Esoto 28:1-43
28 “Ia e aumai mai i le fanauga a Isaraelu o lou uso o Arona faatasi ma ona atalii, ina ia auauna mai o ni ositaulaga iā te aʻu,+ o Arona+ ma ona atalii,+ o Natapu, o Aviu,+ o Eleasaro, ma Itamaro.+
2 Ia e faia ni ofu paia mo Arona lou uso, ina ia mamalu ma matagofie ai.+
3 Ia e tautala atu i ē uma e tomai* o ē ua ou faatumuina o latou loto i le atamai,+ e latou te faia ofu o Arona ina ia faapaiaina ai o ia, ma auauna mai ai o se ositaulaga iā te aʻu.
4 “O ofu nei e latou te faia: o le ufifatafata,+ o le efota,+ o le ofu talaloa lima pupuu,+ o le ofu talaloa ua iai mamanu faatafafā, o le pulou ʻie,+ ma le fusi ʻie;+ e ao ona latou faia nei ofu paia mo Arona lou uso ma ona atalii, ina ia auauna mai ai o ni ositaulaga iā te aʻu.
5 Ia faaaogā e tagata faigaluega tomai le auro, o le filo lanu moana, o le fulufulu mamoe lanu violē, o mea ua vali mūmū sesega, ma le ʻie lino lelei.
6 “Ia latou faia le efota i le auro, i filo lanu moana, i fulufulu mamoe lanu violē, i mea ua vali mūmū sesega, ma le ʻie lino ua lelei ona milo ona filo, ma ia su‘i ai ni teuteu.+
7 Ia latou faia fasi ʻie e lua o le tauʻau ia e sosoo faatasi i ona pito e lua i luga.
8 O le fusi ua teuteuina+ lea e su‘iina i le efota ina ia mau lelei ai le efota, ia faia i ia lava mea: o le auro, o le filo lanu moana, o le fulufulu mamoe lanu violē, o mea ua vali mūmū sesega, ma le ʻie lino ua lelei ona milo ona filo.
9 “Ia e ave maa tāua o le soama+ e lua ma vane ai i luga igoa o atalii o Isaraelu,+
10 o igoa e ono e vane i le isi maa, a o igoa o le isi toʻaono e vane i le isi maa, e tusa ma le faasologa o lo latou fananau mai.
11 Ia vaneina e le tufuga fai maa igoa o atalii o Isaraelu i nei maa e lua, e pei ona ia vaneina o se faamaufaailoga.+ Ona faamauina lea o nei maa e lua i teuteu auro.
12 Ia e tuu ia maa e lua i luga o tauʻau o le efota e fai ma maa e manatua ai atalii o Isaraelu,+ ma e tauave e Arona o latou igoa i luma o Ieova i luga o tauʻau e lua o le efota e fai ma faamanatuga.
13 Ia e faia foʻi teuteu auro,
14 ma filifili e lua o auro māoʻi e milo e pei o ni manoa,+ ma e te faamau ia filifili e pei o ni manoa i teuteu auro.+
15 “Ia faia e le tagata suʻi teuteu le ufifatafata mo faamasinoga.+ Ia faia e pei o le efota mai i le auro, o le filo lanu moana, o le fulufulu mamoe lanu violē, o mea ua vali mūmū sesega, ma le ʻie lino ua lelei ona milo ona filo.+
16 E ao ona faatafafā pe a faasautualua, e tusa ma le aga* lona umī, e aga foʻi lona lautele.
17 Ia e faamau ai ni maa tāua, ma e fā laina o maa. O le laina muamua e iai maa o le salikea, o le topasi, ma le samaraki.
18 O le laina lona lua e iai maa o le nofeka, o le safaira, ma le ialoma.
19 O le laina lona tolu e iai maa o le lesema,* o le sevo, ma le aselama.
20 O le laina lona fā e iai maa o le tasesa, o le soama, ma le iasepi. Ia faamau ia maa i totonu o teuteu auro.
21 E tasi le maa mo atalii ta‘itasi o Isaraelu. E vaneina nei maa ta‘itasi e pei o le vaneina o se faamaufaailoga. O maa ta‘itasi e vaneina ai igoa ta‘itasi o ituaiga e 12.
22 “Ia e faia i luga o le ufifatafata o filifili ua fili e pei o se maea i le auro māoʻi.+
23 E te faia foʻi mama auro e lua i luga o le ufifatafata, ma e tuu mama e lua i pito e lua o le ufifatafata.
24 E te faamau foʻi maea auro e lua i mama e lua i pito o le ufifatafata.
25 E te faamau pito e lua o maea e lua i teuteu auro e lua, ma e ao ona e faamau ia mea i tauʻau o le efota ina ia tautau le ufifatafata, i luma o le efota.
