Esoto 17:1-16
17 Ua ō ese le faapotopotoga atoa o le fanauga a Isaraelu mai i le toafa o Sina,+ ua latou ō ma mālōlō i lea nofoaga ma lea nofoaga e tusa ma le faatonuga a Ieova,+ ma ua latou tolauapi i Refiti.+ Ae ua leai se vai e feinu ai le nuu.
2 Ua finau le nuu iā Mose+ ma ua latou faapea mai: “Ia aumai se vai matou te feinu ai.” Ae ua fai atu Mose iā i latou: “Aiseā ua outou finau mai ai iā te aʻu? Aiseā tou te tofotofo ai pea iā Ieova?”+
3 Ua matuā fia feinu le nuu a o iai i lea vaipanoa, ma ua latou muimui pea iā Mose:+ “Aiseā ua e aveese ai i matou mai i Aikupito ina ia fano ai i matou, atoa ma o matou atalii ma a matou lafumanu i le fia feinu?”
4 Mulimuli ane, ua alaga atu Mose iā Ieova: “O le ā laʻu mea a fai i lenei nuu? Ua toeitiiti ona latou fetogia lea o aʻu i maa!”
5 Ona fetalai mai lea o Ieova iā Mose: “Ia e ui i luma o le nuu, ia e ave ni toeaina o Isaraelu ma lou tootoo lea na e taia ai le vaitafe o le Naila.+ Ia e uu i lou lima ma e alu.
6 Faauta! ou te tū i ou luma i luga o le papa i Horepa. Ia e tā le papa ona tafe mai ai lea o le vai ma feinu ai le nuu.”+ Ona faapea lea ona faia e Mose i luma o toeaina o Isaraelu.
7 Ua ia faaigoa lea mea o Mase*+ ma Meripa,*+ auā na finau ai le fanauga a Isaraelu ma latou tofotofoina ai Ieova+ e faapea: “Po ua iā i tatou ea Ieova pe e leai?”
8 Ona ō mai lea o tagata Amaleka+ e tau ma Isaraelu i Refiti.+
9 Ua fai atu Mose iā Iosua:+ “Ia filifili ni tane mo i tatou e ō atu e tau ma tagata Amaleka. O a taeao ou te tū ai i le tumutumu o le aʻega ma uu i loʻu lima le tootoo o le Atua moni.”
10 Ua faia e Iosua e pei ona fai ane ai Mose iā te ia,+ ina ia tau ai ma tagata Amaleka. Ua ō a‘e Mose, Arona, ma Huro+ i le tumutumu o le aʻega.
11 Pe a faaauau ona sisii i luga e Mose ona lima, ona sili lea o le malosi o Isaraelu, ae a tuu i lalo ona lima, ona sili lea o le malosi o Amaleka.
12 Ua oo ina eeva lima o Mose, ona la ave lea o le maa ua tuu i lalo e tiʻetiʻe ai o ia. Ua taofi i luga e Arona ma Huro ona lima, o le tasi i le isi itu ma le isi i le isi itu, ina ia tuu ai pea i luga ona lima seʻia goto le lā.
13 O lea, ua faatoʻilaloina ai e Iosua o Amaleka ma ona tagata i le pelu.+
14 Ua fetalai mai Ieova iā Mose: “Ia tusia lenei mea i le tusi e fai ma faamanatuga ma ia faamatala atu iā Iosua, ‘Ou te matuā tafiesea Amaleka mai i le fogāeleele,* e lē toe manatua lava i latou.’”+
15 Ona faia lea e Mose o le fata faitaulaga ma faaigoa o Ieova-nese,*
16 ua ia fai ane: “Ona ua faasagatau lona lima i le nofoālii o Ioa,+ o le a tau ai Ieova ma Amaleka i lea tupulaga ma lea tupulaga.”+
Faamatalaga Pito i Lalo
^ Lona uiga “Tofotofoina.”
^ Lona uiga “Finauga.”
^ Epe., “mai i lalo o le lagi.”
^ Lona uiga “O Ieova o Loʻu Faailoilo.”
