Galuega a le ʻAuaposetolo 13:1-52
13 Ua iai i le faapotopotoga i Anetioka o perofeta ma faiaʻoga:+ o Panapa, o Simeona o lē ua igoa foʻi iā Nikeru, o Lukio mai i Kurene, ma Manaena o lē na aʻoʻoga faatasi ma Herota le pule o le itumalo, atoa foʻi ma Saulo.
2 A o latou auauna atu* iā Ieova* ma anapopogi, ua faapea mai le agaga paia: “Ia tofia mo aʻu o Panapa ma Saulo,+ ina ia faia le galuega lea ua ou valaauina i laʻua e fai.”+
3 Ina ua uma ona latou anapopogi ma tatalo, ona faaee atu lea o latou lima iā i laʻua ma tuuina atu i laʻua e ō.
4 Ua aauina atu nei tane e le agaga paia, ma ua ō ifo i Selukeia, ona la folau atu ai lea i Kuperu.
5 Ua taunuu i laʻua i Salamina, ma folafola atu loa le afioga a le Atua i sunako o tagata Iutaia. Ua tautua* foʻi Ioane iā i laʻua.+
6 Ina ua soo le motu atoa iā i latou e oo atu i Pafo, ona latou fetaui lea ma se tagata Iutaia e igoa iā Paiesu, o se tamāloa faataulāitu ma o se perofeta pepelo.
7 Na faatasi o ia ma le suikonesula* o Sekio Paulo, o se tamāloa atamai. Ua valaau atu Sekio Paulo iā Panapa ma Saulo e ō atu iā te ia, auā ua naunau tele lenei tagata e faalogo i le afioga a le Atua.
8 Peitaʻi, ua tetee atu Elima le tamāloa faataulāitu (o le auala lea e faaliliuina ai lona igoa) iā i laʻua, ma ua taumafai e faaliliuese le suikonesula mai i le faatuatua.
9 Ae ua faatumulia Saulo o lē ua igoa foʻi iā Paulo, i le agaga paia ma ua pulatoʻa atu iā te ia
10 ma faapea atu: “O oe o le tagata ua tumu i mea piʻopiʻo ma mea leaga uma, o oe o le atalii o le Tiapolo+ ma e te tetee i mea tonu uma lava. Aiseā e faaauau ai ona e mimilo sesē ala tonu o Ieova?*
11 Faauta! O le a faasala oe e Ieova* ma o le a e tauaso, e te lē vaai foʻi i le susulu o le lā mo se taimi.” Ona oo ifo lea iā te ia o se puao mafiafia ma le pōuliuli, ma ua tautagotago solo e saʻili se tasi e taʻitaʻia o ia.
12 Ina ua vaai le suikonesula i le mea ua tupu, ona talitonu ai lea o ia, auā ua ofo o ia i aʻoaʻoga a Ieova.*
13 Ona ō loa lea o Paulo ma isi tamāloloa i le vaa mai i Pafo ma taunuu atu i Pereka i Pafulia. Ae ua tuua i laʻua e Ioane+ ma toe foʻi atu i Ierusalema.+
14 Peitaʻi, ua la tuua Pereka ma ō atu i Anetioka i Pisitia, ona la ō atu lea i le sunako+ i le aso Sapati ma nonofo ai.
15 Ina ua uma ona faitau atu le Tulafono+ ma tusi a Perofeta, ona aauina atu lea e pule o le sunako o nisi iā i laʻua, ma faapea atu: “Uso e, afai o iā te oulua ni upu faalaeiau mo tagata, ia taʻu mai ia.”
16 Ona tulaʻi lea o Paulo ma talo atu lona lima ma faapea atu:
“Isaraelu e, ma outou e lē o ni Iutaia o ē matataʻu i le Atua, ia faafofoga mai.
