Esoto 29:1-46
29 “O le mea lenei e te faia ina ia faapaiaina ai i latou e auauna mai iā te aʻu o ni ositaulaga: Ia e ave se povi poʻa taanoa, o mamoe poʻa e lua e matuā lelei lava,+
2 o falaoa e lē faafefeteina, o falaoa lapotopoto e lē faafefeteina ua iai sina suāuu, ma falaoa manifinifi e lē faafefeteina ua nini i le suāuu.+ E te faia i le falaoamata o le saito aupito lelei,
3 ma tuuina na mea i se ato ma avatu i se ato+ faatasi ma le povi poʻa, ma mamoe poʻa e lua.
4 “E te ave Arona ma ona atalii i le faitotoʻa o le faleʻie o le feiloaʻiga,+ ma faatonuina i latou e tāʻeele i le vai.+
5 Ona e ave lea o ofu+ ma faaofu ai Arona i le ofu talaloa, ma le ofu talaloa lima pupuu e pito i totonu o le efota, o le efota, o le ufifatafata, ma e te fusi mau lona puimanava i le fusi ua teuteuina o le efota.+
6 Ia e tuu le pulou ʻie i luga o lona ulu ma fusi ai le faailoga paia o le tuuina atu* i luga o le pulou ʻie,+
7 ma ave le suāuu e faauu ai+ ma liligi i luga o lona ulu ma faauuina ai o ia.+
8 “Ona aumaia lea o ona atalii i o‘u luma ma faaofu i latou i ofu talaloa,+
9 ma fusi iā i latou i fusi ʻie, o Arona ma ona atalii, ma tuu le pulou i o latou ulu; e fai foʻi mo i latou le faiva o ositaulaga o se tulafono tumau.+ O le auala lea e te tofia ai Arona ma ona atalii e auauna o ni ositaulaga.*+
10 “E ao ona e avatu loa le povi poʻa i luma o le faleʻie o le feiloaʻiga, o Arona foʻi ma ona atalii e latou te faaee atu o latou lima i luga o le ulu o le povi poʻa.+
11 Ia fasi le povi poʻa i luma o Ieova i le faitotoʻa o le faleʻie o le feiloaʻiga.+
12 Ia ave sina vaega o le toto o le povi poʻa i lou tamatamaʻilima ma tuu i luga o seu o le fata faitaulaga,+ a o le toto o totoe ia sasaa i lalo o le fata faitaulaga.+
13 Ia ave foʻi le gaʻo+ ua lilofia ai le gaʻau, o le gaʻo i luga o le ate, ma fatugaʻo e lua ma le gaʻo i luga o na mea, ma ia susunuina ina ia alu a‘e ai le asu mai i le fata faitaulaga.+
14 A o le aano, o le paʻu ma otaota o le povi poʻa, e te susunuina i tua o le togālauapi. O le taulaga lea o agasala.
15 “Ona ave lea o le mamoe poʻa e tasi, e ao foʻi iā Arona ma ona atalii ona faaee atu o latou lima i luga o le ulu o le mamoe poʻa.+
16 Ia fasi le mamoe poʻa ma ave lona toto ma sausau solo i itu uma o le fata faitaulaga.+
17 Ia pena le mamoe poʻa i vaega, ma ia fufulu gaʻau+ ma vae, ia tuu ona vaega e faafeagai ma isi ona vaega seʻia oo lava i le ulu.
18 E ao ona susunuina atoa le mamoe poʻa ina ia alu a‘e le asu mai i le fata faitaulaga. O le taulaga mū lea iā Ieova, o se manogi lelei.*+ O le taulaga iā Ieova ua faia i le afi.
19 “Ona e ave lea o le isi mamoe poʻa, ma e ao iā Arona ma ona atalii ona faaee atu o latou lima i luga o le ulu o le mamoe poʻa.+
20 Ia fasi le mamoe poʻa ma ave sina toto ma tuu i le lautaliga o le taliga taumatau o Arona, ma lautaliga o taliga taumatau o ona atalii, i luga foʻi o limamatua o o latou lima taumatau, ma vaematua o o latou vae taumatau, ma ia sausau le toto i itu uma o le fata faitaulaga.
21 Ona ave lea o sina toto o loo i luga o le fata faitaulaga ma sina suāuu e faauuina ai,+ ia sausau i luga o Arona ma ona ofu, i luga o ona atalii ma ofu o ona atalii, ina ia paia ai o ia ma ona ofu, ma ona atalii ma o latou ofu.+
22 “Ia aumai le gaʻo mai i le mamoe poʻa, o le siʻusiʻu gaʻoa, o le gaʻo i luga o le gaʻau, o le gaʻo o le ate, o fatugaʻo e lua ma le gaʻo i luga o na mea,+ ma le alagavae taumatau, auā o le mamoe poʻa o le tofiga.+
23 Ia aumai fo‘i se falaoa lapotopoto, atoa ma se falaoa lapotopoto ua iai sina uu, ma se falaoa manifinifi mai i le ato o falaoa e lē faafefeteina o loo i luma o Ieova.
24 Ia e tuu ia mea uma i luga o lima o Arona ma luga o lima o ona atalii, ma ia e lūlū ia mea i le isi itu ma le isi itu, o le taulaga lūlū lea iā Ieova.
25 Ona e aveesea lea o na mea mai i o latou lima ma susunuina i luga o le fata faitaulaga, e susunu faatasi ma le taulaga mū, o se manogi lelei lea i luma o Ieova.* O le taulaga iā Ieova ua faia i le afi.
