Esoto 14:1-31
14 Ona fetalai mai ai lea o Ieova iā Mose:
2 “Ia e fai atu i le fanauga a Isaraelu, ina ia toe foʻi e faatutū o latou faleʻie i luma o Peairota i le vā o Mekatala ma le sami e feagai ma Paala-sefona.+ Ia faatutū o outou faleʻie i luma o lea aai e lata ane i le sami.
3 Ona faapea ifo lea o Farao e faatatau i le fanauga a Isaraelu, ‘Ua latou feoaʻi solo ma le lē mautonu i le laueleele. Ua siʻomia pea i latou i le toafa.’
4 Ou te tuu ai pea Farao e faamaaa+ i lona loto, e na te tuliloa i latou, ma ou te faamamaluina aʻu lava e ala i le faatoʻilaloina o Farao ma ana ʻautau uma;+ ma e iloa ai e tagata Aikupito, o aʻu lava o Ieova.”+ Ua faapea lava ona faia e le fanauga a Isaraelu.
5 Mulimuli ane, ua logotala le tupu o Aikupito ua sosola le nuu. Ona suia lea o le loto o Farao ma ana auauna e faatatau i le nuu,+ ua latou faapea ane: “Aiseā ua tatou faia ai lenei mea ma faasa‘oloto tagata Isaraelu mai i le avea ma a tatou pologa?”
6 Ua ia saunia ana kariota o le taua, ma ua ia ave ona tagata faatasi ma ia.+
7 Ua ia ave foʻi o kariota faapitoa e 600, ma isi kariota uma a Aikupito, ma fitafita o ē e tiʻetiʻe i kariota taʻitasi.
8 Ua tuu pea e Ieova o Farao le tupu o Aikupito e faamaaa i lona loto, ma ua ia tuliloa le fanauga a Isaraelu, a o ō ese atu le fanauga a Isaraelu ma le lototetele.*+
9 Ua tuliloa e tagata Aikupito i latou,+ o kariota uma a Farao, o ana ʻautau tiʻetiʻe solofanua, ma ana ʻautau, ua latou tau lalata atu iā Isaraelu a o tolauapi i autafa o le sami, e lata ane i Peairota e feagai ma Paala-sefona.
10 Ina ua latalata atu Farao, ona tetepa aʻe lea o le fanauga a Isaraelu, ma iloa ai tagata Aikupito o loo tuliloa mai i latou. Ua matuā fefefe le fanauga a Isaraelu ma alalaga atu iā Ieova.+
11 Ua latou faapea mai iā Mose: “Po ua leai ni fanuatanu i Aikupito ua e aumaia ai i matou e feoti i le toafa?+ O le ā lenei mea ua e faia iā i matou i le aveese o i matou mai i Aikupito?
12 Pe e matou te leʻi fai atu ea iā te oe i Aikupito, ‘Ia tuu pea i matou e auauna i tagata Aikupito’? Auā e sili iā i matou le auauna i tagata Aikupito, nai lo o le feoti i le toafa.”+
13 Ona faapea atu lea o Mose i le nuu: “Aua tou te fefefe.+ Ia outou laulaututū ma vāai i le faaolataga mai iā Ieova o le a ia faia mo outou i le aso nei.+ Auā o tagata Aikupito ua outou vāai i ai i le asō, e tou te lē toe vāai lava i ai.+
14 E tau Ieova mo outou,+ a o outou laulaututū ma faalologo.”
15 Ua fetalai mai Ieova iā Mose: “Aiseā e te alaga soo mai ai iā te aʻu? Ia e fai atu i le fanauga a Isaraelu, ia tapena o latou faleʻie ma sauni e ō.
16 A o oe, ia e sii i luga lou tootoo ma faaloaloa lou lima i le sami, ma vaelua ai le sami, ina ia ui atu ai le fanauga a Isaraelu i le ogatotonu o le sami i le eleele mātūtū.
