Esoto 34:1-35
34 Ona fetalai mai lea o Ieova iā Mose: “Ia e tā mai ni papamaa se lua e pei o papamaa muamua,+ ina ia ou tusi ai i luga o ia papamaa o upu na tusia i papamaa muamua+ ia na e nutililiia.+
2 Ia e sauni mo a taeao, auā e tatau ona e alu aʻe i le mauga o Sinai a taeao, ma tū i o‘u luma i le tumutumu o le mauga.+
3 E leai se tasi e lua te ō aʻe, ma aua neʻi iloa se tasi i le mauga atoa. Aua neʻi tataa i le fanua i luma o le mauga ni lafu mamoe ma ni lafumanu.”+
4 Ua tā e Mose papamaa e lua e pei o papamaa muamua, ua usupō i le taeao ma alu aʻe i le mauga o Sinai, e pei ona poloaʻi mai ai Ieova iā te ia, ma ua ia ave foʻi i lona lima o papamaa e lua.
5 Ona afio ifo ai lea o Ieova+ i le ao ma faatasi ma ia i inā, ma folafola atu le suafa o Ieova.+
6 Ua afio ane Ieova i ona luma ma folafola mai: “O Ieova, o Ieova, o le Atua e alofa mutimutivale+ ma tigā alofa,*+ e telegese lona toʻasā+ ae e tele lona alofa faamaoni+ ma tausisi i ana fetalaiga,*+
7 e faaalia le alofa faamaoni e oo atu i afe o tupulaga,+ e faamagalo mea sesē, o solitulafono ma agasala,+ ae e na te lē faasaoina o ē e agasala mai i faasalaga,+ e na te faasalaina atalii e oo foʻi i o latou atalii, ona o mea sesē a o latou tamā, e oo lava i le tupulaga e tolu ma le tupulaga e fā.”+
8 Ona faavave ane lea o Mose ua punou ma faapaʻū faō.
9 Ua ia faapea atu: “Ieova e, afai ua fiafia lou finagalo iā te aʻu, faamolemole ia ō faatasi Ieova ma i matou+ e ui o i matou o tagata faauamaaa,+ ia e faamagalo o matou sesē ma a matou agasala,+ ma ia avea i matou ma ou lava nuu.”
10 Ona ia fetalai mai lea: “O lenei, ua ou osia se feagaiga ma outou: Ou te faia mea ofoofogia i luma o ou tagata uma, o mea e leʻi faia lava i le lalolagi atoa, pe faia foʻi i atunuu uma,+ ma o le a vaaia e tagata uma i le mea tou te iai o galuega a Ieova, auā e ofoofogia le mea ua ou faia iā te outou.+
11 “Ia ua‘i i mea ua ou poloaʻi atu ai iā te oe i le asō.+ Ou te tuliesea mai i ou luma o tagata Amorī, o tagata Kanana, o tagata Hetī, o tagata Perisē, o tagata Hivī, ma tagata Iepusē.+
12 Ia e faaeteete neʻi e osia se feagaiga ma tagata o le atunuu lea e te alu atu i ai,+ neʻi avea ma mailei iā te outou.+
13 Ia outou talepe i lalo o latou fata faitaulaga, ia outou nutililii i a latou poutū paia, ma ia outou tā i lalo o latou pou paia.*+
14 Aua e te ifo i se isi atua,+ auā o Ieova e finagalo e tapua‘i atu tau lava o ia.* Ioe, o ia o le Atua e finagalo e tapua‘i atu tau lava o ia.+
15 Ia faaeteete neʻi e osia se feagaiga ma tagata o le atunuu, ona pe a latou faia faiga faatalitane ma o latou lava atua ma fai taulaga foʻi i o latou atua,+ o le a valaaulia e se tasi oe ma e ʻai ai mai i lana taulaga.+
16 Ona e ave lea o nisi o o latou afafine mo ou atalii,+ ma o le a faia e o latou afafine faiga faatalitane ma o latou atua, ma faapogaia ou atalii e faia faiga faatalitane ma o latou atua.+
17 “Aua neʻi e faia ni tupua uʻamea.+
18 “Ia e tausia le Tausamiga o Falaoa e Lē Faafefeteina.+ E te ʻai i falaoa e lē faafefeteina e pei ona ou poloaʻi atu ai iā te oe; ia faia lea mea mo aso e fitu i le taimi faatulagaina i le masina o Apipa,*+ auā o le masina o Apipa lea na outou ō ese mai ai i Aikupito.