26 “Ona ave lea o le fatafata o le mamoe poʻa o le tofiga,+ lea e ofo mo Arona ma lūlū i le isi itu ma le isi itu o se taulaga lūlū i luma o Ieova, e avea ma au tufaaga.
27 E ao ona e faapaia le fatafata o le taulaga lūlū ma le vae o le tufaaga paia, o le taulaga na lūlūina ma o le taulaga mai i le mamoe poʻa mo le tofiga,+ e mai i le mamoe poʻa na ofo mo Arona ma ona atalii.
28 Ia fai ia mea ma tufaaga mo Arona ma ona atalii e tusa ma se poloaʻiga tumau, e faia e le fanauga a Isaraelu, auā o ni tufaaga paia, ma o le a aumaia ia tufaaga paia e le fanauga a Isaraelu.+ Ua avea ia mea ma tufaaga paia iā Ieova mai i a latou taulaga faifaatasi.+
29 “O ofu paia+ o Arona, e faaaogā e ona atalii+ pe a mavae atu o ia, pe a faauuina i latou ma tofia o ni ositaulaga.
30 E ofu ia ofu e le ositaulaga e sosoo ma ia mai i ona atalii i aso e fitu, o lē e ulu atu i totonu o le faleʻie o le feiloaʻiga e auauna i le mea paia.+
31 “E te ave le mamoe poʻa o le tofiga, ma ia e saka lona aano i se nofoaga paia.+
32 E ʻai e Arona ma ona atalii+ le aano o le mamoe poʻa, ma le falaoa ua i totonu o le ato i le faitotoʻa o le faleʻie o le feiloaʻiga.
33 Ia latou aai i mea ua uma ona faia ai le togisala ia na tofia ai i latou o ni ositaulaga,* ma faapaiaina ai i latou. E lē tatau ona ʻai ai se tagata ese* auā o mea paia ia mea.+
34 Pe afai e oo i le taeao o totoe ni aano o le taulaga o le tofiga ma ni falaoa, ona e susunuina lea i le afi o mea ua totoe.+ E lē tatau ona ʻaina na mea auā e paia.
35 “Ia e faia lenei mea iā Arona ma ona atalii e tusa ma mea uma ua ou poloaʻi atu ai iā te oe. E fitu aso e te tofia ai i latou o ni ositaulaga.*+
36 E te faia taulaga mo agasala i aso taʻitasi i le povi poʻa e avea ma togisala, e te faamamā foʻi le fata faitaulaga mai i le agasala, e ala i lou faia o se togisala mo le fata faitaulaga, ia e faauu i ai ma faapaiaina.+
37 E fitu aso e te faia ai le togisala mo le fata faitaulaga, ma ia e faapaiaina ina ia avea ma fata faitaulaga e sili ona paia.+ O so o se tasi e paʻi atu i le fata faitaulaga, e tatau ona paia o ia.
38 “O mea nei e te fai taulaga ai i le fata faitaulaga: e lua mamoe poʻa e taʻitasi tausaga, i lea aso ma lea aso e lē aunoa.+
39 Ia fai le taulaga i le mamoe poʻa e tasi i le taeao, a o le isi mamoe poʻa i le afiafipō.*+
40 E tasi vaesefulu o le efa* o le falaoamata lelei ua liligi i ai le tasi vaefā o le sinu* o le uu olive ua tuʻia, e tasi vaefā o le sinu o le uaina mo le taulaga o meainu, e faia faatasi ma le uluaʻi mamoe poʻa.
41 Ia e faia le taulaga i le mamoe poʻa lona lua i le afiafipō,* faatasi ma le taulaga i meaʻai ma le taulaga o meainu e pei ona faia i le taeao. Ia e faia le taulaga iā Ieova ua faia i le afi, o se manogi lelei lea iā te ia.*
42 O se taulaga mū faifai pea i o outou tupulaga o loo mulimuli mai, i le faitotoʻa o le faleʻie o le feiloaʻiga i luma o Ieova, ou te feiloaʻi ai ma outou ma tautala atu ai iā te oe i inā.+
43 “Ou te faafeiloaʻi atu i le fanauga a Isaraelu i inā, ma e faapaiaina lea mea i loʻu mamalu.+
44 Ou te faapaiaina le faleʻie o le feiloaʻiga ma le fata faitaulaga; ou te faapaiaina foʻi Arona ma ona atalii+ e auauna o ni ositaulaga iā te aʻu.
45 Ou te nofo* faatasi ma le nuu o Isaraelu, e fai aʻu ma o latou Atua.+
46 E latou te iloa ai o aʻu o Ieova lo latou Atua, o lē na aumaia i latou mai i le atunuu o Aikupito, ina ia ou nofo faatasi ai ma i latou.+ O aʻu o Ieova lo latou Atua.
Faamatalaga Pito i Lalo
^ Po o le “ma fusi ai le pale paia.”
^ Epe., “e te faatumu ai lima o Arona ma lima o ona atalii.”
^ Po o le “manogi ua faamalieina ai lona finagalo.”
^ Po o le “manogi ua faamalieina ai lona finagalo.”
^ Epe., “na faatumu ai o latou lima.”
^ O se tasi e lē mai i le aiga o Arona.
^ Epe., “e te faatumu ai o latou lima.”
^ Epe., “le vā o afiafi e lua.”
^ Epe., “le vā o afiafi e lua.”
^ Po o le “manogi ua faamalieina ai lona finagalo.”
^ Po o le “faatū loʻu faleʻie.”
