Esoto 30:1-38
30 “E te faia se fata faitaulaga e faamū ai mea manogi;+ e te faia i le laau o le setima.+
2 Ia fai faatafafā, e kupita* lona umi, e kupita foʻi lona lautele, ma e lua kupita lona maualuga. E faia ona seu i le mea na faia ai le fata faitaulaga.+
3 E ao ona e ufiufi i le auro māoʻi: o lona pito i luga, o ona itu uma, ma ona seu; e ao foʻi ona e faia se teuteu auro e faataamilo ai.
4 E te faia foʻi ni mama auro se lua mo le fata faitaulaga i le pito i lalo o le teuteu i ona itu e lua ia e faafesagaʻi, ma e fai ma lagolago i amo ia e amo ai.
5 Ia faia amo i laau o le setima ma ufiufi ai i le auro.
6 E te tuuina ai i luma o le ʻie puipui e latalata i le atolaau o le feagaiga,*+ i luma o le ufiufi o le atolaau, o i inā ta te feiloaʻi ai.+
7 “E faamū e Arona+ mea manogi lelei+ i luga o le fata faitaulaga,+ ina ia alu a‘e ai le asu mai i le fata faitaulaga pe a ia saunia molī+ i taeao uma.
8 Pe a tutu e Arona molī i le afiafipō,* e na te faamūina mea manogi. O se taulaga o mea manogi e faia e lē aunoa i luma o Ieova i o outou tupulaga o loo mulimuli mai.
9 Aua tou te faamū ai mea manogi e faasāina,+ pe faia ai se taulaga mū, po o se taulaga i meaʻai, ma aua foʻi tou te sasaa taulaga i meainu i le fata faitaulaga.
10 E ao ona faia e Arona e faatasi i le tausaga+ o le togisala i luga o seu o le fata faitaulaga. E na te faia e faatasi i le tausaga lenei togisala mo le fata faitaulaga, i le toto o le taulaga o agasala+ i o outou tupulaga o loo mulimuli mai. O se mea e sili ona paia iā Ieova.”
11 Ua fetalai mai Ieova iā Mose:
12 “Pe a faitau le aofaʻiga o atalii o Isaraelu+ ina ia iloa lo latou faitau aofaʻi, e ao ona taʻitoʻatasi ona latou avatu se togiola mo lona ola iā Ieova pe a faia le faitauga o i latou. E faia faapea ina ia lē oo ai se mala iā i latou pe a lesitala i latou.
13 O mea nei e avatu e i latou uma e lesitala: o le ʻafa sekeli* e tusa ma le fua masani o le mea paia.*+ O le 20 kire* e tutusa lea ma le sekeli. O le ʻafa sekeli o le foaʻi lea iā Ieova.+
14 O i latou uma ua lesitala e 20 tausaga ma matutua atu, e latou te avatu le foaʻi iā Ieova.+
15 E lē tatau ona tele mea e avatu e tagata mauʻoa, e lē tatau foʻi i tagata matitiva ona avatu mea e itiiti ifo i le ʻafa sekeli,* pe a faia le foaʻi iā Ieova e fai ma togisala mo o outou ola.
16 E te aumaia foʻi tupe siliva o le togisala mai i le fanauga a Isaraelu ma avatu mo le auaunaga i le faleʻie o le feiloaʻiga, ina ia fai ma faamanatuga i luma o Ieova mo le fanauga a Isaraelu, ina ia faia ai le togisala mo o outou ola.”
17 Ua toe fetalai mai Ieova iā Mose e faapea:
18 “Ia faia i le ʻapamemea se faatanoa ma lona tulaga e faamamā ai,+ ona tuu lea i le vā o le faleʻie o le feiloaʻiga ma le fata faitaulaga ma sasaa i ai ni vai.+
19 E fufulu ai i inā e Arona ma ona atalii o latou lima ma o latou vae.+
20 Pe a latou ulu atu i le faleʻie o le feiloaʻiga, pe e latou te faalatalata atu foʻi i le fata faitaulaga e auauna ma faia taulaga i le afi ma alu aʻe ai le asu iā Ieova, e latou te mulumulu i le vai ina neʻi feoti i latou.