19 “O tama ulumatua uma lava* e fai ia mo aʻu,+ e aofia ai au lafumanu uma, e tusa po o le povi poʻa ulumatua po o le mamoe poʻa ulumatua.+
20 O le ulumatua a se asini, ia e fesuiaʻi ma se mamoe. Ae afai e te lē fesuiaʻia ma se mamoe, ona e gagau lea o lona ua. Ia e toe faatau mai ulumatua uma a ou atalii.+ E leai se isi e sau i oʻu luma e aunoa ma se mea.
21 “E ono aso e te faia ai galuega, ae o le aso lona fitu e te mālōlō ai.*+ E te mālōlō e tusa po o le taimi e suatia ai le eleele ma le taimi e selesele ai.
22 “E te tausia le Tausamiga o Vaiaso i uluaʻi fua ua matutua o le seleselega saito, ma le Tausamiga o le Aoaoina o Fua* i le faaiʻuga o le tausaga.+
23 “I tausaga taʻitasi, ia faatolu ona tutū tane uma ua iā te oe i luma o le Alii moni o Ieova, o le Atua o Isaraelu.+
24 Auā ou te tuliesea nuu mai i ou luma,+ ma ou te faalautele lou laueleele; e leai se tasi e manaʻo i lou fanua a o e alu aʻe e vaai i fofoga o Ieova lou Atua e faatolu i le tausaga.
25 “Aua e te osi faatasi le toto o laʻu taulaga ma so o se mea ua faafefeteina.+ E lē tatau ona tuua seʻia oo i le taeao le taulaga o le tausamiga o le Paseka.+
26 “Ia e avatu i le fale o Ieova lou Atua o uluaʻi fua ua matutua e aupito lelei o lou laueleele.+
“Aua e te sakaina le tamaʻi ʻoti i le suāsusu o lona tinā.”+
27 Ona toe fetalai mai lea o Ieova iā Mose: “Ia e tusi i lalo upu nei,+ auā e tusa ma ia upu, ua ou osia ai se feagaiga ma oe atoa ma Isaraelu.”+
28 Ua ia faatasi pea ma Ieova i inā mo le 40 ao ma le 40 pō. E leʻi ʻai o ia i ni meaʻai pe e inu i se vai.+ Ua Ia tusia i papamaa o upu o le feagaiga, o Tulafono e Sefulu.*+
29 Ua alu ifo Mose mai i le mauga o Sinai, ma ua iai i lona lima papamaa e lua o le Molimau.+ Ina ua alu ifo o ia mai i le mauga, e leʻi iloa e Mose ua susulu mai le malamalama i ona foliga, auā na ia talanoa ma le Atua.
30 Ina ua vāai Arona ma le fanauga uma a Isaraelu iā Mose, na latou mātauina ua susulu mai le malamalama i ona foliga, ma ua latou fefefe e faalatalata atu iā te ia.+
31 Ae ua valaau atu Mose iā i latou, ona ō mai lea iā te ia o Arona ma taʻitaʻi uma o le faapotopotoga, ma ua talanoa atu Mose iā i latou.
32 Ua mavae lea, ona faalatalata mai lea iā te ia o le fanauga uma a Isaraelu, ona ia avatu lea o poloa‘iga uma na tuuina mai e Ieova iā te ia i le mauga o Sinai.+
33 Pe a uma ona talanoa atu Mose iā i latou, ona ia ufiufi lea o ona foliga.+
34 Ae a ulufale Mose i luma o Ieova e talanoa ma ia, e na te aveese le ufiufi seʻia toe ulufafo.+ Pe a alu i fafo o ia, ona ia faailoa atu lea i le fanauga a Isaraelu o poloaʻiga na tuuina mai iā te ia.+
35 Ona vāai lea o le fanauga a Isaraelu ua susulu mai le malamalama mai i foliga o Mose; ona toe ufiufi ai lea e Mose o ona foliga seʻia ulufale o ia e talanoa ma le Atua.*+
Faamatalaga Pito i Lalo
^ Po o le “alofa fua.”
^ Po o le “ma faamaoni.”
^ Tagaʻi i le Uiga o Upu.
^ Po o le “auā e iloa Ieova i le lē taliaina o se isi lava atua; o le suafa o Ieova o le Fuā.”
^ Epe., “O mea uma na tatala ai le faaautama.”
^ Po o le “tausia ai le sapati.”
^ E taʻua foʻi o le Tausamiga o Fale Lauvao (Faleapitaga).
^ Epe., “o Upu e Sefulu.” O mea e sefulu e ao ona fai.
^ Epe., “ma ia.”