26 E te faia mama auro e lua ma tuu i pito e lua o le ufifatafata, i le pito i lalo lea e ū i le efota.+
27 E te faia ma nisi mama auro se lua ma tuu i luma o le efota i le pito i lalo o tauʻau e lua o le efota, e lata i le mea e sosoo ai, i luga a‘e o le fusi ua teuteuina o le efota.+
28 Ia nonoa maea lanu moana i mama o le ufifatafata, ona nonoa lea i mama o le efota ina ia mau lelei ai, ma lē see ese ai le ufifatafata mai i lona tulaga i le efota, i luga a‘e o le fusi ua teuteuina.
29 “E tauave e Arona igoa o atalii o Isaraelu o loo i le ufifatafata mo faamasinoga i luga o lona fatafata, pe a ulu atu o ia i le Mea Paia e fai ma faamanatuga e lē aunoa i luma o Ieova.
30 Ia e tuu le Urima ma le Tumema*+ i totonu o le ufifatafata mo faamasinoga, ma e ao ona i luga o le fatafata o Arona pe a ulu atu o ia i luma o Ieova; ia lē aunoa ona ave e Arona iʻuga o faamasinoga mo le fanauga a Isaraelu i luga o lona fatafata i luma o Ieova.
31 “E te faia le ofu talaloa lima pupuu atoa, o loo i le pito i totonu o le efota, i le filo lanu moana.+
32 E ao ona iai le ua i le ogatotonu o lea ofu. E tatau i sē e lalaga ʻie ona afe faataamilo le ua. E ao ona pei o le ua o le ofutau ʻapamemea ina ia lē masae ai.
33 E te faia rimoni* i le filo lanu moana, o le fulufulu mamoe lanu violē, ma mea ua vali mūmū sesega e faataamilo i le afe, ma logo auro e tovā faataamilomilo ai.
34 E sosoo le logo auro ma le rimoni, o le logo auro ma le rimoni e faataamilo i le afe o le ofu talaloa lima pupuu.
35 E ofu ai Arona pe a auauna o ia, ma e tatau ona lagona le tagitagi o logo mai iā te ia pe a ulu atu o ia i le mea paia i luma o Ieova ma pe a ulufafo foʻi, ina ia lē oti ai o ia.+
36 “E te faia se pale iila i le auro māoʻi ma vane ai e pei o le vaneina o se faamaufaailoga: ‘E paia lava Ieova.’+
37 Ia e faamau le pale iila i le pulou ʻie+ i se manoa lanu moana, ma e ao lava ona iai i luma o le pulou ʻie.
38 Ia fusi ai i le muāulu o Arona, ma e tali atu Arona pe a agasala se tasi i mea paia,+ ia e faapaiaina e le fanauga a Isaraelu pe a latou ofoina atu o ni meaalofa paia. Ia fusi pea i lona muāulu, ina ia latou maua ai le finagalo malie o Ieova.
39 “E ao foʻi ona e lalaga mamanu faatafafā i le ofu talaloa i le ʻie lino lelei, ma ia faia foʻi se pulou ʻie i le ʻie lino lelei, ma ia e faia se fusi ʻie ua lalagaina.+
40 “E te faia fo‘i ofu talaloa, o fusi ʻie, ma pulou mo atalii o Arona,+ ina ia mamalu ma matagofie ai.+
41 Ia faaofu lou uso o Arona ma ona atalii faatasi ma ia, ia e faauuina i latou+ ma tofia i latou*+ ma faapaiaina i latou, ma latou auauna mai ai o ni ositaulaga iā te aʻu.
42 Ia faia ni ofuvae pupuu i le ʻie lino ina ia ufiufi ai lo latou lē lavalavā.+ O ia ofuvae e mai i puimanava e oo i ogāvae.
43 E ao ona ofu e Arona ma ona atalii nei ofuvae pe a latou ō atu i le faleʻie o le feiloaʻiga, pe latou te faalatalata atu i le fata faitaulaga e auauna ai i le mea paia, ina neʻi nofosala i latou ma feoti ai. O le tulafono tumau lenei mo ia ma lana fanau pe a mavae atu o ia.
Faamatalaga Pito i Lalo
^ Epe., “e atamai o latou loto.”
^ E lē māiloa po o le ā lea maa tāua.
^ Tagaʻi i le Uiga o Upu.
^ O se fualaau ʻaina e lanu mūmū pāuli e pei o se apu.
^ Epe., “ma faatumu o latou lima.”
