Faamasino 20:1-48
-
Taua faasaga i tagata Peniamina (1-48)
20 Mulimuli ane, ona ō atu ai lea o le fanauga uma a Isaraelu e amata mai i Tanu+ e oo i Peresepa, e oo atu lava i le nuu o Kiliata,+ ma ua faapotopoto ma le autasi* le faapotopotoga atoa i luma o Ieova i Mesepa.+
2 Ua tutū alii sili o le nuu atoa ma ituaiga uma o Isaraelu i le faapotopotoga o le nuu o le Atua moni, o fitafita e to‘a 400,000 o ē e savavali ua iai a latou pelu.+
3 Ua faalogo le fanauga a Peniamina ua ō aʻe tagata Isaraelu i Mesepa.
Ona faapea atu lea o tagata Isaraelu: “Seʻi outou taʻu mai, na faapefea ona tupu o lenei mea leaga?”+
4 Ona tali mai lea o le tagata sa Levī,+ le tane a le fafine na fasiotia, e faapea: “Na ma ō atu ma laʻu palake i Kipea,+ i le nuu o Peniamina ma te nonofo ai i le pō.
5 Ua tutū mai foʻi tagata* o Kipea e tau ma aʻu, ma ua latou siʻomia le fale na ou iai i le pō. Na latou manatu e fasiotia aʻu, peita‘i, na latou faaleagaina laʻu palake ma oti ai o ia.+
6 Ona ou tago atu lea ma pena le tino o laʻu palake, ma auina atu vaega ta‘itasi i fanua uma o tofi o Isaraelu,+ talu ai ua latou faia lenei mea matagā ma le māsiasi i Isaraelu.
7 O lenei, o outou uma tagata o Isaraelu, seʻi fai mai ia sa outou fautuaga ma sa outou filifiliga+ i lenei mea.”
8 Ona tutulaʻi lea ma le autasi* o le nuu uma ma faapea atu: “E leai se tasi o i tatou e toe alu atu i lona faleʻie, pe e toe fo‘i i lona fale.
9 O le mea lenei e tatou te faia i Kipea: E tatou te faia le vili*+ e filifilia ai tagata e ō aʻe e tau.
10 E tatou te filifilia mai ai tamāloloa e toʻa 10 mai i le toʻa 100 o ituaiga uma o Isaraelu, ma le toʻa 100 mai i le toʻa 1,000 ma le to‘a 1,000 mai i le toʻa 10,000 e aoaoina meaʻai mo le ‘autau, pe a siitaua atu iā Kipea o Peniamina, e tusa ai ma le mea matagā na latou faia i Isaraelu.”
11 Ona faapotopoto lea ma le autasi* o tagata uma o Isaraelu e siitaua atu i le aai.
12 Ua aauina atu e ituaiga o Isaraelu o tane, i tagata uma o le ituaiga o Peniamina, ua faapea atu: “O le ā lenei mea leaga ua outou faia?
13 O lenei, ia outou tuu mai na tagata amioleaga mai i Kipea,+ ina ia o matou fasioti iā i latou, ma faamamā ai le leaga mai iā Isaraelu.”+ Ae e leʻi fia faalogo le fanauga a Peniamina i o latou uso, o le fanauga a Isaraelu.
14 Ona faapotopoto faatasi lea o le fanauga a Peniamina mai i aai o Kipea, ma siitaua atu i tagata Isaraelu.
15 Ua faitauina e le fanauga a Peniamina i lenā aso mai i o latou aai, o tagata e toʻa 26,000 e iai a latou pelu, e ese mai i tagata e toʻa 700 na filifilia mai i Kipea.
16 E mai i lenei ‘autau, e toʻa 700 tagata e lima tauagavale na filifilia. O i latou uma nei e matuā tomai i le sasauina o le maatā* ae e lē misi.
17 Ua faitauina tagata Isaraelu e aunoa ma Peniamina, e toʻa 400,000 tagata e iai a latou pelu,+ ma o i latou uma nei o fitafita tomai.