17 A o aʻu, ou te tuu ai pea tagata Aikupito ia faamaaa i o latou loto, ina ia tuliloa pea i latou, ma ou faamamaluina ai aʻu lava i le faatoʻilaloina o Farao, o ana ʻautau uma, o ana kariota o le taua, ma ana ʻautau tiʻetiʻe solofanua.+
18 E iloa ai e tagata Aikupito o aʻu lava o Ieova, pe a ou faamamaluina aʻu i le faatoʻilaloina o Farao, o ana kariota o le taua, ma ana ʻautau tiʻetiʻe solofanua.”+
19 Ona alu ese lea o le agelu a le Atua moni+ na muamua atu i le fanauga a Isaraelu, ma alu i o latou tua, ua mou ese le ao mai i luma o le ʻaumalaga ma ua tū i o latou tua.+
20 Ua oo le ao i le vā o tagata Aikupito ma tagata Isaraelu.+ Ua avea ma ao pogisa i le tasi itu. Ae ua avea ma malamalama i le pō+ i le isi itu. Ua lē oo atu tagata Aikupito i tagata Isaraelu i le pō atoa.
21 Ua faaloaloa e Mose lona lima i luga o le sami;+ ona faaagi mai lea e Ieova o le matagi malosi mai i sasaʻe i le pō atoa, ma amata ai ona vaeluaina le sami,+ ma liua le ilititai e avea ma eleele mātūtū.+
22 Ona savavali ai lea o le fanauga a Isaraelu i le ogatotonu o le sami i le eleele mātūtū,+ ae ua avea le sami ma pā maualuga i lo latou itu taumatau ma lo latou itu tauagavale.+
23 Ua tuliloa i latou e tagata Aikupito ma ua ō atu i le ogatotonu o le sami, o solofanua uma a Farao, o ana kariota o le taua, ma ana ʻautau tiʻetiʻe solofanua.+
24 Ua oo i le leoleoga o le taeao* ua silasila ifo Ieova i tagata Aikupito mai i le afi ma le ao faaniutū,+ ma ua ia faapogaia le fenuminumiaʻi o tagata Aikupito.
25 Ua ia aveesea uili o a latou kariota, ona tosogatā ai lea, ma ua fai ane tagata Aikupito: “Inā tatou sosola ese ia mai iā Isaraelu, auā o loo tau Ieova mo i latou faasaga i tagata Aikupito.”+
26 Ona fetalai mai lea o Ieova iā Mose: “Ia faaloaloa lou lima i luga o le sami, ina ia toe foʻi mai ai le sami i luga o tagata Aikupito, o a latou kariota o le taua, ma a latou ʻautau tiʻetiʻe solofanua.”
27 Ua faaloaloa e Mose lona lima i luga o le sami, ma ua toe foʻi mai le sami i lona tulaga masani a o tafa mai ata o le taeao. A o tau sosola ese tagata Aikupito, ae ua lafo e Ieova tagata Aikupito i totonu o le sami.+
28 Ua toe foʻi mai le sami ma ufitia ai kariota o le taua, o ʻautau tiʻetiʻe solofanua, ma ‘autau uma a Farao na ō atu i le sami e tuliloa tagata Isaraelu.+ Ua leai lava ma se tasi ua totoe.+
29 Ae na savavali le fanauga a Isaraelu i le ilititai mātūtū i le ogatotonu o le sami,+ ma na avea le sami ma pā maualuga i lo latou itu taumatau ma lo latou itu tauagavale.+
30 O lea, na faaolaina ai e Ieova Isaraelu mai i lima o tagata Aikupito+ i lenā aso, ma vaaia ai e Isaraelu tagata Aikupito ua feoti i le matafaga.
31 Ua vaaia ai foʻi e Isaraelu le aao malosi o Ieova faasaga i tagata Aikupito; ua matataʻu le nuu iā Ieova ma ua faatuatua iā Ieova ma lana auauna o Mose.+
Faamatalaga Pito i Lalo
^ Epe., “ma sisii i luga o latou lima.”
^ E faasino atu i le pe ā o le 2 i le vaveao e oo i le 6 i le taeao.
