Esoto 26:1-37
26 “E te faia le faleʻie paia+ i ʻie e sefulu, o le ʻie lino ua lelei ona milo ona filo, o filo lanu moana, o fulufulu mamoe lanu violē, ma mea ua vali mūmū sesega. E te suʻi ai ni teuteu o ata+ o kerupi.+
2 O le umi o ʻie taʻitasi o le faleʻie e 28 kupita,* ma e 4 kupita le lautele. E tutusa le fua mo ʻie uma o le faleʻie.+
3 E ao ona sosoo ʻie e lima o le faleʻie e fai ai se vaega e tasi, ma isi ʻie e lima e sosoo e fai ai le isi vaega.
4 Ia e faia ni faamaulave i le filo lanu moana i le faatausiʻusiʻuga o le tasi ʻie o le faleʻie i le pito o lea vaega; ia faapea foʻi ona e faia i le faatausiʻusiʻuga o le isi vaega lea e pito i tua, i le mea e sosoo ai.
5 E te faia faamaulave e 50 i le ʻie e tasi, e te faia foʻi faamaulave e 50 i le faatausiʻusiʻuga o le isi ʻie o le faleʻie o loo i le isi itu i le mea e sosoo ai, ia faafesagaʻi nei faamaulave.
6 E ao ona e faia ni lave auro se 50 ma sosoo faatasi ʻie o le faleʻie e faaaogā ai lave, ma avea ai o se faleʻie paia e tasi.+
7 “E te faia ʻie i fulufulu ʻoti+ e ufiufi ai le faleʻie paia. E te faia ʻie e 11 o le faleʻie.+
8 O le umi o ʻie taʻitasi o le faleʻie e 30 kupita, ma e 4 kupita le lautele. E tutusa le fua mo ʻie uma e 11.
9 E te sosooina ʻie e lima, e te sosooina foʻi isi ʻie e ono, e te gaulua le ʻie lona ono i le pito i luma o le faleʻie.
10 E te faia faamaulave e 50 i le faatausiʻusiʻuga o le tasi ʻie o le faleʻie o le vaega pito i tua, ma faamaulave e 50 i le faatausiʻusiʻuga o le isi ʻie i le mea e sosoo ai.
11 E te faia lave ʻapamemea e 50 ma tuu lave i faamaulave ma sosoo faatasi ai le faleʻie, ona tasi ai lea.
12 O ʻie e totoe o le faleʻie e faatautau. O le ʻafa o ʻie e totoe e tautau i le pito i tua o le faleʻie paia.
13 O mea e totoe i le umi o ʻie o le faleʻie e faatautau i itu o le faleʻie paia, e tasi le kupita i itu taʻitasi, ina ia ufiufi ai.
14 “E te faia se ufiufi o le faleʻie i paʻu o mamoe poʻa ua vali mūmū, ma se isi ufiufi i luga aʻe e faia i paʻu o takesa.+
15 “E te faia auivi laupapa+ mo le faleʻie paia i laau o le setima, ina ia faatutū ai.+
16 O le uumi o auivi laupapa taʻitasi e sefulu kupita, ma e tasi ma le ʻafa kupita le lautele.
17 O auivi laupapa taʻitasi, e iai faanifo* e lua e faafeagai le tasi ma le isi. O le auala lenā e te faia uma ai auivi laupapa o le faleʻie paia.
18 E te faia auivi laupapa e 20 mo le itu i saute o le faleʻie paia, e faasaga i le itu i saute.
19 “E te faia lagolago siliva+ e 40 e fetaui ma auivi laupapa e 20: e lua lagolago i lalo o le auivi laupapa e tasi ma ona faanifo e lua, ma e faapea foʻi i auivi laupapa e sosoo ai, e tofu ma lagolago e lua i lalo o auivi laupapa ma ona faanifo e lua.+
20 I le isi itu o le faleʻie paia i le itu i mātū, e te faia ai auivi laupapa e 20,
21 ma o latou lagolago siliva e 40, e lua lagolago i lalo o le auivi laupapa e tasi, ma e faapea foʻi i auivi laupapa e sosoo ai, e tofu ma lagolago e lua i lalo o auivi laupapa.
22 A o le vaega i tua o le faleʻie paia i le itu i sisifo, e te faia ai auivi laupapa e ono.+
23 E te faia auivi laupapa e lua e fai ma tulimanu e lua i tua o le faleʻie paia.
24 E ao ona sosoo nei auivi laupapa mai i le pito i lalo seʻia oo i le tumutumu, e gata i le mea ua iai le mama muamua. O le auala lea e faia ai nei auivi laupapa e lua, ma e fai ma tulimanu e lua.
25 E ao ona iai auivi laupapa e valu ma o latou lagolago siliva e 16, e lua lagolago i lalo o le auivi laupapa e tasi, e faapea foʻi i auivi laupapa e sosoo ai e tofu ma lagolago e lua i lalo o le auivi laupapa.
26 “E te faia pou faalava mai i laau o le setima, e lima pou faalava mo auivi laupapa i le tasi itu o le faleʻie paia,+
27 e lima pou faalava mo auivi laupapa i le tasi itu o le faleʻie paia, ma e lima pou faalava mo auivi laupapa mo le isi itu o le faleʻie paia i le itu i sisifo, i le vaega i tua.
28 O le pou faalava i le ogatotonu o auivi laupapa e mai i le tasi itu e oo i le isi itu.
29 “E te ufiufi auivi laupapa i le auro,+ e te faia mama auro e taofi ai pou faalava, ma e te ufiufi pou faalava i le auro.
30 E ao ona e faia le faleʻie paia e tusa ma le ata sa faaali atu iā te oe i le mauga.+
31 “E te faia se ʻie puipui+ i filo lanu moana, o fulufulu mamoe lanu violē, o mea ua vali mūmū sesega, ma ʻie lino ua lelei ona milo ona filo. Ia suʻi ai ni teuteu o ata o kerupi.
32 E ao ona e faatautau ai i luga o poutū e fā o laau o le setima ua ufiufi i le auro. E auro foʻi pine. E tutū poutū i luga o lagolago siliva e fā.
33 E ao ona e faatautau le ʻie puipui i lave ma aumai le atolaau o le feagaiga*+ i tua o le ʻie puipui. Ia fai le ʻie puipui ma mea e vā ai le Mea Paia+ ma le Mea e Sili Ona Paia.+
34 E te tuu le ufiufi i luga o le atolaau o le feagaiga* i le Mea e Sili Ona Paia.
35 “E te tuu le laulau i fafo o le ʻie puipui, ma le tuugāmolī+ e feagai ma le laulau i le itu i saute o le faleʻie paia; e te tuu le laulau i le itu i mātū.
36 E te faia se ʻie pupuni mo le faitotoʻa o le faleʻie i filo lanu moana, o fulufulu mamoe lanu violē, o mea ua vali mūmū sesega, ma ʻie lino ua lelei ona milo ona filo.+
37 E ao foʻi ona e faia poutū e lima i le laau o le setima mo le ʻie pupuni ma ufiufi ai i le auro. E auro foʻi pine, ma e te tunu le ʻapamemea ma fai ai lagolago e lima mo ia poutū.
Faamatalaga Pito i Lalo
^ Po o “e iai pou e tū saʻo.”
^ Epe., “atolaau o le Molimau.”
^ Epe., “atolaau o le Molimau.”