18 Ua tutū i latou ma ō aʻe i Peteli ina ia fesili atu i le Atua.+ Ua faapea atu tagata Isaraelu: “O ai o i matou e taʻimua i le taua ma le fanauga a Peniamina?” Ae ua tali mai Ieova: “E taʻimua Iuta.”
19 Ua mavae lenā mea, ona tutū lea o le fanauga a Isaraelu i le taeao ma tolauapi e siitaua iā Kipea.
20 Ua ō atu tagata Isaraelu e tau ma Peniamina; ma ua faapotopoto faatasi tagata Isaraelu e tau ma i latou i Kipea.
21 Ona ō atu lea o le fanauga a Peniamina mai i Kipea, ma fasiotia i lenā aso tagata Isaraelu e toʻa 22,000.
22 Ae na lototetele le ‘autau a tagata Isaraelu, ma toe faapotopoto faatasi e tau i le nofoaga lea na latou faapotopoto faatasi ai i le aso muamua.
23 Ona ō aʻe lea o le fanauga a Isaraelu ua fetagisi i luma o Ieova se‘ia oo i le afiafi, ma fesili atu iā Ieova: “Pe e matou te toe ō aʻe ea e tau ma o matou uso, o tagata Peniamina?”+ Ona fetalai mai lea o Ieova: “Ia outou ō aʻe e tau ma i latou.”
24 Ona faalatalata atu lea o le fanauga a Isaraelu i le fanauga a Peniamina i le aso lona lua.
25 Ua ō mai Peniamina mai i Kipea e faafetaiaʻi i latou i le aso lona lua, ma fasiotia le isi toʻa 18,000 o le fanauga a Isaraelu,+ o i latou uma nei e iai a latou pelu.
26 Ua ō aʻe tagata uma o Isaraelu i Peteli. Ua latou fetagisi ma nonofo i luma o Ieova,+ ua anapopogi+ i lenā aso seʻia oo lava i le afiafi, ma ofo atu taulaga mū+ ma taulaga faifaatasi+ i luma o Ieova.
27 Ona fesili atu lea o tagata Isaraelu iā Ieova,+ auā o i inā sa iai le atolaau o le feagaiga a le Atua moni i na aso.
28 I na aso, ua auauna* ai i luma o le atolaau o Fineaso+ le atalii o Eleasaro, o le atalii lea o Arona. Ua latou fesili atu: “Pe e matou te toe ō ea e tau ma o matou uso o tagata Peniamina, pe e leai?”+ Ona tali mai lea o Ieova: “Inā ō aʻe ia, auā o taeao ou te tuuina atu ai i latou i o outou lima.”
29 Ona faalalafi lea e Isaraelu o ʻau+ e siitaua i itu uma o Kipea.
30 Ua ō aʻe le fanauga a Isaraelu e siitaua i le fanauga a Peniamina i le aso lona tolu, ma ua faapotopoto faatasi e tau ma Kipea e pei o isi taimi.+
31 Ina ua ō atu le fanauga a Peniamina e faafetaiaʻi le ‘autau, ona tataʻi ese ai lea o i latou mai i le aai.+ E pei o isi taimi, ua latou osofa‘ia ma fasiotia nisi o tagata i ala tetele, o le tasi o ala tele e alu aʻe i Peteli ma le isi e agaʻi i Kipea, ma tuua ai i le fanua tagata e toʻa 30 o Isaraelu na feoti.+
32 Ua faapea ane le fanauga a Peniamina: “Ua toe toʻilalo i latou e pei ona tupu muamua.”+ Ae ua faapea ane le fanauga a Isaraelu: “Inā tatou solomuli ia ina ia tataʻi ese mai ai i latou mai i le aai aga‘i i ala tetele.”
33 Ona tutula‘i lea o tagata uma o Isaraelu mai i mea sa iai, ma ua faapotopoto faatasi i Paala-tamara, a o ʻau na lalafi a tagata Isaraelu, ua osofa‘i mai i mea sa iai i le fanua o Kipea.
