Esoto 37:1-29
37 Ua faia e Pesaleli+ le Atolaau+ mai i laau o le setima. E lua ma le ʻafa kupita* lona umi, e kupita ma le ʻafa lona lautele, ma le kupita ma le ʻafa lona maualuga.+
2 Ua ia ufiufi totonu ma fafo i le auro māoʻi, ma ua ia faia se teuteu auro e faataamilo ai.+
3 Ua ia tunu le auro ona fai ai lea o ni mama se fā mo le Atolaau ma tuu i luga aʻe o ona vae e fā, e lua mama i le tasi itu ma mama e lua i le isi itu.
4 Ua ia faia amo i laau o le setima ma ufiufi i le auro.+
5 Ona ia sulu lea o amo i totonu o mama o loo i itu o le Atolaau, ina ia mafai ona amo ai le Atolaau.+
6 Ua ia faia le ufiufi i le auro māoʻi.+ E lua ma le ʻafa kupita lona umi ma le kupita ma le ʻafa lona lautele.+
7 Ua ia faia foʻi o kerupi+ auro e lua e ala i le faaaogāina o le samala, ma tuu i pito e lua o le ufiufi o le Atolaau.+
8 Ua faia le tasi kerupi i le tasi pito, ma le isi kerupi i le isi pito. Ua ia faia kerupi i luga o le ufiufi i ona pito e lua.
9 Ua fālō i luga apaʻau o kerupi e lua, ma faamalumalu i le ufiufi o le Atolaau i o la apaʻau.+ Ua la faafesagaʻi, ma ua faasasaga i lalo o la mata i le ufiufi.+
10 Ua ia faia se laulau i laau o le setima.+ E lua kupita lona umi, e kupita lona lautele ma e kupita ma le ʻafa lona maualuga.+
11 Ona ia ufiufi ai lea i le auro māoʻi ma faia se teuteu auro e faataamilo ai.
12 Ua ia faia foʻi se laupapa e tusa ma le lautele o le alofilima* e faataamilo ai, ma ua ia faia foʻi se teuteu auro e faataamilo i le laupapa.
13 Ua ia tunu foʻi le auro ma fai ai ni mama se fā ma tuu mama i tulimanu e fā, ia e pipii ai vae e fā o le laulau.
14 E felataʻi mama ma le laupapa e fai ma lagolago i amo e amo ai le laulau.
15 Ua ia faia amo mai i laau o le setima ma ufiufi ai i le auro, ina ia amo ai le laulau.
16 Mulimuli ane, ua ia faia i le auro māoʻi o mea e faaaogā i luga o le laulau, o ipu mafolafola, o ipu, o ipu faaofuofu, ma fagu e faaaogā e liligi ai taulaga o meainu.+
17 Ua ia faia le tuugāmolī+ i le auro māoʻi. Ua ia faia foʻi le tuugāmolī e ala i le faaaogāina o le samala. Ua iai lona ʻau, o ona lālā, o ona ipu, o ona pona, ma ona fuga, ma e fesootaʻi ona vaega uma.+
18 E ono lālā e falala mai i le ʻau, e tolu lālā o le tuugāmolī i le tasi itu ma le isi tolu lālā i le isi itu.
19 E tolu ipu e foliga e pei o ni fugālaau o le sekati i le lālā e tasi, e sosoo ona pona ma ona fuga, ma o le isi lālā e iai ipu e tolu e foliga e pei o ni fugālaau o le sekati, e sosoo ona pona ma ona fuga. O le auala lenei e falala mai ai lālā e ono mai i le ‘au o le tuugāmolī.
20 O le ʻau o le tuugāmolī ua iai ipu e fā e foliga e pei o ni fugālaau o le sekati, ua sosoo pona ma fuga.
21 E iai le pona i lalo o ulua‘i lālā e lua e falala mai i le ‘au, ma le isi pona i lalo o isi lālā e lua e sosoo ai, ma le isi pona i lalo o isi lālā e lua e sosoo ai, auā o ia lālā e ono e falala mai i le ʻau o le tuugāmolī.
22 O pona ma lālā ma le tuugāmolī atoa, ua faia uma i le auro māoʻi e tasi e ala i le faaaogāina o le samala.
23 Ua ia faia i le auro māoʻi ona molī e fitu+ ma ona iofi ma ona salefu.
24 Ua ia faia le tuugāmolī ma mea uma e faaaogā ai mai i le taleni* o le auro māoʻi.
25 Ua ia faia le fata faitaulaga e faamū ai mea manogi+ i laau o le setima. Ua fai faatafafā, e kupita lona umi, e kupita lona lautele, ma e lua kupita lona maualuga. Ua faia ona seu i le mea na faia ai le fata faitaulaga.+
26 Ua ia ufiufi ai i le auro māoʻi, o lona pito i luga, o ona itu uma ma ona seu, ua ia faia foʻi se teuteu auro e faataamilo ai.
27 Ua ia faia mama auro e lua mo le fata faitaulaga i le pito i lalo o le teuteu i ona itu e lua ia e faafesagaʻi, e fai ma lagolago mo amo ia e amo ai.
28 Ona ia faia lea o amo i laau o le setima ma ufiufi ai i le auro.
29 Ua ia faia foʻi le suāuu paia e faauu ai,+ ma le mea manogi lelei e faamū ai,+ ua matuā lelei ona palu faatasi.*
Faamatalaga Pito i Lalo
^ Po o le “ua pei o le galuega a se tagata fai uu manogi.”
