Esoto 2:1-25
2 I na aso, na faaipoipo ai se tamāloa mai i le ituaiga o Levi i se afafine o Levi.+
2 Ua tō le fafine ma fanau mai se tama tama. Ua iloa e ia ua aulelei lana tama, ona ia natia lea o ia mo le tolu masina.+
3 Ua lē toe mafai ona ia natia o ia,+ ona ia aumaia lea o se ato* kome, ua ia puluti i le tā,* ma tuu ai i totonu le tama, ona faaopeopea lea i le mea ua iai laau o le ū e lata ane i le auvai o le vaitafe o le Naila.
4 Ua tū mamao atu lona tuafafine+ e vaai po o le ā se mea e tupu iā te ia.
5 Ua alu ifo le afafine o Farao e tāʻele i le vaitafe o le Naila, ae ua savavali ana auauna teine i autafa o le vaitafe o le Naila. Ona ia vaaia lea o le ato i le ogatotonu o laau o le ū. Ua faavave ona ia auina atu lana teine pologa e aumai le ato.+
6 Ina ua ia tatala le ato, ona ia iloa ai lea o le tamaitiiti ma o loo tagi o ia. Ona ootia lea o ia i le alofa iā te ia, ae ua ia faapea ane: “O se tamaitiiti lenei a tagata Eperu.”
7 Ona fai mai lea o lona tuafafine i le afafine o Farao: “Ou te alu ea e aami se failele Eperu e sau e tausi le tama mo oe?”
8 Ua fai atu le afafine o Farao iā te ia: “Inā alu ia!” Ona alu loa lea o le teine ma aami le tinā o le tamaitiiti.+
9 Ua fai atu le afafine o Farao iā te ia: “Ia e ave lenei tamaitiiti ma tausi iā te ia mo aʻu, ae ou te avatu pea iā te oe lou totogi.” Ona ave lea e le fafine o le tamaitiiti ma tausi iā te ia.
10 Ua matua le tamaitiiti, ona ia avatu lea o ia i le afafine o Farao ma ua fai o ia ma ana tama.+ Ua ia faaigoa iā te ia o Mose* ma ua faapea ane: “Auā na ou ave aʻe o ia mai i le vai.”+
11 Ua oo ina avea Mose o se tagata matua,* ona ia alu atu lea e asiasi i ona uso, ma vaai i avega mamafa o loo latou tauaveina,+ ma ua ia iloa atu ai se tagata Aikupito o loo fasia se tagata Eperu, o se tasi o ona uso.
12 Ua fetilofaʻi solo o ia ma ua leai se tasi na te iloa atu, ona ia fasiotia lea o le tagata Aikupito ma natia o ia i le oneone.+
13 Ae i le aso na sosoo ai, ua alu atu o ia ma iloa ai ni tamāloloa Eperu se toʻalua o loo fetauaʻi. Ona ia fai atu lea i lē ua sesē: “Aiseā ua e tā ai i lou tuaoi?”+
14 Ua ia tali mai: “O ai na tofia oe e fai ma perenise ma faamasino iā i maʻua? Po ua e fuafua ea e fasioti iā te aʻu e pei ona e fasiotia o le tagata Aikupito?”+ Ua fefe Mose ma faapea ifo: “E lē taumatea ua iloa lenei mea!”
15 Ua logotala Farao e uiga i lenei mea, ma ua ia fia fasioti iā Mose, ae ua sola Mose mai iā Farao ma alu atu e nofo i le laueleele o Mitiana;+ ina ua oo o ia i inā ona ia nofo lea e lata ane i se vaieli.
16 E toʻafitu afafine o le ositaulaga o Mitiana,+ ma ua latou ō mai ma asu aʻe vai e faatumu ai faatanoa e faainu ai le lafu a lo latou tamā.
17 E pei ona masani ai, e ō mai leoleo mamoe ma tutuliese i latou ma a latou lafu. Ona tulaʻi lea o Mose ma fesoasoani* i ia fafine ma faainu i a latou lafu.
18 Ua latou ō atu i le fale i lo latou tamā o Reuelu,*+ ma ua ia fai mai ma le ofo: “Aiseā ua outou vave mai ai i le fale i lenei aso?”
19 Ua latou tali atu: “Ua laveaʻi i matou e se tagata Aikupito+ mai i leoleo mamoe, ma ua ia asu aʻe foʻi vai mo i matou ma ia faainu ai le lafu.”
20 Ona ia fai mai lea i ona afafine: “O fea la o iai o ia? Aiseā ua outou lē ō mai faatasi ai ma ia? Inā ō atu ma aami o ia ina ia tatou aai faatasi.”
21 Mulimuli ane, ua malie Mose e nonofo faatasi ma le tamāloa, ma ua ia avatu lona afafine o Sepora+ e faaipoipo ma Mose.
22 Mulimuli ane ua ia fanaua se tama tama, ma ua faaigoa e Mose o ia o Keresoma,*+ auā ua ia faapea ane: “Ua ou aumau o se tagata ese i se nuu ese.”+
23 Ua mavae se taimi umi,* ona oti ai lea o le tupu o Aikupito,+ ae ua faaauau ona ōi le fanauga a Isaraelu ona o le nofo pologa, ua feoi ona o tulaga leaga, ma ua oo atu pea la latou alaga mo se fesoasoani i le Atua moni,+ ona o lo latou nofo pologa.
24 Ua oo ina faafofoga le Atua i lo latou feoi+ ma ua ia manatua lana feagaiga na faia ma Aperaamo, o Isaako, ma Iakopo.+
25 Ua silasila ifo le Atua i le fanauga a Isaraelu, ma ua liuliualo mai le Atua iā i latou.
Faamatalaga Pito i Lalo
^ Po o le “pusa.”
^ I le gagana Eperu, o le “pulu emeri, ma le pulu safeta.”
^ Lona uiga “Ave Aʻe,” e faasino atu i le laveaʻi mai i le vai.
^ Po o “Ua oo ina malosi Mose.”
^ Po o le “puipui.”
^ E faasino atu iā Ietero.
^ Lona uiga “O le Tagata Ese e Aumau i Inā.”
^ Epe., “le tele o aso.”
