaga faasaga iā te ia.+
17 O lea, ina ua latou taunuu mai i inei, ou te leʻi faatuai ae na ou nofo loa i le nofoa faamasino i le aso na sosoo ai, ma faatonuina ina ia aami mai le tamāloa.
18 Ina ua tutulaʻi mai ē ua molia o ia, e latou te leʻi moliaina o ia i mea leaga ia na ou manatu i ai e faatatau iā te ia.+
19 Ae ua na ona latou fefinaua‘i ma ia e faatatau i la latou tapuaʻiga i le atua,*+ ma e faatatau i se tagata e igoa iā Iesu, o lē ua oti, ae o loo faapea mai Paulo o loo ola o ia.+
20 Na ou lē mautonu pe e faapefea ona faafoe lenei finauga, ona ou fesili atu lea iā te ia pe e manaʻo e alu i Ierusalema, ma faamasinoina ai o ia i inā i nei mataupu.+
21 Ae ina ua tagi mai Paulo e taofia pea o ia mo se faaiʻuga e fai e Lē e Mamalu,*+ ona ou faatonuina lea e taofia pea o ia, seʻia ou auina atu o ia iā Kaisara.”
22 Ona fai mai lea o Akeripa iā Feso: “Ou te fia faalogo atu i lenā tagata.”+ Ona fai atu lea o ia: “E te faafofoga atu iā te ia a taeao.”
23 I le aso e sosoo ai, ua ō mai ai Akeripa ma Perenike ma le faaalialia tele, ma ua ulufale atu i le potu tele o le maota, faatasi ma alii e pule i ʻau, faapea foʻi ma alii aloaʻia o le aai; ma ina ua avatu e Feso le faatonuga, ona aumaia lea i totonu o Paulo.
24 Ua faapea atu Feso: “Le tupu e Akeripa, ma outou uma ua potopoto mai i inei, o loo outou tagataga‘i atu i le tagata lenei, o lē ua talosaga mai ai tagata uma o Iutaia i Ierusalema ma i inei, ma alalaga mai ua lē tatau ona toe ola o ia.+
25 Ae ua ou iloa e leai se mea ua ia faia e tatau ai ona oti.+ O lea, ona ua tagi lenei tagata e auina atu o ia i Lē e Mamalu, ua ou filifili ai e auina atu o ia.
26 Ae ou te lē iloa se mea e uiga iā te ia ou te tusi atu ai i loʻu Alii. O lea ua ou aumaia ai o ia i o outou luma, aemaise lava oe Akeripa le tupu, ina ia ou iloa ai se mea e tusi atu ai, pe a uma ona faamasinoina o ia.
27 Auā ou te manatu e lē talafeagai ona auina atu se pagota, ae e lē faailoa atu mea ua molia ai o ia.”