34 Ona ō ane lea o tagata e toʻa 10,000 na filifilia mai iā Isaraelu i luma o Kipea, ma ua tetele le taua. Ae ua lē iloa e le fanauga a Peniamina ua oo mai le mala iā i latou.
35 Ua faatoʻilalo e Ieova o Peniamina+ i luma o Isaraelu, ona fasiotia lea e le fanauga a Isaraelu i lenā aso o tagata Peniamina e toʻa 25,100, o i latou uma nei e iai a latou pelu.+
36 Peitaʻi, ua manatu le fanauga a Peniamina, o le a toʻilalo tagata Isaraelu ina ua solomuli mai iā Peniamina,+ ae sa latou solomuli ona sa latou faalagolago i ʻau na lalafi e latalata i Kipea.+
37 Ua vave gaoioi ʻau na lalafi, ma ua latou osofaʻi atu e agaʻi i Kipea. Ona taape atu lea o ʻau na lalafi ma fasia le aai atoa i le pelu.
38 Ona faia lea e tagata Isaraelu se fuafuaga ma ʻau na lalafi, ina ia latou faia se faailoilo ia faamū se afi, ma alu aʻe ai le asu mai i le aai.
39 Ina ua liliuese le fanauga a Isaraelu mai i le taua, ona osofa‘ia ma fasiotia lea e tagata Peniamina le pe tusa ma le toʻa 30 o tagata o Isaraelu,+ ma ua latou faapea ane: “Ua latou toe toʻilalo fo‘i i o tatou luma, e pei ona tupu i le taua muamua.”+
40 Ona alu aʻe lea o le faailoilo mai i le aai e pei o se asu faaniutū. O lea, ina ua faliu i tua tagata Peniamina, na latou vaaia le alu aʻe i le lagi o le mū o le aai atoa.
41 Ua toe liliu mai tagata Isaraelu, ma ua atuatuvale tagata Peniamina, auā ua latou iloa ua oo mai iā i latou le mala.
42 Ona latou sosola lea mai i tagata Isaraelu ma agaʻi atu i le toafa, ae ua tuliloa pea i latou e tagata Isaraelu; na ō mai fo‘i tagata mai i aai ma ‘au faatasi i le fasiotiga o i latou.
43 Ua latou siʻosiʻomia le fanauga a Peniamina, ma lē mālōlō i le tuliloaina o i latou. Ua latou faaumatia i latou i luma o Kipea i le itu i sasa‘e.
44 E toʻa 18,000 tagata Peniamina na fasiotia, o i latou uma o tagata totoa.+
45 Ona liliu lea o tagata Peniamina ma sosola i le toafa i le papa o Rimoni,+ ma ua fasiotia* e le fanauga a Isaraelu le toʻa 5,000 o i latou i ala tetele, ma tuliloa atu pea i latou e oo atu i Kitoma, ma fasiotia ai isi tagata e toʻa 2,000.
46 O i latou uma foʻi o Peniamina na fasiotia i lenā aso, na oo atu lava i le toʻa 25,000 o tagata e iai a latou pelu,+ o i latou uma o tagata totoa.
47 Ae ua sosola tagata e toʻa 600 i le toafa i le papa o Rimoni, ua nonofo ai i le papa o Rimoni i masina e fā.
48 Ua toe foʻi atu tagata o Isaraelu e tau ma le fanauga a Peniamina, ma fasia i latou o loo i le aai i le pelu, e amata mai i tagata e oo i manu, ma mea uma o loo totoe ai. Na latou susunuina foʻi i le afi aai uma na maua.
Faamatalaga Pito i Lalo
^ Epe., “e pei o se tagata e toʻatasi.”
^ Pe atonu “tagata e ona fanua.”
^ Epe., “e pei o se tagata e toʻatasi.”
^ Tagaʻi i le Uiga o Upu.
^ Epe., “e pei o se tagata e toʻatasi.”
^ Po o le “i le sasauina o le maatā i le lauulu.”
^ Epe., “tū.”
^ Epe., “aoaoina.”
