Failauga 10:1-20

  • E faalēaogāina le atamai ona o sina valea itiiti (1)

  • Lamatiaga o le lē agavaa (2-11)

  • Le tulaga malaia o le tagata valea (12-15)

  • Pe a pule se tagata valea (16-20)

    • E ono toe ta‘u atu e se manulele au tala (20)

10  E pei ona elo ma masa le suāuu a le tagata fai suāuu ona o lago mamate, e faapena foʻi ona faalēaogāina le atamai ma le mamalu ona o sina valea itiiti.+  O le loto o le tagata atamai e ta‘ita‘iina ai o ia i le ala sa‘o,* a o le loto o le tagata valea e ta‘ita‘iina ai o ia i le ala sesē.*+  Ua leai se mafaufau* o le tagata valea i so o se ala e savali ai,+ ma ua ia faailoa atu i tagata uma o ia o le vale.+  Afai e tupu le ita* o le tupu faasaga iā te oe, aua e te tuua le mea ua e iai,+ auā o le toʻafilemu e fai ifo ai agasala e tele.+  Ua iai le mala na ou vaaia i lalo o le lā e pei o se mea sesē e faia e i latou e iai le pule:+  Ua tofia tagata vālea i le tele o tulaga maualuluga, ae ua nonofo tagata mauʻoa* i se tulaga maulalo.  Ua ou vaai i auauna o loo tiʻetiʻe i solofanua ae ua savavali perenise e pei o ni auauna.+  O lē e na te eliina le lua e ono toe paʻū lava i ai o ia;+ ma o lē o loo talepeina se pā maa, e ono ūina o ia e se gata.  O lē e na te eliina maa e ono toe tigā ai o ia, ma o lē e na te taisi ogālaau e ono lamatia ai o ia. 10  Afai e matatupa se toʻi ma e leʻi faama‘aia e se tasi le mata, e mana‘omia la ona faaaogā lona malosi atoa. Ae e fesoasoani le atamai e maua ai iʻuga lelei. 11  Afai e ū e le gata ae e leʻi faa‘ole‘oleina i faiga faataulāitu, ua leai la se aogā i lē e poto e faaʻoleʻole.* 12  O upu a le gutu o le tagata atamai e logoleleia ia,+ a o laugutu o le tagata valea e fano ai o ia.+ 13  O upu muamua mai i lona gutu e valea ia,+ ma o upu mulimuli mai i lona gutu e valea ma i‘u ai i le malaia. 14  Ae ua faaauau pea ona tautala le tagata valea.+ E lē iloa e le tagata le mea o le a tupu; o ai e mafai ona taʻu atu iā te ia mea o le a tutupu pe a mavae atu o ia?+ 15  O galuega mamafa a lē e valea e vaivai ai o ia, auā e na te lē iloa pe faapefea ona alu atu i le aai. 16  Pagā le leaga mo se atunuu pe afai o se tamaitiiti le tupu+ ma ua amata mai i le taeao faiga‘ai a ona perenise! 17  Ae ma‘eu le fiafia o se atunuu pe afai o le tupu o se alo o le aigātupu, ma e taumamafa ona perenise i le taimi talafeagai ina ia malolosi ai, ae e lē ina ia onanā ai!+ 18  O le matuā paiē e pala ai laau faalava o le taualuga, ma o le lē gaoioi o lima e tutulu ai le fale.+ 19  Ua saunia meaʻai* ina ia toē ai, ma o le uaina e fiafia ai i le olaga;+ a o le tupe e faamalieina ai mana‘oga uma.+ 20  Aua e te fetuuina le tupu e oo lava i ou manatu,*+ aua foʻi e te fetuuina ē ua mauʻoa i totonu o lou potumoe; auā e ono faasalalau atu e se manulele* au tala, pe toe taʻu atu e se mea fai apaʻau au upu na fai.

Faamatalaga Pito i Lalo

Epe., “ua i lona lima taumatau.”
Epe., “ua i lona lima tauagavale.”
Po o le “Ua leai se uunaʻiga lelei o le loto.”
Epe., “agaga; mānava.”
Po o le “agavaa.”
Epe., “e poto lona laulaufaiva.”
Epe., “falaoa.”
Pe atonu “i lou moega.”
Epe., “manufelelei o le lagi.”