Esoto 13:1-22
13 Ua toe fetalai mai Ieova iā Mose e faapea:
2 “Ia faapaiaina* mo aʻu o tama ulumatua uma* o le fanauga a Isaraelu. O le tama ulumatua e fanau mai i se tagata ma le ulumatua po‘a e fanau mai i se manu, e fai lava ia mo aʻu.”+
3 Ua faapea atu Mose i le nuu: “Ia outou manatua lenei aso ua outou ō mai ai mai i Aikupito,+ o le mea na outou nofo pologa ai, ona o le aao malosi o Ieova ua aumai ai outou i inei.+ O lea, ia aua neʻi ʻaina se mea ua faafefeteina.
4 O le aso lenei ua outou ō ese ai i le masina o Apipa.*+
5 Pe a avatu oe e Ieova i le laueleele o le ʻau Kanana, o le ʻau Hetī, o le ʻau Amorī, o le ʻau Hivī, ma le ʻau Iepusē,+ lea na ia tautō ai i ou augātamā e avatu iā te oe+ le laueleele e tafe ai le suāsusu ma le meli,+ ona e tausia lea o lenei faamanatuga i lenei lava masina.
6 E fitu aso e te ʻai ai i falaoa e lē faafefeteina,+ ae o le aso lona fitu, o le tausamiga lea iā Ieova.
7 E fitu aso e ʻai ai falaoa e lē faafefeteina;+ aua neʻi maua iā te oe se mea faafefete,+ aua foʻi neʻi maua iā te oe se paluga ua fefete i fanua uma e te nofo ai.
8 Ia e fai atu i lou atalii i lenā aso, ‘E faia lenei mea ona o le mea na faia e Ieova mo aʻu, ina ua ou alu ese mai i Aikupito.’+
9 E fai foʻi ma faailoga i lou lima ma faamanatuga i lou muāulu,*+ ina ia iai le tulafono a Ieova i lou gutu; ona o le aao malosi o Ieova na ia aumaia ai oe mai i Aikupito.
10 Ia e tausia lenei tulafono i lona taimi atofaina i lea tausaga ma lea tausaga.+
11 “Pe a avatu oe e Ieova i le laueleele o Kanana, e pei ona ia tautō ai iā te oe ma ou augātamā e avatu iā te oe,+
12 ona e tuuina atu lea iā Ieova o tama ulumatua uma,* atoa fo‘i ma manu po‘a ulumatua uma o lafumanu ua iā te oe. E fai mo Ieova o tama ulumatua ma manu poʻa ulumatua.+
13 O ulumatua uma a asini, ia e fesuiaʻi ma se mamoe, ae afai e te lē fesuiaʻia ma se mamoe, ona e gagau lea o lona ua. Ia e toe faatau mai ulumatua uma a ou atalii.+
14 “Pe a fesili atu mulimuli ane lou atalii iā te oe, ‘O le ā le uiga o lenei mea?’ ona e faapea atu lea iā te ia, ‘O le aao malosi o Ieova na aumaia ai i matou mai i Aikupito, le mea na matou nofo pologa ai.+
15 Ina ua matuā musu Farao e tuu mai i matou e ō,+ ona fasiotia ai lea e Ieova o ulumatua uma i le laueleele o Aikupito, e mai i le ulumatua a tagata e oo lava i ulumatua a manu.+ O le mea lea ua ou faia ai le taulaga iā Ieova i manu po‘a ulumatua uma,* ma ou toe faatau mai ulumatua uma a oʻu atalii.’
16 E fai foʻi ma faailoga i lou lima, ma faamanatuga i lou muāulu,*+ ona o le aao malosi o Ieova na ia aumaia ai i matou mai i Aikupito.”
17 Ina ua tuuina mai e Farao le nuu e ō, e leʻi taʻitaʻiina i latou e le Atua e ui atu i le laueleele o tagata Filisitia, e ui lava e latalata. Auā ua fetalai mai le Atua: “Ina ne‘i suia ai mafaufau o le nuu pe a latou fetaiaʻi ma se taua, ma latou toe foʻi atu ai i Aikupito.”
18 O le mea lea ua taʻitaʻi ai e le Atua tagata i se malaga umi, e ui atu i le toafa e lata ane i le Sami Ulaula.+ Ua faatulagaina le fanauga a Isaraelu e pei o se ʻautau a o ō aʻe i latou mai i le atunuu o Aikupito.
19 Ua ave foʻi e Mose ivi o Iosefa, auā na matuā tautō le fanauga a Isaraelu ina ua ia fai atu iā i latou: “O le a silasila mai le Atua iā te outou, ma pe a outou ō, ia outou ave aʻe oʻu ivi mai i inei.”+
20 Ona latou ō ese lea mai i Sukota ma faatutū o latou faleʻie i Etama i le faatausiʻusiʻuga o le toafa.
21 Ua muamua atu Ieova i o latou luma i le ao ina ia taʻitaʻia i latou i le ala i le ao faaniutū,+ ma le afi faaniutū i le pō ina ia faamalamalama ai i latou, a o malaga i le ao ma le pō.+
22 E lē alu ese le ao faaniutū mai i luma o le nuu i le ao, e faapena foʻi le afi faaniutū i le pō.+
Faamatalaga Pito i Lalo
^ Po o le “tuu ese.”
^ Epe., “o ulumatua uma na tatala ai faaautama taʻitasi.”
^ Epe., “i le vā o ou mata.”
^ Epe., “o ē uma na tatala ai le faaautama.”
^ Epe., “i mea uma na tatala ai le faaautama.”
^ Epe., “i le vā o ou mata.”