17 O le Atua o lenei nuu o Isaraelu, na ia filifilia o tatou augātamā, ma na ia faaeaina i latou a o aumau o ni tagata ese i le nuu o Aikupito. Na ia taʻitaʻieseina foʻi i latou mai i inā i lona aao malosi.*+
18 Na faapalepale foʻi o ia i a latou amioga i le toafa pe tusa ma le 40 tausaga.+
19 Ina ua uma ona faaumatia nuu e fitu i le laueleele o Kanana, ona ia tufatufaina atu lea o fanua iā i latou e tusa ma o latou tofi.+
20 Na tutupu na mea uma pe tusa ma le 450 tausaga.
“Ina ua mavae nei mea, ona ia tuuina atu lea iā i latou o faamasino seʻia oo iā Samuelu le perofeta.+
21 Ae mulimuli ane, na latou talosaga atu mo se tupu,+ ona tuuina mai lea e le Atua iā i latou o Saulo le atalii o Kiso, o se tasi mai i le ituaiga o Peniamina,+ ina ia pulea i latou mo tausaga e 40.
22 Ina ua uma ona aveesea e le Atua o ia, ona ia faatūina lea o Tavita e fai ma tupu,+ o lē na ia molimau i ai ma fetalai e faapea: ‘Ua ou maua Tavita le atalii o Iese,+ o se tagata ua malie i ai loʻu loto;+ o le a ia faia mea uma ou te manaʻo i ai.’
23 E tusa ai ma le folafolaga a le Atua, e ala mai i le fanau a lenei tagata, ua aumaia ai e le Atua le faaola iā Isaraelu, o Iesu lea.+
24 A o leʻi maliu mai o ia, na talaʻi atu e Ioane i tagata Isaraelu uma le papatisoga e fai ma faailoga o le salamō.+
25 Ae a o lata ina māeʻa le galuega a Ioane, e masani ona faapea ane o ia: ‘O le ā so outou manatu, o ai aʻu? E lē o aʻu o ia. Ae faauta! o lē e mulimuli mai, e lē aogā ona ou tatala nonoa o ona seevae.’+
26 “Le ʻauuso e, o outou o fanau a Aperaamo ma i latou foʻi o faatasi ma outou o ē e matataʻu i le Atua, ua auina mai le feʻau o le faaolataga iā i tatou.+
27 Auā e leʻi iloa e tagata o Ierusalema ma o latou taʻitaʻi o ia lenei, ae ina ua latou faamasinoina o ia, na latou faataunuuina ai mea na taʻua e le ʻau Perofeta,+ ia e faitauina atu i sapati uma.
28 E ui lava e latou te leʻi maua se mea e fasiotia ai o ia,+ ae na latou fai atu ma le maumauaʻi iā Pilato ia fasiotia o ia.+
29 Ina ua uma ona latou faataunuuina mea uma na tusia e faatatau iā te ia, ona latou ave ifo lea o ia mai i le laau ma tuu i totonu o se tuugamau.+
30 Ae na toe faatūina o ia e le Atua mai i le oti,+
31 ma na vaaia o ia i le tele o aso e ē na ō aʻe faatasi ma ia mai i Kalilaia e agaʻi atu i Ierusalema, o ē ua molimau atu nei i tagata e faatatau iā te ia.+
32 “O le mea lea e ma te faailoa atu ai iā te outou le tala lelei i le folafolaga na faia i augātamā.
