Galuega a le ʻAuaposetolo 12:1-25
12 O le taimi lenā ua sauāina ai e le tupu o Herota nisi o le faapotopotoga.+
2 Ua ia fasiotia Iakopo le uso o Ioane+ i le pelu.+
3 Ina ua ia iloa ua faafiafiaina ai tagata Iutaia i lea mea, ona ia puʻe foʻi lea iā Peteru. (O aso na o Falaoa e Lē Faafefeteina.)+
4 Ua ia puʻea o ia ma tuu i le falepuipui,+ ma tuuina atu o ia ia leoleoina e fitafita e taʻitoʻafā, e feauauaʻi i a latou tiute e fā, ma lona manatu e avatu o ia i luma o tagata pe a mavae le Paseka.
5 O lea, ua taofia ai Peteru i le falepuipui, ae ua tatalo faatauanau le faapotopotoga i le Atua mo ia.+
6 I le pō a o lumanaʻi le taimi e avatu ai o ia e Herota i luma o tagata, ua moe ai Peteru ma ua saisaitia i filifili e lua i le vā o ni fitafita se toʻalua, ma o loo tutū leoleo i luma o le faitotoʻa e leoleo le falepuipui.
7 Faauta! ua tū mai le agelu a Ieova,*+ ma ua susulu mai le malamalama i le potu o le falepuipui. Ua ia paʻi atu i le itu o Peteru, ua fafagu iā te ia ma faapea atu: “Ia e tū vave i luga!” Ona paʻuʻū ese lea o filifili mai i ona lima.+
8 Ua faapea atu le agelu iā te ia: “Ia fai ou ofu ma nonoa ou seevae.” Ona ia faia lea faapea. Mulimuli ane, ona ia toe fai atu lea iā te ia: “Ia fai lou ofu tele ma mulimuli mai iā te aʻu.”
9 Ona alu lea o Peteru i fafo ma ua mulimuli atu pea i le agelu, ae ua lē iloa e ia e moni le mea ua tupu e ala i le agelu. O le mea moni, ua manatu o ia o loo ia vaaia se faaaliga.
10 Ua la pasia fitafita muamua ma le vaega lona lua, ma ua oo atu i le faitotoʻa uʻamea e agaʻi atu i le aai, ona matala fua lea o le faitotoʻa iā i laʻua. Ua la ō i fafo ma agaʻi atu i se tasi auala, ona tuua loa lea o ia e le agelu.
11 Ua iloa nei e Peteru le mea ua tupu ma faapea ifo: “Ua ou iloa nei na auina mai e Ieova* lana agelu e laveaʻi aʻu mai i le lima o Herota, ma mea uma ua faatalitalia e tagata Iutaia o le a tutupu.”+
12 Ina ua malamalama o ia i nei mea, ona alu lea i le fale o Maria le tinā o Ioane, o lē e igoa foʻi iā Mareko,+ o i inā o loo potopoto ai nisi ma tatalo.
13 Ina ua tuʻituʻi atu o ia i le faitotoʻa o le pā, ona sau ai lea o le auauna teine e igoa iā Rosa i le faitotoʻa e vaai.
14 Ina ua ia iloa o le leo lea o Peteru, ona matuā fiafia ai lea o ia ma ua tamoʻe e taʻu atu o loo tū Peteru i le faitotoʻa, ae e na te leʻi tatalaina le faitotoʻa o le pā.
15 Ua latou fai mai iā te ia: “E te valea?” Ae ua ia matuā finau atu e saʻo lana tala. Ona latou faapea ane lea: “O lana agelu.”
16 Peitaʻi, ua tuʻituʻi atu pea Peteru. Ina ua latou tatala le faitotoʻa o le pā, ona latou vaaia ai lea o ia ma ua matuā ofo ai.
17 Ae ua talo atu o ia iā i latou e aua le pisa, ona ia faamatala auʻiliʻili atu lea o le auala na aveesea mai ai o ia e Ieova* mai i le falepuipui, ma faapea atu: “Ia taʻu atu nei mea iā Iakopo+ ma le ʻauuso.” Ona alu ai lea o ia i fafo ma malaga atu i se isi mea.
18 Ina ua ao, ona matuā vevesi ai lea o fitafita uma, talu ai ua latou lē iloa le mea ua oo iā Peteru.
19 Ona matuā saʻili lea o Herota iā te ia, ma ina ua lē maua o ia, ona ia suʻesuʻe lea o leoleo ma poloaʻi atu e taʻitaʻiina i latou ina ia faasala;+ ona alu ifo ai lea o Herota mai i Iutaia i Kaisareia ma nofo ai mo sina taimi.
20 Ua ita tele o ia i tagata o Turo ma Saitonu. Ona latou ō mai lea iā te ia ma le lotogatasi ma tauanau Pāso, o lē na vaavaaia le maota o le tupu,* ma latou ōle atu ia toe lelei ma Herota, auā ua maua e lo latou atunuu meaʻai mai i le atunuu o le tupu.
21 Ua oo i le aso atofaina, ona ofu ai lea o Herota i ofu o le tupu, ma nofo i le nofoa faamasino ma lauga atu iā i latou.
22 Ona alalaga lea o tagata ua potopoto: “O le siʻufofoga o se atua, ae lē o le leo o se tagata!”
23 Ona taia loa lea o ia e le agelu a Ieova,* auā e na te leʻi avatu le viiga i le Atua, ma ua ʻati o ia e anufe ma oti ai.
24 Ae ua tupu pea ma ua salalau atu le afioga a Ieova.*+
25 A o Panapa+ ma Saulo, ina ua uma ona la faatinoina i Ierusalema o faatulagaga uma mo le avatua o fesoasoani,+ ona la toe foʻi lea ma ave Ioane,+ o lē ua igoa foʻi iā Mareko.
Faamatalaga Pito i Lalo
^ Ele., “o le leoleo o le potu e tofā ai le tupu.”
