Esoto 27:1-21
27 “E te faia le fata faitaulaga i le laau o le setima;+ e lima kupita* le umi, e lima kupita foʻi le lautele. Ia fai faatafafā le fata faitaulaga, ma o lona maualuga e tolu kupita.+
2 E te faia seu+ i ona tulimanu e fā; e faia seu i le mea na faia ai le fata faitaulaga, ma ia e ufiufi le fata faitaulaga i le ʻapamemea.+
3 E te faia ni ʻapa e faamamā ese ai le lefulefu,* o suō, o ipu faaofuofu, o tui, o salefu, ma ia e faia ia mea uma i le ʻapamemea.+
4 E te faia se lagolago valavala mo le fata faitaulaga i le ‘apamemea, ma ia e faia i le mea valavala ni mama ʻapamemea e fā i ona tulimanu e fā.
5 E te tuuina ai i lalo ifo o le augutu o le fata faitaulaga, ma ia oo lenei mea valavala i le ogatotonu o le fata faitaulaga.
6 E te faia amo mo le fata faitaulaga i laau o le setima, ma ufiufi ai i le ʻapamemea.
7 E ao foʻi ona e sulu amo i mama, ma e tatau ona iai amo i itu e lua o le fata faitaulaga pe a amoina.+
8 E te faia le fata faitaulaga ia foliga i se pusa laupapa e pū totonu. Ia faapea lava ona faia e pei ona Ia faaali atu iā te oe i le mauga.+
9 “E te faia le lotoā+ o le faleʻie paia. O le a iai i le lotoā ni ʻie e tautau ua faia i le ʻie lino ua lelei ona milo ona filo, i le itu i saute e faasaga i saute, ma e 100 kupita le umi o le itu e tasi.+
10 E 20 ona poutū ma e 20 fo‘i ona lagolago e faia i ʻapamemea. O pine ma sooga o poutū e faia i le siliva.
11 E faapea foʻi ʻie e tautau i le itu i mātū, e 100 kupita le umi, faatasi ma ona poutū e 20 ma lagolago e 20 e faia i le ʻapamemea, ma pine ma sooga o poutū e faia i le siliva.
12 A o le lautele o le lotoā i le itu i sisifo, e 50 kupita le uumi o ʻie e tautau ai, faatasi ma poutū e sefulu ma lagolago e sefulu.
13 O le lautele o le lotoā i le itu i sasaʻe i le mea e oso aʻe ai le lā, e 50 kupita.
14 E 15 kupita le uumi o ‘ie e tautau i le tasi itu o le faitotoʻa, faatasi ma poutū e tolu ma lagolago e tolu.+
15 A o le isi itu o le faitotoʻa, e 15 kupita le uumi o ʻie e tautau ai, faatasi ma poutū e tolu ma lagolago e tolu.
16 “O le faitotoʻa o le lotoā e iai se ʻie pupuni e 20 kupita le umi, e faia i filo lanu moana, o fulufulu mamoe lanu violē, o mea ua vali mūmū sesega, ma ʻie lino ua lelei ona milo ona filo,+ faatasi ma poutū e fā ma lagolago e fā.+
17 O poutū uma e siʻomia ai le lotoā e siliva mea e sosoo ai, e siliva foʻi pine ae e ʻapamemea lagolago.+
18 O le umi o le lotoā e 100 kupita,+ o le lautele e 50 kupita, o le maualuga e 5 kupita e faia i ʻie lino ua lelei ona milo ona filo, ma e ao ona iai ni lagolago ʻapamemea.
19 O mea uma e faaaogā i le auaunaga i le faleʻie paia, faapea fo‘i pine o le faleʻie ma pine uma o le lotoā, e ao ona faia i le ʻapamemea.+
20 “Ia e faatonu atu i le fanauga a Isaraelu, ina ia latou aumai iā te oe suāuu lelei mai i olive ua tuʻi mo le tuugāmolī, ina ia mumū ai pea molī.+
21 I le faleʻie o le feiloaʻiga, i fafo o le ʻie puipui o loo i tafatafa o le atolaau o le feagaiga,*+ e vaaia e Arona ma ona atalii molī ina ia mumū pea i luma o Ieova+ mai i le afiafipō seʻia oo i le taeao. O le tulafono tumau lenei i o latou tupulaga uma, e faia e le fanauga a Isaraelu.+
Faamatalaga Pito i Lalo
^ Po o “lefulefu ua gaʻoa,” e faasino atu i lefulefu ua gaʻoa mai i taulaga.
^ Epe., “Molimau.”
