Esoto 6:1-30
6 Ua fetalai mai Ieova iā Mose: “O le a e vaai i le mea ou te faia iā Farao.+ O le lima malosi o le a faamalosia ai o ia e tuu mai i latou e ō, o le lima malosi foʻi o le a faamalosia ai o ia e tuliesea i latou mai i lona atunuu.”+
2 Ona fetalai mai lea o le Atua iā Mose: “O aʻu o Ieova.
3 Na iloa aʻu e Aperaamo, Isaako, ma Iakopo, o le Atua o Lē e ona le malosi uma lava,+ ae ou te leʻi matuā faailoa atu aʻu iā te i latou+ e tusa ma loʻu igoa o Ieova.+
4 Na ou osia foʻi laʻu feagaiga ma i latou, ina ia avatu iā i latou le laueleele o Kanana, le atunuu lea na latou aumau ai o ni tagata ese.+
5 O aʻu foʻi ua ou faalogo i le ōi o le fanauga a Isaraelu, o ē ua faapologaina e tagata Aikupito, ma ou manatua ai laʻu feagaiga.+
6 “O lea, ia fai atu i le fanauga a Isaraelu, ‘O aʻu o Ieova, ou te faasaʻolotoina outou mai i avega mamafa a tagata Aikupito, ma laveaʻi outou mai i le nofo pologa+ iā i latou, ma ou te laveaʻiina foʻi outou i le lima faaloaloa* ma faasalaga mataʻutia.+
7 E fai outou ma oʻu nuu, ma avea aʻu ma o outou Atua;+ e tou te iloa ai o aʻu lava o Ieova lo outou Atua, o lē ua faasaʻolotoina outou mai i avega mamafa a Aikupito.
8 Ou te avatu outou i le laueleele na ou tautō* e avatu iā Aperaamo, Isaako, ma Iakopo; ou te avatu iā te outou e fai ma o outou tofi.+ O aʻu o Ieova.’”+
9 Ona faaoo atu lea e Mose o lenā fe‘au i le fanauga a Isaraelu, ae e leʻi faalogo i latou iā Mose ona o le lotovaivai ma le faigatā o le nofo pologa.+
10 Ona fetalai mai lea o Ieova iā Mose e faapea:
11 “Ia e alu atu ma e fai atu iā Farao le tupu o Aikupito, e tatau ona ia aauina ese atu le fanauga a Isaraelu mai i lona atunuu.”
12 Peitaʻi, ua tali atu Mose iā Ieova: “Silasila foʻi! e leʻi faalogo le fanauga a Isaraelu iā te aʻu;+ e faapefea la ona faalogo mai Farao iā te aʻu, ae e faigatā ona ou tautala?”*+
13 Ae ua fetalai mai pea Ieova iā Mose ma Arona, ina ia la faailoa atu ana poloaʻiga i le fanauga a Isaraelu ma Farao le tupu o Aikupito, ina ia aveese mai le fanauga a Isaraelu mai i le atunuu o Aikupito.
14 O ulu nei o aiga o o latou tamā: O atalii o Reupena le ulumatua a Isaraelu+ o Hanoka, o Falu, o Esarona, ma Karame.+ O i latou nei na tupuga mai iā Reupena.
15 O atalii o Simeona o Iemuelu, o Iaminu, o Oata, o Iakinu, o Soaro, ma Sekulo le tama a le fafine Kanana.+ O i latou nei na tupuga mai iā Simeona.
16 O igoa nei o atalii o Levi+ e tusa ma tupuaga o o latou aiga: o Keresona, o Koato, ma Merari.+ E 137 tausaga na ola ai Levi.
17 O atalii o Keresona, o Lipeni ma Semi e tusa ma o la aiga.+
18 O atalii o Koato o Amaramo, o Isara, o Heperona, ma Usialu.+ E 133 tausaga na ola ai Koato.
19 O atalii o Merari, o Maali ma Muse.
O aiga nei o le ʻau sa Levī, e tusa ma tupuaga o o latou aiga.+
20 Na ave e Amaramo Iokapeta le tuafafine o lona tamā e fai ma ana avā.+ Na fanaua e Iokapeta o Arona ma Mose.+ E 137 tausaga na ola ai Amaramo.
21 O atalii o Isara o Koru,+ o Nefeku, ma Sekari.
22 O atalii o Usialu o Mesaelu, o Elisafano,+ ma Seteri.
23 Na ave e Arona o Elisapela le afafine o Aminatapu, o le tuafafine o Naasona,+ e fai ma ana avā. Na fanaua e Elisapela mai iā te ia o Natapu, o Aviu, o Eleasaro, ma Itamaro.+
24 O atalii o Koru o Asiro, o Elekana, ma Aviasafo.+ O aiga ia o tagata Koru.+
25 Na ave e Eleasaro,+ o le atalii o Arona se tasi o afafine o Potialu e fai ma ana avā. Na ia fanaua mai iā te ia o Fineaso.+
O ulu nei o aiga o tamā o le ʻau sa Levī, e tusa ai ma o latou aiga.+
26 O gafa ia o Arona ma Mose o ē na fetalai i ai Ieova: “Ia aveese ta‘i vaega*+ le fanauga a Isaraelu mai i Aikupito.”
27 O i laʻua ia na fai iā Farao le tupu o Aikupito, ina ia aveese le fanauga a Isaraelu mai i Aikupito. O Mose lenei ma Arona.+
28 I lenā aso ina ua fetalai mai Ieova iā Mose i le laueleele o Aikupito,
29 na faapea mai ai Ieova iā Mose: “O aʻu o Ieova. Ia e taʻu atu iā Farao, le tupu o Aikupito mea uma ua ou fai atu ai iā te oe.”
30 Ona fai atu lea o Mose iā Ieova: “Silasila foʻi! e faigatā ona ou tautala,* e faapefea la ona faalogo mai Farao iā te aʻu?”+
Faamatalaga Pito i Lalo
^ Po o le “lima malosi.”
^ Epe., “na sii ai lo‘u lima.”
^ Epe., “e leʻi peritomeina oʻu laugutu.”
^ Epe., “e pei o se ʻautau.”
^ Epe., “e leʻi peritomeina oʻu laugutu.”