33 Ua faataunuuina atoatoa e le Atua lenā folafolaga iā i tatou, o a latou fanau, ina ua ia toe faatūina Iesu+ e pei foʻi ona tusia i le salamo lona lua: ‘O oe o loʻu atalii; o le aso nei ua avea ai aʻu ma ou tamā.’+
34 O le mea moni lenei, na Ia toe faatūina o ia mai i le oti, e lē oo lava i ai le pala, ma ua fetalai mai le Atua: ‘O le a ou faaalia atu iā te oe le alofa faamaoni lea na ou folafolaina atu iā Tavita, lea e moni lava.’*+
35 Ua taʻua foʻi i se isi salamo: ‘E te lē tuua lē ua faamaoni iā te oe ia oo i ai le pala.’+
36 Na faia foʻi e Tavita le auaunaga i le Atua* i lana augātupulaga, na oti o ia, na tanumia faatasi ma ona augātamā, ma na oo foʻi le pala iā te ia.+
37 Peitaʻi, e leʻi oo le pala i lē na faatūina e le Atua.+
38 “O lenei le ʻauuso e, ia outou iloa, e ala iā te ia ua folafola atu ai iā te outou le faamagaloina o agasala,+
39 ma o mea uma foʻi e leʻi taʻumamāina ai outou e ala i le Tulafono a Mose,+ ua taʻumamāina ai o ē e talitonu e ala iā te ia.+
40 O le mea lea, ia faaeteete ina neʻi oo iā te outou mea ua taʻua e le ʻau Perofeta e faapea:
41 ‘O outou o tagata tauemu, inā vāai mai ia, ma ofo, ma mou atu, auā o loo oʻu faia se galuega i o outou aso, o se galuega e tou te lē talitonu lava i ai, e tusa pe e faamatala auʻiliʻili atu e se tasi iā te outou.’”+
42 Ina ua latou ō i fafo, ona ʻaiʻoi atu lea o tagata ina ia faamatala atili atu iā i latou nei mea i le isi Sapati e sosoo ai.
43 Ua taape le fono na faia i le sunako, ma o le toʻatele o tagata Iutaia ma tagata liulotu o ē e tapuaʻi i le Atua, ua latou mulimuli atu iā Paulo ma Panapa. Ua la ʻaiʻoi atu iā i latou ina ia latou tumau i le agalelei faifua o le Atua.+
44 I le isi Sapati na sosoo ai, e toetoe lava o tagata uma o le aai na faapotopoto e faalogologo i le afioga a Ieova.*
45 Ina ua iloa atu e tagata Iutaia le motu o tagata, ona tumu lea o i latou i le lotoleaga. Ua latou upuleaga ma tetee atu i mea ua fai atu ai Paulo.+
46 Ona tautatala atu lea o Paulo ma Panapa iā i latou ma le lototetele e faapea: “Ua tatau ona faailoa atu muamua iā te outou le afioga a le Atua.+ Ae ona ua outou teena lana afioga, ma e tou te lē manatu e tou te mauaina le ola e faavavau, faauta! ua matou liliu atu ai i nuu ese.+
47 Auā ua poloaʻia i maʻua e Ieova* i upu nei: ‘Ua ou tofia oe e avea ma malamalama o nuu ese, ina ia avea oe ma faaolataga i tuluʻiga uma o le lalolagi.’”+
48 Ina ua faalogo i ai tagata o nuu ese, ona latou olioli ai lea ma faamamaluina le afioga a Ieova.* Ua talitonu foʻi i latou uma o ē ua saunia o latou loto mo le ola e faavavau.
49 Ua folafolaina atu foʻi le afioga a Ieova* i le atunuu atoa.
50 Ae ua faavevesi e tagata Iutaia fafine aloaʻia e tapuaʻi i le Atua, ma alii sili o le aai, ma ua latou faatupu sauāga+ iā Paulo ma Panapa, ma tutuli i laʻua i fafo o le aai.
51 Ona la tūtū atu lea o pefu o o la vae iā i latou, ma ō atu i Ikonio.+
52 Ua faaauau foʻi ona faatumulia le ʻausoo i le olioli+ ma le agaga paia.
Faamatalaga Pito i Lalo
^ Po o le “auauna atu i le lautele.”
^ Po o le “fesoasoani.”
^ O le kovana a Roma i se itumalo. Tagaʻi i le Uiga o Upu.
^ Ele., “aao faaloaloa.”
^ Po o le “maufaatuatuaina.”
^ Po o le “Na usiusitaʻi foʻi Tavita i le finagalo o le Atua.”