21 E ao ona fufulu o latou lima ma o latou vae ina neʻi feoti i latou, ia fai ai ma poloa‘iga tumau mo i latou, o ia ma lana fanau ma o latou tupulaga o loo mulimuli mai.”+
22 Ua toe fetalai mai Ieova iā Mose:
23 “Ia ave fo‘i mea manogi e sili ona lelei: o muro ua toʻa e 500 iunite, ma le ʻafa o lenā aofaʻiga o le kinamoni e suamalie e 250 iunite, o le kani e manaia lona manogi e 250 iunite,
24 ma le kesia* e 500 iunite e tusa ma le fua masani o le mea paia*+ ma le sinu* e tasi o le uu olive.
25 Ona faia mai ai lea o le suāuu paia e faauu ai; ia matuā lelei ona palu faatasi.*+ E tatau ona avea ma suāuu paia e faauu ai.
26 “E te faauu ai le faleʻie o le feiloaʻiga+ ma le atolaau o le feagaiga,*
27 faapea le laulau ma mea uma e faaaogā ai, o tuugāmolī ma mea uma e faaaogā ai, o le fata faitaulaga e faamū ai mea manogi,
28 o le fata faitaulaga e fai ai taulaga mū ma mea uma e faaaogā ai, ma le faatanoa ma lona tulaga.
29 E ao ona e faapaia ia mea ina ia fai ma mea e sili ona paia.+ O so o se tasi e paʻi i ia mea e tatau ona paia o ia.+
30 E te faauu iā Arona+ ma ona atalii,+ e te faapaia foʻi iā i latou ina ia auauna mai iā te aʻu o ni ositaulaga.+
31 “E te fai atu i le fanauga a Isaraelu e faapea, ‘E fai pea lenei uu ma suāuu paia e faauuina ai iā te aʻu i o outou tupulaga o loo mulimuli mai.+
32 Aua le uuina ai le tino o se tagata, ma aua tou te faaaogā lenei fua e faia ai se isi uu. O lenei uu o se mea paia. E ao ona avea pea o se mea e paia iā te outou.
33 O so o se tasi e na te faia se uu manogi faapea ma uu ai se tagata ese,* e tatau ona fasiotia o ia.’”+
34 Ua fetalai mai Ieova iā Mose: “E ao ona tutusa fua o ia mea manogi:+ o mea sisina o le natafa, o le sekeleta, o le pulu kalipana ua manogi lelei, ma le lipano lelei.*
35 Ia palu faatasi e faia ai se mea manogi;+ ia matuā lelei ona palu faatasi le paluga faafefiloi o mea manogi,* ia faamasima,+ ia mamā, ma o se mea paia.
36 Ia e matuā tu‘ininii nisi o ia mea e fai ai se pauta ma tuu se vaega i luma o le Atolaau* i le faleʻie o le feiloaʻiga, ta te feiloaʻi ai. E ao ona avea ma mea e sili ona paia iā te outou.
37 Aua ne‘i outou faaaogāina mo outou lava le mea manogi e te faia mai i lenei fua.+ Ia manatu i lea mea o se mea paia mo Ieova.
38 O so o se tasi e faia se mea faapea ina ia sogisogi i lona manogi, e tatau ona fasiotia o ia.”
Faamatalaga Pito i Lalo
^ Epe., “atolaau o le Molimau.”
^ Epe., “le vā o afiafi e lua.”
^ Po o le “e tusa ma le sekeli paia.”
^ Tagaʻi i le Uiga o Upu.
^ Po o le “e tusa ma le sekeli paia.”
^ Po o le “ia pei o le galuega a se tagata fai uu manogi.”
^ Epe., “atolaau o le Molimau.”
^ O se tasi e lē mai i le aiga o Arona.
^ O le “natafa” o se mea manogi e sinasina mai i se laau. O le “sekeleta,” atonu e fai mai i ni laau manogi po o ni figota. O le “lipano” o se mea manogi taugatā e manaia lona manogi pe a faamūina, e paʻepaʻe ma e tai pei o le sua o le laau o le pulu.
^ Po o le “ia pei o le galuega a se tagata fai uu manogi.”
^ Epe., “Molimau.”
